Navigation

Inhaltsbereich

Dumonda Janom Steiner concernent asilantas ed asilants che vivan illegalmain en il Grischun

Sessiun: 19.04.2005
En la pressa quotidiana grischuna han ins pudì leger ils 26 da schaner 2005 confurm al senn il suandant:
"Sentenzià per la dieschavla giada in requirent d'asil refusà
Pervi da commerzi cun drogas e pervi d'ulteriurs delicts ha la dretgira chantunala dal Grischun sentenzià a 30 mais praschun in Algerian che viva dapi set onns illegalmain en Svizra. Inditgond in num fauss è il requirent d'asil vegnì l'onn 1997 en Svizra ed è vegnì attribuì al chantun Grischun. Cunquai che sia dumonda d'asil è vegnida refusada, sa trategna el dapi l'onn 1998 illegalmain en Svizra. Fin l'atun 2002 ha el abità en il center transitori a Cuira, suenter è el vegnì translocà en quel da Rueun ed alura en quel da Schluein, fin ch'el è partì da là il favrer 2004 ed ha survegnì in scumond da metter pe en chasa. Dapi lur abitescha el tar sia amia en Surselva. Il requirent d'asil refusà ha survegnì fin la fin da zercladur 2004 prestaziuns d'assistenza da totalmain 66'500. francs. Cumbain che la polizia d'esters dal Grischun aveva sclerì la vaira identitad tar las autoritads en Algeria, n'ha el ch'è stà pliras giadas chastiabel betg pudì vegnir repatrià, e l'exiliaziun pronunziada n'ha betg pudì vegnir exequida. El sa chattava bain en arrest da repatriament quai che ha custà a la confederaziun ed al chantun ulteriurs 30'000. francs , ma i n'è betg pussaivel da far repatriaments sfurzads en l'Algeria. Suenter ch'il requirent d'asil sentenzià ha declerà davant dretgira ch'el vegnia adina a restar qua, ha el bandunà la sala da dretgira sco um liber."

Cas da dretgira sco quel na sveglian betg mo malchapientscha e malcuntentientscha en la publicitad, tals cas da dretgira decuraschan er la polizia e l'administraziun. Cunquai ch'i na sa tracta en cas dals fatgs preschentads strusch d'in cas singul, resultan las suandantas dumondas:

1. Quantas requirentas e quants requirents d'asil sa trategnan illegalmain en il Grischun?Quantas da quellas e quants da quels èn gia dads en egl tras in cumportament delictual? È er la regenza da l'avis ch'in tal cumportament delictual chaschuna tar la publicitad en general ina tenuta negativa visavi requirentas e requirents d'asil, quai ch'è nuschaivel per noss pensar umanitar tradiziunal?

2. Co giuditgescha la regenza tals cas?

3. Datti in sustegn da la giustia grischuna per las stentas da l'administraziun, spezialmain da la polizia d'esters?

4. Tge fa la regenza cunter ils problems executivs? Ha la regenza appurtà propostas da soluziun en la revisiun parziala currenta da la lescha d'asil?

5. È la regenza pronta da prender mesiras repressivas per talas requirentas e per tals requirents d'asil, p.ex. cun construir stabiliments supplementars en lieus solitaris?

Cuira, ils 19 d'avrigl 2005

Name: Janom Steiner, Dudli, Hartmann (Champfèr), Bachmann, Barandun, Berther (Sedrun), Bleiker, Brunold, Butzerin, Casanova (Vignogn), Casty, Cavegn, Cavigelli, Christoffel, Crapp, Dermont, Donatsch, Fleischhauer, Giacometti, Giovannini, Gredig, Hanimann, Hardegger, Heinz, Hübscher, Jeker, Kessler, Krättli-Lori, Lemm, Loepfe, Maissen, Mani-Heldstab, Märchy-Michel, Marti, Montalta, Nigg, Parolini, Pedrini, Perl, Portner, Quinter, Ratti, Righetti, Rizzi, Stiffler, Stoffel, Vetsch, Wettstein, Bezzola, Campell, Foffa, Gubelmann

Session: 19.04.2005
Vorstoss: rg Anfrage


Resposta da la regenza

L'execuziun da decisiuns d'asil negativas sco er il repatriament da persunas che sa chattan illegalmain en Svizra èn ils pli gronds problems dal dretg d'esters e dal dretg d'asil da la Svizra. La problematica survegn ina impurtanza speziala, sche las persunas che ston vegnir repatriadas commettan repetidamain delicts, sa cumportan a moda asociala u emprovan d'impedir u da retardar il repatriament cun duvrar tut las proceduras da meds legals pussaivlas. Repatriaments disdeschan savens, perquai che singuls stadis da provegnientscha n'èn betg pronts da prender enavos lur burgaisas e lur burgais u perquai che questas persunas na coopereschan betg cur ch'i sa tracta da sclerir lur identitad e da procurar per lur documents. Il Grischun è bain en ina dimensiun pli pitschna pertutgà da quests problems sco tut ils auters chantuns. Cun la praschun da preparaziun e da repatriament en il Sennhof exista almain la pussaivladad d'influenzar la prontezza da repatriament, e quai cun mesiras che priveschan da la libertad.

1. Il dumber exact da requirentas e da requirents d'asil refusads che sa trategnan illegalmain en il chantun Grischun na sa lascha betg eruir. Dapi ch'il program da distgargia 03 da la confederaziun è vegnì introducì il 1. d'avrigl 2004, vegnan dentant registrads sistematicamain ils surpassaments da leschas che vegnan commess da questa gruppa da persunas. Dal 1. d'avrigl fin ils 31 da december 2004 èn vegnidas fatgas 70 denunzias pervi da dimora illegala cunter 25 requirentas u requirents d'asil refusads. Durant la medema perioda èn ultra da quai vegnidas denunziadas 13 da quellas persunas pervi d'auters delicts (lescha da narcotics, enguladitschs e.u.v.). Las retschertgas da l'onn 2005 mussan ch'ils surpassaments da leschas restan pli u main en il rom da l'onn passà. Er la regenza è da l'avis che talas situaziuns insupportablas possian promover la xenofobia en la populaziun. In andament svelt da las proceduras d'asil sco er in'execuziun consequenta da las decisiuns d'asil è perquai dapi onns da gronda impurtanza per la regenza.

2. Decisiuns d'asil cun vigur legala che na pon betg vegnir exequidas èn problematicas dal puntg da vista dal stadi da dretg. Problems d'execuziun en il sectur d'asil pon chaschunar in problem social che na dastga betg vegnir sutvalità, sche requirentas e requirents d'asil refusads na respectan betg l'urden giuridic vertent u sa cumportan a moda asociala.

3. La collavuraziun cun las autoritads d'inquisiziun e cun las autoritads giudizialas po vegnir caracterisada tut en tut sco buna, uschenavant ch'ina tala collavuraziun è insumma pussaivla sin basa da l'independenza da la giustia e da las differentas incumbensas.

4. Ina meglieraziun da la situaziun sa laschass cuntanscher cunzunt cun optimar la collavuaziun cun las ambassadas estras e cun stadis da provegnientscha critics. Per quai èn dentant cumpetents cunzunt la confederaziun ed il departament federal da giustia e polizia. La regenza grischuna è s'exprimida repetidamain per ina meglieraziun da las cundiziuns giuridicas generalas en il sectur da l'execuziun. Ella ha ultra da quai mess a disposiziun il schef da l'uffizi da fatgs da polizia e da dretg civil sco copresident per la gruppa da lavur "execuziun da la spedida" che sa cumpona da represchentantas e da represchentants da la confederaziun e dals chantuns. Questa gruppa lavur coordinescha ed optimescha l'execuziun da la spedida.

5. Tenor l'art. 121 al. 1 CF è la legislaziun dal dretg d'esters e dal dretg d'asil chaussa da la confederaziun. Ils chantuns na disponan betg d'ina basa legala per relaschar atgnas mesiras repressivas pli severas. En l'execuziun da las mesiras repressivas sto ultra da quai vegnir resguardada la pratica dal tribunal federal. En il rom da la reorganisaziun da l'administraziun vegn l'uffizi da fatgs da polizia e da dretg civil ad esser cumpetent a partir dal 1. da schaner 2006 er per la collocaziun da las requirentas e dals requirents d'asil. En quest connex duai vegnir repassà il concept da collocaziun che datescha da l'onn 1994. Spezialmain èsi previs da porscher a persunas cun ina procedura terminada mo pli alloschis modests cun ina purschida d'assistenza simpla e da renunziar ad immobiglias che sa chattan datiers dals centers. Schebain novas structuras d'assistenza pon vegnir stabilidas en lieus solitaris, dependa decisivamain dals objects disponibels sco er dal consentiment da las vischnancas da staziunament respectivas.

Datum: 24 da zercladur 2005