Navigation

Inhaltsbereich

Sessiun: 19.04.2005
La statistica dals giasts per l'onn 2004 dat plitost in maletg deprimant dal stadi da nossa branscha economica la pli impurtanta. En cumparegliaziun cun l'onn 1994 èn las pernottaziuns sa reducidas per passa 1 milliun sin actualmain anc 5,53 milliuns pernottaziuns. Quai dat da pensar. Da l'autra vart è il turissem sin l'entir mund ina branscha che expandescha. Qua stuain nus tschentar inevitablamain la dumonda, tge faschain nus auter che nossas concurrentas e noss concurrents ch'han dapli success al lontan e datiers? Che nus essan in pajais cun auts pretschs tut che sa. Per che las prestaziuns ad auts pretschs vegnian acceptadas da la clientella èn dumandads nossas bravas hotelieras e noss bravs hoteliers sco er las interprendidras ed ils interprendiders da pendicularas e da viafiers da muntogna. Nus avain dentant in problem da reputaziun che na po betg vegnir schlià cun la preschentaziun al martgà che vegn pratitgada fin uss en moda fitg diversifitgada. La viafier retica è in'offerenta da prestaziuns da servetsch che dat fermamain la tempra a la reputaziun e gioga perquai ina gronda rolla per il marketing da noss entir chantun. La strategia da l'interpresa da la VR stuess perquai esser accordada optimalmain cun l'ulteriur svilup turistic da nossas destinaziuns. La VR è fitg bain adattada per surpigliar ina rolla centrala e per daventar il leader per concentrar e per commerzialisar las prestaziuns turisticas.

Dumondas a la regenza.

1. Na stuain nus, sco persunas responsablas politicas, betg trair a niz tut las pussaivladads per obtegnair bunas cundiziuns che paran adattadas per sustegnair il turissem? Na stuain nus betg animar da surpigliar ina rolla pli activa particularmain ils ferms purtaders da prestaziuns, ils quals nus pudain influenzar directamain (sco p.ex. la VR)?

2. Vesa la regenza che la VR possia surpigliar ina rolla directiva per coordinar las prestaziuns da servetsch e per commerzialisar nossas purschidas turisticas ed è ella pronta da s'engaschar per quest intent tar la direcziun da la VR?

3. Tge ulteriuras pussaivladads vesa la regenza per defender ed augmentar las quotas al martgà?

Cuira, ils 19 d'avrigl 2005

Name: Koch, Farrér, Christ, Arquint, Berther (Mustér), Bucher-Brini, Butzerin, Casanova (Vignogn), Cavigelli, Crapp, Fallet, Fasani, Giacometti, Jäger, Keller, Kessler, Marti, Michel, Parolini, Plozza, Ratti, Righetti, Sax, Schütz, Stiffler, Tremp, Trepp, Zanolari, Florin-Caluori, Gubelmann, Nay, Zehnder

Session: 19.04.2005
Vorstoss: rg Anfrage


Resposta da la regenza

Il turissem è ina branscha che expandescha e cuntegna da princip il potenzial per plazzas da lavur supplementaras. Il svilup en il Grischun n'è però betg legraivel. Il dumber da pernottaziuns en hotels è sa reducì fitg dal maximum l'onn 1993 cun 6.54 milliuns sin oz 5.53 milliuns. Ils ultims trais onns è il nivel sa stabilisà e sa revegnì dal minimum da l'onn 1996 cun stgars 5.37 milliuns. Il dumber d'arrivadas perencunter è oz quasi exactamain sin la medema autezza (1.64 milliuns) sco l'onn da record 1993. La tendenza generala da dimoras pli curtas (oz 3.4 dis visavi 4.0 dis avant 10 onns) ha per consequenza ch'i dat main pernottaziuns.

Ils ultims 20 onns è cumparì in grond dumber da novas destinaziuns sin il martgà. Per la clientella orientada globalmain sa laschan quellas cuntanscher oz levamain cun sgols bunmartgads e grazia ad in sistem da reservaziun simpel (tranter auter internet). I na dat pia betg mo in dumber da dumondas pli e pli grond, mabain er ina purschida pli e pli vasta. Ils martgads tradiziunals dal Grischun, la Svizra e la Germania, èn stads cuntrariamain als martgads internaziunals plitost regressivs ils ultims onns.

Il turissem dal Grischun ha in problem da svilup. Mo sch'i reussescha da gudagnar suffizientamain novs giasts, po il svilup vegnir concepì en moda persistentamain positiva. Per quest intent ston ils meds avant maun vegnir impundids optimalmain. Quai pretenda structuras effizientas ed ina commerzialisaziun che sa basa sin marcas e sin destinaziuns fermas. La finanziaziun principala succeda sur taxas communalas per promover il turissem. Uschia sa chattan las pussaivladads d'agir e la responsabladad primarmain sin quest nivel. En il program da la regenza 2005 fin 2008 vegn tematisada sut il punct central da svilup 21 la promoziun da structuras effizientas. Il chantun ha gia inizià in project correspundent cun la finamira da crear structuras turisticas cumpetitivas. La viafier retica (VR), Grischun vacanzas (GRV) e las destinaziuns las pli grondas èn integradas en quest project.

Tar las dumondas:

1. La regenza è er da l'avis da las sutsegnadras e dals sutsegnaders che la politica stoppia s'engaschar per obtegnair bunas cundiziuns generalas adattadas per sustegnair il turissem. I n'è dentant betg l'incumbensa da la regenza d'intervegnir directamain en l'activitad operativa dals singuls purtaders da prestaziuns. Perquai n'è l'influenza directa betg prioritara.

2. Igl è enconuschent ch'il cussegl administrativ e che la direcziun da la VR s'engaschan pli activamain per il marketing e per la vendita. Mesiras correspundentas èn gia vegnidas lantschadas da las instanzas da la VR. La VR posseda products enconuschents sin plaun naziunal ed internaziunal sco il glacier express u il Bernina express. Igl è impurtant che tant la VR sco er las destinaziuns sviluppeschian products communabels e ch'ellas commerzialiseschian quels correspundentamain. Sco exempel po vegnir menziunada la convenziun da basa tranter la VR, l'uniun da cura e da traffic da San Murezzan, Tavau turissem, Grischun vacanzas sco er tranter ils copartenaris Claustra turissem, l'uniun da cura e da traffic da Puntraschigna e l'arena da las Alps che prevesa ina elavuraziun communabla dals martgads da l'Asia. Quant enavant che la VR surpiglia ina rolla directiva per la purschida turistica, è chaussa da la VR sezza. La regenza prenda enconuschientscha da questa strategia d'expansiun da la VR. Ina coordinaziun tranter ils purtaders da prestaziuns e tranter las destinaziuns sto sa chapescha vegnir garantida, dentant resta mintga destinaziun e mintga purtader da prestaziuns, er la VR, primarmain sez responsabel per la commerzialisaziun.

3. La regenza promova activamain il turissem. Quai cuntegna tranter auter la promoziun d'infrastructuras turisticas generalas e da cooperaziuns, la meglieraziun da structuras sco er ina promoziun limitada da manaschis singuls. Plinavant sto vegnir menziunada la contribuziun a Grischun vacanzas. Las finamiras impurtantas èn ina professiunalisaziun, in augment d'effizienza, ina intensivaziun da la commerzialisaziun ed ina concentraziun sin las marcas principalas. Sa basond sin ils resultats dal project "structuras turisticas cumpetitivas" duain vegnir sviluppadas strategias d'expansiun per pudair surviver sin il martgà turistic svizzer ed internaziunal. Per che las strategias e las mesiras possian vegnir realisadas ston vegnir duvrads ils meds avant maun tar las organisaziuns communalas e regiunalas en moda pli consequenta per elavurar il martgà e per gudagnar novs giasts.

Datum: 24 da zercladur 2005