Navigaziun principala

Cuntegn da la pagina

Incumbensa Pfenninger concernent il center da controlla per il traffic pesant a la A 13 - sid

sessiun: 19.04.2005
Dapi intgins mais è uss en funcziun il center da controlla per il traffic pesant a Giuvaulta. L'effect da questas controllas dastga vegnir valità sco fitg positiv cunzunt areguard il traffic da transit. Spezialmain la segirezza dal traffic sin il traject da muntogna da la A 13 vegn meglierada marcantamain tras questa activitad da controlla cumplessiva. Cun il stabiliment a Giuvaulta po dentant vegnir registrà essenzialmain mo il traffic che vegn dal nord.

Sin la via dal Gottard èn contestads ils lieus da staziunament dals centers da controlla per il traffic pesant, tant per il traffic dal nord al sid sco er per quel dal sid al nord. I sto vegnir fatg quint che las decisiuns correspundentas pertutgant ils lieus da staziunament (Tessin / Uri ed auters) vegnian a restar pendentas anc in temp e che quests centers da controlla vegnian mess en funcziun cun grond retard. Ultra da quai dastgass il center da controlla tessinais vegnir situà al nord da la bifurcaziun vers il San Bernardin. Las experientschas mussan che quai attirass il traffic da guntgida cun las ristgas da segirezza correspundentas sin il traject da muntogna dal San Bernardin. Schizunt sch'ins amplifitgass il center da controlla per il traffic pesant a Giuvaulta er per il traffic che vegn dal sid, resultass ina situaziun fitg malempernaivla, perquai che las eventualas mancanzas dals vehichels vegnissan constatadas e chastiadas pir suenter il viadi da muntogna privlus.

In center da controlla per il traffic pesant avant la rampa dal San Bernardin en la part sut da la Val Mesauc ans para util sin fundament da las explicaziuns surmenziunadas (finanziaziun tras la confederaziun) e creass ultra da quai intginas plazzas da lavur fitg bainvegnidas en la Val Mesauc.

Nus supplitgain perquai la regenza da planisar in center da controlla per il traffic pesant al sid da la rampa dal San Bernardin en la part sut da la Val Mesauc e d'entrar en las tractativas correspundentas cun la confederaziun.

Cuira, ils 19 d'avrigl 2005

Name: Pfenninger, Keller, Arquint, Berther (Mustér) Berther (Sedrun), Cahannes, Cavigelli, Demarmels, Fallet, Fasani, Fleischhauer, Frigg, Giovannini, Heinz, Jaag, Jäger, Kleis-Kümin, Koch, Loepfe, Meyer Persili (Cuira), Pedrini, Pfiffner, Plozza, Quinter, Righetti, Schütz, Stoffel, Tomaschett, Tremp, Trepp, Tuor, Zanetti, Zanolari, Zarn, Zindel, Caviezel (Cuira), Florin-Caluori, Raselli

Session: 19.04.2005
Vorstoss: rg Auftrag


Resposta da la regenza

Per intensivar las controllas dal traffic pesant e per meglierar la segirezza dal traffic prevesa la confederaziun ultra da rinforzar las controllas mobilas da construir ina rait da centers da controlla per il traffic pesant (in center maxi e 12 centers midi). Ils lieus da staziunament dals centers planisads vegnan elegids uschia ch'il traffic pesant po vegnir controllà sistematicamain sin l'entira rait da las vias naziunalas, spezialmain dentant sin las axas dal nord al sid. Sco emprim center ha pudì vegnir avert l'atun 2004 il center da controlla per il traffic pesant a Riòlta sut, Cazas.

Per lung da la A2 duai vegnir construì in center al nord dal pass dal Son Gottard cun staziunament ad Erstfeld. En il chantun Tessin vegnan ultra da quai discutads sco centers da controlla per il traffic pesant ils lieus Sigirino, al sid dal Monte Ceneri, sco er Bodio (Monteforno).

Gia ils 11 da schaner 2005 è la regenza grischuna sa drizzada a cusseglier federal Moritz Leuenberger cun il giavisch da realisar svelt in center da controlla per il traffic pesant al sid dal pass dal San Bernardin. La regenza aveva rinvià al fatg ch'i saja d'impurtanza centrala per il chantun Grischun, tge lieu che vegnia preferì. Ch'i saja decisiv ch'il center da controlla per il traffic pesant en il chantun Tessin vegnia construì en in lieu, en il qual possia vegnir controllà l'entir traffic pesant vers il nord avant ils pass sur las Alps resp. avant ils tunnels tras las Alps. En mintga cas stoppia il lieu da staziunament sa chattar al sid dal spartavias tranter la A2 e la A13, per pudair impedir il traffic da guntgida.

En sia resposta dals 22 da favrer 2005 ha il schef dal DATEC fatg attent che la decisiun davart il lieu da staziunament per il center da controlla en il chantun Tessin na saja betg anc vegnida prendida. Malgrà custs considerabels na saja anc betg reussì da chattar in lieu da staziunament adattà al sid dal spartavias tranter la A2 e la A13. La construcziun d'in center en il Tessin saja pussaivla mo en cumbinaziun cun ulteriuras plazzas da parcar per camiuns. Pervi da las dimensiuns saja in tal center dentant pussaivel mo a Monteforno.

Per il center da controlla a Riòlta sut èn resultads custs da construcziun dad 8.5 milliuns francs, e quai senza ils custs per l'acquist dal terren e per sia avertura. Ultra da quai resultan annualmain custs da persunal en la summa da ca. 1.1 milliun francs e custs da gestiun da 300'000.- francs per l'electricitad, l'aua, il nettegiament, il mantegniment e.u.v. Cun in center pli pitschen che n'è betg permanentamain en funcziun, pudessan quests custs vegnir reducids per part.

La regenza è pronta d'acceptar l'incumbensa e da s'engaschar anc ina giada tar la confederaziun en favur da la construcziun d'in center da controlla per il traffic pesant en il Tessin, al sid dal spartavias tranter la A2 e la A13. Sch'il center per lung da la A2 vegniss cuntrariamain a l'opiniun da la regenza tuttina construì al nord da quest spartavias, vegn la regenza a s'engaschar tar la confederaziun per la construcziun d'in center da controlla supplementar per il traffic pesant en la Val Mesauc. I n'è dentant betg pussaivel da pudair realisar e manar in tal center mo cun meds chantunals. Sche la confederaziun na surpiglia betg ina part correspundenta dals custs, sto vegnir desistì da construir in center da controlla supplementar per il traffic pesant en la Val Mesauc ed il traffic sto vegnir surveglià vinavant cun controllas mobilas.

Datum: 23 da zercladur 2005