Navigation

Inhaltsbereich

Sessiun: 19.04.2005
Tar projects communals en il sectur d'investiziun, ils quals vegnan subvenziunads dal chantun, guarda il chantuna severamain che las vischnancas observian la legislaziun da submissiun. Quai è raschunaivel dal puntg da vista dal princip da tractament egual da tut ils offerents , però igl è mintgatant donn, sch'il mastergn indigen tira la curta pervi d'ina differenza minimala dal pretsch u da la prestaziun.

Sa tegna il chantun uschè severamain vi da las prescripziuns legalas er tar surdadas en il sectur da l'administraziun, tar instituziuns affiliadas (p.ex. ospitals)? En il sectur da las surdadas da prestaziuns da servetsch avain nus dabasegn in scleriment. Per exempel tar la surdada da prestaziuns d'assicuranza che impurtavan dapli che 25'000. (art. 13 da la lescha chantunala da submissiun), èn vegnidas applitgadas l'ultim temp per part proceduras directas cun la motivaziun, ch'en cas urgents na sajan pussaivlas naginas autras proceduras. En il cas plitgunsch rar, nua ch'ina polissa vegn visada nunprevisiblamain ed a curta vista tras l'assicurader fiss quai anc chapaivel. Tar la scadenza ordinaria d'ina polissa è il termin da liberaziun però enconuschent da tut temp. Tar assicuranzas chantunalas ch'èn dependentas da la summa dals salaris (p.ex. LAA), chaschuna 1% da la summa dals salaris premias annualas da 2.5 3 milliuns francs.

Bleras vischnancas (p.ex. la citad da Cuira) u corporaziuns da vischnancas (p.ex. las vischnancas dal district dal Plaun) han cuntanschì in grond potenzial da spargn cun engaschar in cussegliader d'assicuranzas per surdar las polissas d'assicuranza.

Nus dumandain la regenza:

1. Quant enavant sa differenzieschan las procedurasda surdada en il sectur da prestaziuns da servetsch da quellas en l'industria principala e secundara da construcziun?

2. Pon publicaziuns d'assicuranzas da polissas cun in termin ordinari da scadenza dal contract esser uschè urgentas, ch'ina procedura averta u selectiva n'è betg pussaivla?

3. Tge potenzial da spargn spetga la regenza da la publicaziun da prestaziuns da servetschs en la procedura directa en general e da prestaziuns d'assicuranza en spezial?

4. Tge consequenzas avess quai, sche la publicaziun da prestaziuns d'assicuranzas vegniss fatga d'in cussegliader d'assicuranza?

Cuira, ils 19 d'avrigl 2005

Name: Feltscher, Marti, Barandun, Berther (Sedrun), Casanova (Cuira), Caviezel (Pitasch), Donatsch, Hanimann, Hess, Jäger, Keller, Kessler, Krättli-Lori, Maissen, Meyer-Grass (Claustra), Michel, Plozza, Righetti, Rizzi, Thomann, Tremp, Pool, Toschini

Session: 19.04.2005
Vorstoss: rg Anfrage


Resposta da la regenza

Ins sto relativar la decleraziun da las sutsegnadras e dals sutsegnaders, ch'il mastergn indigen na vegnia savens betg resguardà per amur da vulair observar las restricziuns da la lescha. La statistica cumprova che la gronda part da las surdadas va ad indigens (en media ca. 85%). I fa surstar che tar surdadas directas / proceduras d'invit nua ch'ils incumbensaders han la libertad d'agir la pli gronda van las incumbensas savens a purschiders extracommunals u extrachantunals, malgrà ch'igl existan sin il martgà purschiders grischuns ch'èn abels da concurrer. Las instanzas da surdada, cunzunt las vischnancas, na fan qua betg adina diever da lur libertad d'agir concedida da la lescha (rapports da la statistica da submissiun: www.bvfd.gr.ch/submissionswesen).

Tar las dumondas:

1. Las proceduras da surdada en il sectur da las prestaziuns da servetsch na sa differenzieschan en general betg da quellas en il sectur da construcziun. Tut las incumbensas che surpassan las limitas minimalas decisivas per ina surdada directa ston cun resalva da la regulaziun excepziunala da l'art. 3 Osub vegnir procuradas en ina procedura formala (procedura d'invit, procedura selectiva u procedura averta) tenor las reglas unitaras da las disposiziuns da submissiun vertentas. Ins sto però far attent che las relaziuns tar las prestaziuns da servetsch èn savens bler pli cumplitgadas che tar las bleras incumbensas da construcziun u tar las furniziuns publicas e ch'ellas na sa laschan savens betg definir mo cun in index da prestaziun usità, ma ston vegnir circumscrittas cun pretensiuns funcziunalas.

2. Gea, sche questas polissas vegnan desditgas imprevisiblamain curt avant la scadenza ordinaria dal contract (p.ex. tar in cas da donn). In tal cas è numnadamain er gia succedì en moda concreta. Pervi da la stgarsadad da temp n'èsi betg pli stà pussaivel da realisar ina procedura da submissiun formala en il temp restant, uschia che las prestaziuns necessarias han stuì vegnir procuradas excepziunalmain en il rom d'ina procedura directa tenor l'art. 3 lit. e da la Osub cun dumandar offertas da cumparegliaziun.

3. A maun da l'elecziun d'ina procedura na pon ins generalmain en connex cun acquisiziuns publicas betg trair ina conclusiun directa areguard ils potenzials da spargn exacts. L'elecziun da la procedura sto sa drizzar independentamain d'avantatgs e da dischavantatgs ch'existan en il cas singuls unicamain tenor las limitas minimalas legalas. En general pon ins però dir che la concurrenza averta augmentia il squitsch da concurrenza e che uschia dastgian ins spetgar per regla purschidas favuraivlas.
Il potenzial da spargn tar las prestaziuns d'assicuranza è per il mument exaurì. Oz vegnan ils contracts desditgs dals assicuraders en cas da donn per betg assicurar pli tschertas ristgas u per far novs contracts cun premias pli autas che fin qua. Las societads d'assicuranzas pretendan oz en general premias pli autas e restrenschan la dimensiun da garanzia, e quai senza resguardar, sche la surdada è succedida en la procedura averta, en la procedura directa u en la procedura d'invit.

4. Per far e per midar tut ils contracts d'assicuranzas dal chantun è cumpetent il DFM. Cun reglar las cumpetenzas en questa maniera intenziunava la regenza a ses temp da crear concepts d'assicuranza unitars e da cuntanscher in'administraziun pli economica dal portfeuille d'assicuranzas chantunal. Per cuntanscher questas finamiras examinescha ed adatta il DFM sias assicuranzas cuntinuadamain a las relaziuns midadas. En quest connex han ins renunzià sapientivamain ad in cussegliader extern. Cun procurar las assicuranzas tras in broker na pon ins tenor la regenza numnadamain ni augmentar la concurrenza tranter ils assicuraders ni spargnar premias.

Datum: 6 da fanadur 2005