Navigaziun principala

Cuntegn da la pagina

Dumonda Sax concernent la reducziun da las limitas da tonnascha en l'interess da la furniziun / preparaziun da laina per la resgia planisada a Vaz sut

sessiun: 19.04.2005
A chaschun da l'orientaziun a las medias dals 23 da mars 2005 han ils represchentants dal departament da l'intern e da l'economia publica (DIEP) accentuà il grond interess chantunal per la realisaziun d'ina resgia a Vaz sut che po cumpeter sin plaun internaziunal. Questa realisaziun han els resguardà sco ina impurtanta investiziun strategica per cuntanscher in'utilisaziun persistenta da la laina sin noss territori chantunal. Ultra da quai èn vegnidas dadas en il fratemp er autras infurmaziuns als partenaris participads a la chadaina da laina, uschia per exempel er a chaschun da la radunanza generala da la SELVA dals 12 d'avrigl 2005.

Las sutsegnadas ed ils sutsegnads sustegnan las stentas da la regenza. Cun construir la resgia uschè datiers dals guauds sco pussaivel, pon vegnir optimads e minimads ils custs da transport ch'han ina gronda paisa en la chadaina da la valur agiuntada. Per cuntanscher cundiziuns generalas optimalas per pudair metter a disposiziun suffizientamain laina aifer il chantun Grischun, ston vegnir discutadas a l'avis da las sutsegnadas e dals sutsegnads ultra dals transports cun la VR che duain vegnir preferids, er las limitas da tonnascha (cunzunt sin las vias chantunalas, dentant er sin las vias communalas) cun grevas consequenzas per la cultivaziun dal guaud. Savens impedeschan questas limitas da tonnascha particularmain las proprietarias ed ils proprietaris da guaud d'utilisar lur guaud en moda effizienta ed impussibiliteschan per part schizunt la racolta da laina. Pertutgant las quantitads da laina dumandadas da la resgia planisada e messas a disposiziun da las proprietarias e dals proprietaris da guaud signifitgeschan questas limitas da tonnascha ina difficultad supplementara che duai vegnir eliminada tenor pussaivladad en favur d'ina cultivaziun dal guaud effizienta e productiva.

Sin fundament da questa situaziun da partenza per la cultivaziun futura dal guaud e spezialmain per pudair metter a disposiziun suffizientamain laina dal chantun Grischun per la resgia planisada s'imponan las suandantas dumondas che nus supplitgain la regenza da respunder:

1. Vesa er la regenza la problematica surmenziunada dals transports, spezialmain en connex cun la pretensiun da metter a disposiziun suffizientamain laina dals guauds dal chantun Grischun per la resgia planisada a Vaz sut?

2. È la regenza pronta da schluccar u da flexibilisar las limitas da tonnascha (en il senn d'augments da tonnascha limitads temporarmain) en favur da la cultivaziun dal guaud?

3. In basegn d'agir per augmentar las tonnaschas admessas exista tar numerusas vias da colliaziun surtut tar construcziuns artifizialas, mirs da sustegn, e.u.v. È la regenza pronta da metter prioritads per sanar las construcziuns correspundentas en l'interess da la racolta da laina?

4. È la regenza pronta, per pudair metter a disposiziun ina purschida uschè gronda sco pussaivel da laina dal chantun Grischun, d'examinar pussaivladads per pudair conceder permissiuns spezialas er per transports da laina che represchentan da princip grevezzas divisiblas, fin che las sanaziuns da construcziun èn vegnidas fatgas?

Cuira, ils 19 d'avrigl 2005

Name: Sax, Thomann, Montalta, Berther (Mustér), Bühler, Büsser, Capaul, Cavegn, Cavigelli, Demarmels, Dermont, Fallet, Farrér, Fasani, Giacometti, Hess, Jenny, Kessler, Kleis-Kümin, Koch, Maissen, Michel, Parpan, Pfister, Portner, Schmid, Stoffel, Tomaschett, Tuor, Zanolari, Zegg, Buchli, Campell, Florin-Caluori, Foffa, Hartmann, Nay

Session: 19.04.2005
Vorstoss: rg Anfrage


Resposta da la regenza

1. A la regenza è la problematica menziunada dals transports enconuschenta ed ella è conscienta ch'ina gronda part da la rait da vias chantunalas e communalas na po betg cuntentar tut ils basegns en quai che reguarda sia amplificaziun e sia capacitad da purtar. Spezialmain las limitas da tonnascha e da ladezza han grondas consequenzas sin tut ils secturs economics chantunals.

2. La regenza è pronta d'examinar uschenavant sco pussaivel l'augment da las paisas totalas e l'admissiun da vehichels da 2.55 m ladezza. Sche las limitas da paisa e da ladezza existentas èn necessarias sto vegnir analisà en il singul cas. Ellas ston en mintga cas vegnir determinadas là, nua che quai è necessari per motivs da la segirezza dal traffic u pervia da la capacitad da purtar existenta da las construcziuns artifizialas u dal corpus da la via. In'amplificaziun da questas vias per limitas da paisa pli autas vegn ad esser pussaivla mo en etappas e mo en moda restrenschida, e quai pervia dal vast territori cumpiglià e pervia da las resursas finanzialas limitadas. Numerusas vias da colliaziun chantunalas na vegnan er en il futur betg a pudair vegnir amplifitgadas uschia, ch'ellas èn charrablas per camiuns da 40 resp. da 44 tonnas.

3. Guaud datti en tut las regiuns da noss chantun da muntogna e la rait da vias n'è per gronda part betg charrabla per camiuns da 40 resp. da 44 tonnas, per part schizunt gnanc per vehichels da 28 tonnas. Er sch'i vegn desistì totalmain da construcziuns novas che giessan a quint da l'amplificaziun da las vias da colliaziun e da las vias principalas, èsi pussaivel da renovar e da rinforzar la rait da vias chantunalas per chargias pli grondas sin il pli a lunga vista. Ina singula axa da camiun strapatscha e fa donn al corpus da la via tuttina ferm sco circa 15'000 autos da persunas. Chargias d'axa pli grondas chaschunan, sche las vias èn amplifitgadas insuffizientamain, donns pli e pli grevs e pia er custs da mantegniment pli e pli gronds.

La regenza è pronta d'augmentar ils meds per il mantegniment architectonic e per meglierar la capacitad da purtar da las vias chantunalas. Quai va a favur da tut ils secturs economics. Or da vista finanziala è quai dentant mo pussaivel a cust da projects per construcziuns novas che vegnan gia da ditg pretendids, ma ch'èn er actuals en la construcziun da vias principalas e da vias da colliaziun.

4. Sut tge premissas ch'i dastgan vegnir dadas permissiuns spezialas, regla il dretg federal (art. 80 al. 1 lit. b ORT; CS 741.11). Excepziuns da las mesiras e da las paisas maximalas legalas èn admessas mo per il transport d'ina rauba indivisibla, sche las prescripziuns decisivas na pon betg vegnir observadas malgrà il diever da vehichels adattads. En connex cun il transport da laina sa tracti da princip d'ina chargia divisibla. Ultra da quai pon ils transports vegnir fatgs er cun auters vehichels adattads cun damain chargia utilisabla u cun autras mesiras da vehichel, en moda ch'i vegnan mess cunfins a la concessiun da permissiuns spezialas er per motivs dal tractament egual. Mo per ponderaziuns da rentabilitad na dastgan vegnir dadas naginas permissiuns spezialas.

Datum: 6 da fanadur 2005