Navigaziun principala

Cuntegn da la pagina

Incumbensa Casty concernent la reactivaziun dal project "colliaziun da la via dal Güglia e dal Scanvetg cun ina punt auta sur la Plessur a Maladers"

sessiun: 19.04.2005
Situaziun da partenza

Planisaziuns voluminusas per schlargiar la via d'Arosa davent da l'Obertor sur la curt Haldenhüttli fin a Maladers èn en elavuraziun. Per schlargiar la via dal Scanvetg existenta a la ladezza ch'è necessaria ozendi, fan da basegn intervenziuns architectonicas massivas e construcziuns artifizialas. Plinavant èn necessarias mesiras architectonicas cun gronds custs per segirar il traject Haldenhüttli Maladers cunter la crudada da crappa.

Il traffic sin la via dal Scanvetg è ina ristga da segirezza per 1200 scolaras e scolars da la scola chantunala ch'èn mintga di per via a pe.

Tut questas lavurs previsas per sanar la via dal Scanvetg custan bler ed il mantegniment vegn a chaschunar vinavant gronds custs e blera lavur en quest terren instabil. Er il maletg da la citad ch'è sensibel areguard l'urbanistica vegn disturbà.

Ils onns 1973 e 1974 è vegnì debattà detagliadamain en il cussegl grond davart il schlargiament da la via dal Scanvetg existenta e davart la construcziun d'ina punt auta sur la Plessur davent da la storta d'Araschgen fin a Maladers. L'access dal Scanvetg sur la A13, sortida sid da Cuira, e sur ina punt auta a Maladers è vegnì resguardà sco la meglra soluziun e sia realisaziun è vegnida concludida ils 21 da favrer 1974 en il cussegl grond cun 70 cunter 13 vuschs.

Incumbensa a la regenza:

Il project per amplifitgar la via dal Scanvetg cun ina punt auta sur la Plessur sco colliaziun tranter la via dal Scanvetg e la via dal Güglia tenor il conclus dal cussegl grond dals 21 da favrer 1974 sto vegnir reactivà. Il project duai vegnir examinà sut ils suandants criteris en cumparegliaziun cun ils engrondiments planisads da la via dal Scanvetg existenta sur la curt:

- consequenzas per il traffic urban en la citad da Cuira
- segirezza sin la via dal Scanvetg (crudada da crappa sin il traject da Cuira a Maladers)
- segirezza per 1200 scolaras e scolars da la scola chantunala (colliaziun da las chasas da scola)
- consequenzas per il maletg sensibel da la citad da Cuira en il sectur da la sedia episcopala (curt e vignas fin Haldenhüttli)
- persistenza
- custs

Cuira, ils 19 d'avrigl 2005

Name: Casty, Beck, Jenny, Augustin, Bär, Berther (Mustér), Berther (Sedrun), Bleiker, Brunold, Büsser, Butzerin, Cavegn, Caviezel-Sutter (Tusaun), Cavigelli, Christ, Christoffel, Claus, Crapp, Demarmels, Dudli, Fallet, Farrér, Fleischhauer, Giacometti, Göpfert, Gredig, Hardegger, Heinz, Hess, Hübscher, Jaag, Jäger, Janom Steiner, Jeker, Kessler, Koch, Krättli-Lori, Lemm, Luzio, Maissen, Mani-Heldstab, Märchy-Michel, Marti, Montalta, Noi, Parolini, Parpan, Pedrini, Perl, Portner, Sax, Stiffler, Telli, Tremp, Trepp, Tuor, Vetsch, Wettstein, Zegg, Zindel, Bezzola, Campell, Foffa, Gubelmann, Pool

Session: 19.04.2005
Vorstoss: rg Auftrag


Resposta da la regenza

Las mancanzas sin la via dal Scanvetg entaifer la citad da l'Obertor fin a Maladers che vegnan fatgas valair da las sutsegnadras e dals sutsegnaders constattan per gronda part. Las relaziuns ed ils entretschaments multifars tranter la via ed ils binaris ma er tranter il traffic motorisà ed il traffic betg motorisà restrenschan la segirezza dal traffic da las utilisadras e dals utilisaders da la via. Diversas adattaziuns architectonicas pitschnas sco la renovaziun ed il schlargiament da l'indriz da passape existent u ils allontanaments da grip ch'èn vegnids prendids en vista per engrondir la ladezza dal vial en il sectur da la scola auta teologica fin al cunfin da la citad na permettan nagin entardament.

La punt auta sur la Plessur davent da la storta d'Araschgen fin a Maladers che vegn menziunada en l'intervenziun e ch'è gia vegnida examinada en il passà distgargiass senza dubi considerablamain il territori da la citad dal traffic da transit. Cun reducir la quantitad dal traffic vegniss mitigiada la situaziun da traffic problematica.

Per la regenza è la punt auta sur la Plessur ina varianta degna da vegnir examinada a lunga vista sco alternativa tar il schlargiament da la via dal Scanvetg en il sectur da la citad. Ils documents che stattan actualmain a disposiziun na permettan dentant nagina cumparegliaziun significativa davart la realisabladad, davart ils effects e davart ils custs.
La regenza è pia pronta d'acceptar l'incumbensa e d'incaricar l'uffizi da construcziun bassa d'elavurar in studi da realisabladad e da cumparegliaziun.

Datum: 6 da fanadur 2005