Navigaziun principala

Cuntegn da la pagina

Incumbensa da fracziun Hanimann concernent in sistem fiscal simpel per il Grischun

sessiun: 15.06.2005
Per las burgaisas e per ils burgais è il sistem fiscal actual cumplitgà e simpel per far abus. Dal puntg da vista economic blochescha el prestaziuns, promova l'economia illegala ed impedescha la creschientscha, perquai ch'el retegna investiziuns ed il consum. La tschungla da deducziuns ch'è sa sviluppada en il decurs dals decennis sugerescha ina pseudogiustia. Bleras burgaisas e blers burgais èn surdumandads cun emplenir la decleraziun da taglia. La controlla chaschuna lavur e custs birocratics sproporziunads tar las persunas obligadas da pajar taglia, tar las interpresas e tar il stadi. Il turissem fiscal en intginas vischnancas da la Svizra centrala è fitg dischavantagius per il chantun Grischun. Cun taglias assimiladas a quellas dal rest da la Svizra (armonisaziun da taglia) e cun abolir la taglia chantunala sin l'ierta fiss noss chantun fitg attractiv per persunas svizras ed estras bainstantas.

La regenza dal chantun Grischun ha empermess da suttametter in "urden da preschentaziun" da las taglias. Nus spetgain dal sistem fiscal chantunal futur ch'el rendia bler pli attractiv il chantun Grischun sco lieu per persunas privatas fiscalmain fermas sco er per interpresas. In tal sistem fiscal sto esser simpel e transparent. Per quest intent basegni ina renovaziun totala dal sistem fiscal. Revisiuns parzialas portan pauc. Perquai spetgain nus da la regenza ch'ella examineschia er novs concepts e vairas renovaziuns fiscalas.

Nus spetgain da la regenza propostas per simplifitgar considerablamain ils sistems fiscals. In sistem fiscal simpel che vegn discutà bler è la FLAT TAX. Ella abolescha la progressiun fiscala. La giustia fiscala vegn cuntanschida cun in import liber da taglia relativamain aut. Cun ina tariffa uschè unitara sco pussaivel vegn taxà il cashflow tar las interpresas ed il salari tar las persunas privatas. Deducziuns datti mo per il stadi civil e per il dumber d'uffants. Tut las indicaziuns da las persunas obligadas da pajar taglia duain avair plazza sin ina carta postala. La taxaziun da tschains e d'auters retgavs da facultad scada. Uschia vegn er abolida l'imposiziun dubla da taglia sin retgavs dal chapital. La FLAT TAX è in sistem che sa basa sin il consum. Ella ha in effect fitg neutral ed è ordvart transparenta. Decisiuns d'investiziun e da finanziaziun na vegnan betg influenzadas da la taglia. Il sistem pudess dar impuls da creschientscha enorms a l'economia. Ils chantuns Soloturn ed Argovia han inoltrà ina iniziativa dals chantuns per introducir la FLAT TAX. En cas ch'il sistem vegniss valità a moda positiva duess il chantun Grischun far il medem. Sin plaun chantunal pudess vegnir introducida sco alternativa ina FLAT RATE TAX (tariffa da taglia proporziunala).

In'autra proposta per augmentar l'attractivitad dal lieu da noss chantun pudess esser la TAGLIA DUBLA SIN LAS ENTRADAS. En quest connex vegn applitgada la tariffa progressiva da taglia sin las entradas mo anc per las entradas da lavur. Las entradas dal chapital vegnan taxadas cun ina tariffa proporziunala.

En sia vista generala da la taglia intimain nus la regenza d'examinar sistems fiscals pli simpels. Ultra d'autras propostas duain vegnir giuditgadas las consequenzas che la FLAT TAX, inclusiv sutvariantas e la TAGLIA DUBLA SIN LAS ENTRADAS, ha per noss chantun. En cas ch'in sistem fiscal vegn valità a moda positiva, duai quest vegnir realisà en il chantun, u duai vegnir inoltrada ina iniziativa correspundenta dals chantuns tar la confederaziun.

En la vista generala previsa per il sistem fiscal futur duai cunzunt vegnir dà pais a propostas innovativas che rendan il chantun Grischun pli attractiv dal puntg da vista fiscal sco lieu d'abitadi e sco lieu economic.

Cuira, ils 15 da zercladur 2005

Name: Hanimann, Bachmann, Bär, Barandun, Bühler-Flury, Caviezel (Pitasch), Christ, Claus, Feltscher, Giacometti, Hartmann (Champfèr), Hess, Jenny, Joos-Buchli, Kessler, Krättli-Lori, Marti, Meyer-Grass (Claustra), Mengotti, Michel, Perl, Rizzi, Robustelli, Telli, Thomann, Tramèr, Wettstein, Gunzinger, Hartmann (Cuira), Janett, Kunz, Waidacher

Session: 15.06.2005
Vorstoss: rg Auftrag


Resposta da la regenza

En las respostas da differentas intervenziuns parlamentaras ha la regenza explitgà ch'ella vegnia a suttametter al cussegl grond in rapport davart las opziuns d'agir en il dretg fiscal. Quest rapport è vegnì tractà e deliberà da la regenza en la sesida dals 28 da 2005 zercladur.

Cun resguardar las pretensiuns da l'incumbensa Hanimann fiss la realisaziun da quest rapport vegnida retardada considerablamain ed il rapport na pudess probablamain betg vegnir tractà en la sessiun da december. La regenza è stada dal cler avis ch'il basegn d'agir en il dretg fiscal saja urgent areguard il temp e che novas pretensiuns e che novs giavischs na possian betg vegnir integrads en questa fatschenta.

En il dretg federal vertent mettan la constituziun e la lescha d'armonisaziun da taglia terms stretgs als chantuns per la concepziun da la lescha chantunala da taglia. Ni ina flat tax ni in sistem da taglia dubla sin las entradas na chattan ina plazza en quest rom. Ultra da quai n'èn simplificaziuns da la lescha da taglia sin plaun chantunal strusch raschunaivlas, perquai che mo ina midada da lescha tar la confederaziun e tar il chantun po purtar ina simplificaziun effectiva. Regulaziuns differentas tar la confederaziun e tar il chantun chaschunassan ulteriuras cumplicaziuns dal sistem e cuntraschessan a moda diametrala a las finamiras da l'incumbensa.

Sin plaun federal vegnan actualmain discutadas diversas midadas dal sistem fiscal vertent. Ina represchentanza da la conferenza da las directuras e dals directurs chantunals da finanzas cooperescha en quest connex en differentas gruppas da lavur. Las discussiuns correspundentas tutgan al champ da cumpetenza dal parlament federal. A la regenza na pari betg raschunaivel d'intervegnir en questas discussiuns cun ina iniziativa dals chantuns, damai ch'ils problems èn enconuschents e cunquai ch'igl èn gia vegnidas inoltradas duas iniziativas dals chantuns.

Suenter ch'il rapport davart la revisiun parziala da la lescha da taglia è vegnì deliberà da la regenza, po l'incumbensa qua avant maun vegnir stritgada pervi da mancanza d'object.

Datum: 13 da fanadur 2005