Navigaziun principala

Cuntegn da la pagina

Dumonda Augustin concernent il cumportament da l'uniun grischuna d'art en ils dus cas ch'èn vegnids crititgads en la gasetta dal di "La Quotidiana" (ediziun da mesemna, ils 13 da zercladur 2005)

sessiun: 16.06.2005
Tenor l'art. 1 da la lescha chantunala per promover la cultura promova il chantun en il rom da sia cumpetenza la vita culturala dal Grischun e resguarda uschia la diversitad culturala e linguistica da las differentas regiuns e gruppas da la populaziun. El porta ils custs per la construcziun e per il manaschi dal museum d'art dal Grischun (art. 5 al. 2 da la lescha numnada). Quai demussa ch'i sa tracta tar quest museum d'in manaschi che stat en l'interess public. Perquai ademplescha l'uniun grischuna d'art che organisescha l'exposiziun en il museum numnà qua survart ina incumbensa publica ed ins po spetgar ch'ella sa cumportia er uschia. Latiers tutga er ch'ella motivescha sias decisiuns, numnadamain en quels cas, cura ch'ins po spetgar ina tala motivaziun en vista a las circumstanzas e ch'ella fetschia quai tenor ils princips da buna fai e tenor las normas d'ina demananza curtaschaivla. Questa obligaziun da cumportament evidenta vala spezialmain là, nua ch'i na dependa betg mo dals interss d'ina singula petenta u d'in singul petent, mabain dals interess da gruppas da la populaziun culturalas e linguisticas da noss chantun. Guardà da quest puntg da vista è il cumportament da la suprastanza da l'uniun grischuna d'art en ils cas crititgads inacceptabel ed ans intimescha da far questa dumonda a la regenza per savair, sch'ella accepta in tal agir u sche e tge ch'ella ha decidì da far encunter.

Cuira, ils 16 da zercladur 2005

Name: Augustin, Arquint, Keller, Berther (Mustér), Berther (Sedrun), Capaul, Caviezel (Pitasch), Fasani, Giacometti, Mengotti, Noi, Quinter, Righetti, Darms, Gunzinger, Janett, Monigatti

Session: 16.06.2005
Vorstoss: rg Anfrage


Resposta da la regenza

Ils 5 d'avrigl ha fatg dr. Giovanni Maranta en in fax la dumonda, sch'el haja ina "schanza reala" che sias "ovras vegnan exponidas en il museum d'art dal Grischun e cura ch'el po far quint cun ina tala". La dumonda steva en connex cun ina monografia en furma da cudesch davart la pictura da Giovanni Maranta, a la quala la chasa editura Huber da Frauenfeld saja interessada. Questa monografia pudess dentant vegnir realisada mo en connex cun "ina occurrenza correspundenta, sco per exempel cun in'exposiziun". Gia ils 7 d'avrigl 2005 ha la suprastanza da l'uniun grischuna d'art tractà la dumonda, è dentant vegnida a la conclusiun "da batg cuntinuar cun quest project e da renunziar da far in'exposiziun correspundenta" (brev dals 8 d'avrigl 2005 a dr. Maranta). Igl è a tuttavia usit tar l'uniun grischuna d'art da betg motivar la communicaziun directa da talas decisiuns. Igl è evident ch'i sa tracta qua da motivs che stattan en connex u cun la qualitad artistica u cun la mancanza d'urgenza da l'ovra; talas motivaziuns delicatas communitgescha l'uniun grischuna d'art a las persunas pertutgadas pli gugent en in discurs persunal.

In tal discurs cun il petent è daventà obsolet, perquai che dr. Maranta è suenter la decisiun negativa sa dispità al telefon plain temperament cun la presidenta da l'uniun grischuna d'art. Ils 11 d'avrigl ha scrit dr. Giovanni Maranta al DECA, a la lia rumantscha ed a la pro Grigioni italiano ed è sa lamentà da "la refusa nunspetgada sco er davart l'impediment dal dialog intercultural". En sia resposta ha cusseglier guvernativ Claudio Lardi menziunà ils 19 d'avrigl 2005 che l'uniun grischuna d'art decidia independentamain da las instanzas politicas e ch'i "fetschia donn a la libertad ed a la qualitad artistica, sche la regenza u l'administraziun 'politiseschan' davart questa libertad".

Ils 22 d'avrigl 2005 ha dr. Giovanni Maranta inoltrà ina segunda dumonda a l'uniun grischuna d'art. Questa giada preveseva il concept da preschentar la pictura da Giovanni Maranta ensemen cun poesias da Luisa Famos (translatadas dad el) sco er cun in program musical accumpagnant. En ina sesida extraordinaria ha la suprastanza da l'uniun grischuna d'art decidì il 1. da zercladur 2005: "Malgrà che signur dr. G. Maranta emprova cun squitsch da cuntanscher che sias lavurs vegnian exponidas en il museum d'art dal Grischun, refusa la suprastanza er ussa definitivamain questa dumonda" (extract dal protocol). L'uniun grischuna d'art constatescha che questa refusa n'haja absolutamain nagin connex cun negligir la diversitad culturala e linguistica da las differentas regiuns e gruppas da la populaziun dal Grischun che vegn adina puspè appreziada da l'uniun grischuna d'art.

La regenza è da l'opiniun ch'i n'existia en il cas concret nagin motiv per iniziar mesiras spezialas cunter l'uniun grischuna d'art. Ella chatta dentant impurtant ch'i vegnian resguardads pli savens artistas ed artists dal Grischun tar la concepziun d'exposiziuns.

Datum: 9 da settember 2005