Navigaziun principala

Cuntegn da la pagina

Incumbensa Dudli concernent arder rument da la Germania dal sid / da Turitg en il SAR da Trimmis

sessiun: 16.06.2005
La suprastanza da la CVARG vul surprender da l'uniun turitgaisa per arder rument (UTR) ils proxims onns annualmain 20'000 tonnas rument che deriva da la Germania dal sid, ed ella vul arder quest rument per 20 francs damain che la taxa uffiziala da la CVARG. Il transport duai succeder sin la via cun agid da camiuns.

Las consequenzas fissan ulteriuras immissiuns che na dastgan betg er anc vegnir adossadas a la populaziun en la Val dal Rain grischuna dapi che cunzunt il traffic da camiuns è s'augmentà fitg sin la A13.

Las sutsegnadras ed ils sutsegnaders supplitgeschan la regenza da far tut quai ch'ella po per scumandar da dismetter rument da l'exteriur en il stabiliment per arder rument (SAR) da Trimmis.

Cuira, ils 16 da zercladur 2005

Name: Dudli, Portner, Pfiffner, Baselgia-Brunner, Bleiker, Brüesch, Büsser, Butzerin, Casty, Caviezel-Sutter (Tusaun), Christ, Christoffel-Casty, Crapp, Fleischhauer, Frigg, Göpfert, Gredig, Hardegger, Heinz, Hübscher, Jaag, Jäger, Jeker, Jenny, Kleis-Kümin, Koch, Krättli-Lori, Lemm, Loepfe, Mani-Heldstab, Märchy-Michel, Meyer Persili (Cuira), Mengotti, Michel, Montalta, Nigg, Parolini, Parpan, Pedrini, Peyer, Pfenninger, Pfister, Ratti, Righetti, Schmid, Schütz, Stiffler, Stoffel, Trepp, Tscholl, Zanetti, Zarn, Zindel, Brasser, Campell, Caviezel (Cuira), Gartmann Jecklin-Jegen, Kunz, Mainetti, Nay

Session: 16.06.2005
Vorstoss: rg Auftrag


Resposta da la regenza

La radunanza da delegadas e da delegads da la CVARG ha approvà ils 10 d'avrigl 2002 il project per ina pigna supplementara en il SAR da Trimmis cun ina capacitad da var 65'000 t/onn. La pigna veglia duess restar en funcziun ad interim per dismetter ils surplis da rument sco er per la duvrar durant las lavurs da mantegniment vi da la pigna nova. Per l'implant è vegnida fatga in'examinaziun ecologica (EE). En il rom da questa EE è vegnida analisada er la grevezza per l'ambient tras il manaschi parallel da la pigna supplementara e da la pigna veglia durant maximalmain 2'000 uras per onn; quest temp da manaschi correspunda ad ina dismessa da circa 11'000 t rument per onn. Sin questa basa ha la vischnanca da Trimmis concedì ils 3 da december 2002 (communitgà ils 15 d'avrigl 2003) la permissiun da construcziun per la pigna supplementara. En il fratemp è questa pigna vegnida construida ed è uss en funcziun.

Stabiliments per arder rument basegnan tenor l'art. 43 da la lescha chantunala davart la protecziun da l'ambient (LCPAmb) dals 2 da december 2001 ina permissiun da manaschi da l'uffizi per la natira e l'ambient (UNA). Ils 24 da zercladur 2005 ha il UNA concedì ina permissiun provisoria per il manaschi dal SAR e quai per la dismessa da en tut maximalmain 76'000 t/onn (pigna supplementara: capacitad ca. 65'000 t/onn; pigna veglia: en manaschi parallel 11'000 t/onn, sco reserva en cas d'ina interrupziun da la pigna supplementara). Questa permissiun prevesa tranter auter, ch'il fatg d'acceptar rument d'ordaifer il chantun per al dismetter, basegna ordavant il consentiment dal UNA.

Da l'intschess dal SAR da Trimmis, dal territori da la CVARG, da la CRGC e da la PEB resultan per onn main che 50'000 t rument combustibel. La capacitad dal SAR na vegn pia actualmain betg exaurida. Ils 20 da matg 2005 ha la CVARG perquai fatg la dumonda ch'il UNA consenteschia d'acceptar maximalmain 20'000 t rument per onn da la Germania dal sid durant stgars dus onns e mez (ev. trais onns e mez). Il rument duaja vegnir transportà en camiuns a Trimmis. Ils 27 da zercladur 2005 ha il UNA dà il consentiment per l'import. Questa disposiziun entra en vigur pir cur ch'il consentiment dal UFAGC per l'import è avant maun (notificaziun). En la disposiziun da consentiment è la CVARG vegnida obligada sin fundament da l'art. 34 LCPAmb da surpigliar, en ina dimensiun restrenschida, ils eventuals custs supplementars che resultassan dal transport cun la viafier, sch'il chantun reussiss d'organisar ina soluziun a transport per viafier. L'art. 34 LCPAmb prevesa ch'il transport dals ruments chasans sur distanzas pli lungas duai vegnir fatg per viafier, sche quai è economic e sche l'ambient vegn tras quai engrevgià main che cun transportar cun auters meds da transport.

Uschia resulta il suandant:

- Tenor la permissiun da manaschi dal UNA è permessa en il SAR da Trimmis la dismessa da maximalmain 76'000 t rument per onn. Sche questa restricziun da la quantitad vegn observada, na pon ins betg scumandar a la CVARG d'arder rument d'ordaifer il chantun resp. da l'exteriur. Il dretg chantunal vertent na cuntegna numnadamain nagina basa legala per in tal scumond.

- La basa legala na permetta en spezial betg da scumandar l'import da rument, mo perquai ch'il rument vegn transportà en camiuns empè da per viafier.

- Pervi da la legislaziun chantunala vertenta n'è la regenza betg cumpetenta da "scumandar da dismetter rument da l'exteriur en il SAR da Trimmis".

Per che la dismessa da rument da l'exteriur en il SAR da Trimmis possia vegnir scumandada, sto vegnir midada ordavant la lescha chantunala davart la protecziun da l'ambient. Pervi da quest cas singul limità temporarmain na pari betg d'esser commensurà a la regenza d'instradar ina tala revisiun da la lescha. En cas d'ina adattaziun futura da la lescha davart la protecziun da l'ambient duai questa dumonda vegnir examinada detagliadamain en spezial la dumonda davart l'obligaziun da transportar a lunga distanza il rument per viafier. Sin basa da questas ponderaziuns propona la regenza al cussegl grond d'acceptar l'incumbensa.

Datum: 9 da settember 2005