Navigaziun principala

Cuntegn da la pagina

Incumbensa Jäger concernent la revisiun da la lescha da scola (francaziun da direcziuns da scola)

sessiun: 16.06.2005
En la resposta a l'interpellaziun Pfiffner, inoltrada en la sessiun da mars 2003, concernent l'installaziun da direcziuns da scola ha scrit la regenza tranter auter: "L'impurtanza da direcziuns da scola è s'augmentada considerablamain ils ultims onns. Cunzunt scolas pli grondas èn adina dapli dependentas d'ina atgna direcziun per accumplir lur incumbensas multifarias. Ma er scolas d'ina dimensiun pli pitschna u mesauna tschertgan pussaivladads per surdar lur incumbensas administrativas e pedagogicas per part cuminaivlas a direcziuns professiunalas da scola". Il chantun aveva perquai organisà l'onn 2001 dus curs da scolaziun per manadras e per manaders da scola.

Las experientschas cun manadras u cun manaders da scola èn en Svizra sco er en auters pajais evidentamain tras e tras positivas. Studis han mussà che direcziuns da scola èn in factur decisiv per segirar la qualitad. I n'è perquai betg ina casualitad ch'ils pajais ch'èn a la testa dals studis PISA disponan da direcziuns da scola cun cumpetenzas extendidas. Adina dapli chantuns han perquai francà definitivamain durant ils ultims onns la pussaivladad da direcziuns da scola en lur leschas da scola. Tranter auter ha il chantun Son Gagl prescrit obligatoriamain a las vischnancas d'engaschar manadras e manaders da scola.

En la missiva nr. 2/2003-2004 concernent l'examinaziun da las structuras e da las prestaziuns per sanar las finanzas dal chantun ha la regenza proponì sco mesira E 201 da renunziar da pajar contribuziuns a las vischnancas per indemnisar manadras u manaders da scola. En la sessiun d'avust 2003 ha il cussegl grond acceptà questa mesira senza discussiun. La revisiun da l'ordinaziun per la salarisaziun da persunas d'instrucziun entra consequentamain en vigur il proxim temp senza l'indemnisaziun correspundenta.

La lescha chantunala vertenta parta en il chapitel VI. "Autoritads, organs da surveglianza e cumissiuns" (art. 39 ss.) anc adina da la situaziun da scola oriunda, tenor la quala unicamain las autoritads da laics elegidas (cussegls da scola) èn per regla responsablas per l'organisaziun da las scolas. Damai che adina dapli vischnancas en il Grischun han installà ils ultims onns direcziuns da scola en differentas manieras, correspunda il text vertent da la lescha adina pli pauc a la realitad actuala. Quai dat adina puspè difficultads. Il medem mument èsi er nuncuntentaivel, sche mintga vischnanca da scola sto sviluppar per sasezza atgnas soluziuns, perquai ch'i manca tranter auter la basa chantunala u las directivas chantunalas. Er sche la situaziun en las singulas vischnancas è tuttavia differenta, fissan tscherts standards minimals unitars da grond avantatg per tut las persunas pertutgadas.

La regenza vegn envidada da far al cussegl grond in rapport ed ina proposta per la revisiun da la lescha da scola, en la quala vegnan relaschadas disposiziuns legalas minimalas per la funcziun da las direcziuns da scola, che fixeschan tranter auter ina repartiziun unitara da las incumbensas tranter las autoritads communalas da scola, tranter las direcziuns da scola e tranter l'inspecturat chantunal da scola. Ultra da quai duain vegnir elavuradas fin che las disposiziuns legalas respectivas entran en vigur determinaziuns che cuntegnan tranter auter directivas che recumondan a las vischnancas, co che la repartiziun da las incumbensas duai vegnir fatga. Cun stimuls finanzials intenziunads pudess ins cuntanscher ultra da quai che vischnancas pli pitschnas furman sulettas u en colliaziun cun plirs purtdaders da scola atgnas direcziuns da scola.

Cuira, ils 16 da zercladur 2005

Name: Jäger, Caviezel (Tusaun), Michel, Arquint, Augustin, Baselgia-Brunner, Berther (Mustér), Berther (Sedrun), Bucher, Butzerin, Casty, Christ, Claus, Demarmels, Dermont, Feltscher, Frigg, Jaag, Jenny, Keller, Kessler, Koch, Krättli, Mani-Heldstab, Märchy-Michel, Marti, Meyer-Grass (Claustra), Meyer Persili (Cuira), Mengotti, Noi, Perl, Peyer, Pfenninger, Pfiffner, Pfister, Portner, Ratti, Robustelli, Schütz, Tremp, Trepp, Tuor, Wettstein, Zindel, Brasser, Caviezel (Cuira), Darms, Gartmann, Janett, Mainetti, Monigatti, Nay

Session: 16.06.2005
Vorstoss: rg Auftrag


Resposta da la regenza

Las incumbensas multifaras che vegnan ozendi delegadas a las singulas unitads da scola areguard l'organisaziun e la pedagogia pon far difficultads a las autoritads da scola laicas, sch'ellas n'enconuschan betg bain avunda las relaziuns ed il cuntegn da la realitada da scola cur ch'i sa tracta da schliar in problem. Scolas che vegnan dirigidas cun in profil e cun ina incumbensa clera èn sche la direcziun ha las qualificaziuns correspundentas capavlas da tractar e schliar problems en moda professiunala.

Per scolas professiunalas, per scolas medias, per scolas autas sco er per scolas spezialas s'enclegia gia daditg da sasez ch'ellas han ina direcziun. Er en las scolas popularas sa profileschan pli e pli scolas cun direcziun. Scolas cun ina buna direcziun uschia argumenteschan spezialistas e spezialists e quai cumprovan er ils rapports da la pratica contribueschan ad ina meglieraziun da la qualitad da la scola. Direcziuns da scola vegnan pratitgadas ozendi almain parzialmain en tut ils chantuns; ellas correspundan en l'Europa centrala per gronda part al standard da scola. Tant l'organisaziun da tetg da la magistraglia dal Grischun (MGR) sco er l'associaziun dals cussegls da scola dal Grischun (ACSG) han l'ultim temp exprimì mintgamai en ina posiziun en scrit al departament, che l'introducziun da direcziuns da scola en il sectur da la scola populara fiss fitg giavischada or dal puntg da vista objectiv ed organisatori.
La regenza ha medemamain percurschì baud ils avantatgs da scolas cun direcziun ed ha er lantschà perquai en il Grischunen dus studis correspundents en la scola auta professiunala da pedagogia.

Er la lescha da scola pussibilitescha da stgaffir scolas cun direcziun. La regenza aveva previs a ses temp en il rom da la revisiun da l'ordinaziun davart la salarisaziun da las persunas d'instrucziun da sustegnair er finanzialmain direcziuns da scola en ina furma adequata.
La situaziun finanziala dal chantun ha dentant sfurzà la regenza ed il cussegl grond en il rom da l'examinaziun da las structuras e da las prestaziuns per sanar las finanzas dal chantun l'onn 2003 da renunziar ad in sustegn finanzial per direcziuns da scola. Damai che la basa legala n'impedescha betg da stgaffir direcziuns da scola en il sectur da la scola populara hai parì giustifitgà da betg sustegnair talas explicitamain cun finanzas, sco tar autras mesiras da spargn dolurusas e radicalas cumparegliablas.

En il program da la regenza 20052008 èn vegnids suttamess al cussegl grond per prender enconuschientscha tranter auter ils trais puncts centrals da svilup cun il titel "simplifitgar ils cuntegns dapli profunditad che vastadad", "promover l'integraziun" sco er "adattar las prescripziuns formalas a la maioritad dals chantuns". En il rom da l'elavuraziun da quests puncts centrals ha la regenza l'intenziun d'examinar tant la dumonda da stgaffir direcziuns da scola sco er ils intents menziunads en l'incumbensa en connex cun talas e da cumenzar a far las adattaziuns legalas correspundentas nua ch'i fa da basegn. Per betg anticipar il resultat da questa examinaziun e per resguardar l'orizont dal temp dal program current da la regenza ston vegnir er renunzià ad elavurar recumandaziuns.

La regenza è pronta d'acceptar e da realisar l'incumbensa en il senn da las ponderaziuns qua survart.

Datum: 2 da settember 2005