Navigation

Inhaltsbereich

Sessiun: 17.06.2005
Cun l'introducziun da las emnas dals curs da stad per la magistraglia è vegnida stgaffida l'onn 1978 ina purschida da curs cun las suandantas finamiras:

- stgaffir in accent en il perfecziunament da persunas d'instrucziun dal Grischun
- crear ina purschida per curs pli lungs, q.v.d. per curs da bloc che duran plirs dis
- stgaffir la pussaivladad per barattar experientschas e per tgirar la collegialitad tranter persunas d'instrucziun da differents stgalims da scola da tut las regiuns.

Questas finamiras èn alura vegnidas ademplidas abundantamain. Las emnas dals curs da stad èn sa sviluppadas fin l'onn 2003 ad in accent marcant cun in effect sin tut l'onn da perfecziunament. Ils emprims curs da stad èn vegnids frequentads da 64 persunas d'instrucziun. L'onn 2003 eran quai 630 persunas d'instrucziun che han frequentà in da quels curs. Quest dumber da participantas e da participants mussa che passa in terz da las persunas d'instrucziun da la scola populara dal chantun Grischun ha frequentà facultativamain in curs da stad.
Pervi da las novas cundiziuns da basa finanzialas hai dà la stad 2004 in regress drastic cun ina diminuziun da las annunzias a 320. L'onn 2003 èn vegnids purschids en tut 191 curs da perfecziunament voluntars durant l'entir onn. 133 curs han pudì vegnir realisads. Quai correspunda ad ina part da 70% da la purschida. Pervi da las mesiras da spargn èn anc vegnids publitgads 135 curs l'onn 2004; pervi da la mancanza d'annunzias han però pudì vegnir realisads mo anc 68 (50.3%) da quels.

En noss chantun datti purtaders da scola che surpiglian cumplainamain ils custs da curs per lur persunas d'instrucziun, auters purtaders fan quai per part ed anc auters fan quai sche insumma mo en in rom fitg modest. La consequenza da quai è che las persunas d'instrucziun da noss chantun ston pajar atgnas contribuziuns ch'èn fitg differentas per ils medems curs.

Ussa sa tschentan las suandantas dumondas:

1. È la regenza er da l'avis da las interpellantas e dals interpellants ch'il perfecziunament è ina part essenziala da la qualitad da la scola?

2. Co giuditgescha la regenza il regress dramatic dal dumber da las participantas e dals participants dals curs da perfecziunament voluntars per persunas d'instrucziun da la scola populara?

3. È la regenza er da l'avis ch'il chantun che ha la surveglianza suprema da la scola populara haja da fixar las cundiziuns da basa finanzialas uschia che tut las persunas d'instrucziun da noss chantun han las medemas cundiziuns concernent la frequentaziun da curs da perfecziunament voluntars.

4. Po la regenza s'imaginar da puspè s'engaschar finanzialmain pli fitg per il perfecziunament voluntar da persunas d'instrucziun?

Cuira, ils 17 da zercladur 2005

Name: Butzerin, Baselgia-Brunner, Brüesch, Arquint, Bucher, Casty, Caviezel (Pitasch), Caviezel-Sutter (Tusaun), Christoffel-Casty, Dermont, Frigg, Hardegger, Hübscher, Jäger, Jenny, Joos-Buchli, Keller, Kessler, Lemm, Luzio, Mani-Heldstab, Märchy-Michel, Meyer-Grass (Claustra), Michel, Montalta, Parolini, Pedrini, Perl, Peyer, Portner, Ratti, Righetti, Schütz, Tremp, Zindel, Brasser, Campell, Caviezel (Cuira), Gartmann, Janett, Mainetti

Session: 17.06.2005
Vorstoss: rg Anfrage


Resposta da la regenza

En il rom da l'examinaziun da las structuras e da las prestaziuns per sanar las finanzas dal chantun ha il cussegl grond concludì la stad 2003 mesiras che pertutgavan tant il sectur da las expensas sco er quel da las entradas dal chantun. Cun la mesira C176 èn vegnidas pretendidas tariffas che cuvran ils custs per la furmaziun supplementara voluntara da las persunas d'instrucziun. La furmaziun supplementara obligatoria da las persunas d'instrucziun n'è betg pertutgada da quai. Per il svilup da scola chantunal ha quella spezialmain er en l'interess da las persunas d'instrucziun da star en il center. Cuntrari a quai cuntenta la furmaziun supplementara voluntara da las persunas d'instrucziun ils basegns da mintga singula persuna d'instrucziun pertutgant il champ d'instrucziun e pertutgant l'accordanza tranter ils purtaders da scola ed il collegi da persunas d'instrucziun mintgamai en la situaziun specifica locala e regiunala.
Sco consequenza da la realisaziun da la mesira C176 èn las propostas d'adattar la lescha da scola e la lescha da scolina vegnidas acceptadas dal pievel il november 2003. Las disposiziuns legalas prevesan che la furmaziun supplementara obligatoria per las categorias professiunalas correspundentas possia vegnir promovida en il chantun cun realisar curs e cun pajar contribuziuns. La furmaziun supplementara chantunala da persunas d'instrucziun da la scola e da la scolina ha pia er en l'avegnir ina gronda impurtanza.

Davart las dumondas concretas formuladas en la dumonda parlamentara s'exprima la regenza sin basa da las explicaziuns fatgas qua survart sco suonda:

1. Il sectur da la furmaziun supplementara è ina part essenziala da la qualitad da la scola. Pervi da quai sa stenta il chantun numnadamain en il sectur da la furmaziun supplementara definida sco obligatoria da metter a disposiziun ina purschida da curs d'ina auta qualitad. Perquai che las persunas d'instrucziun èn però tenor las prescripziuns da la lescha emploiadas ed emploiads dals purtaders da scola e da scolina, han quels er per gronda part la responsabladad per planisar la promoziun da lur collavuraturas e da lur collavuraturs.

2. In'evaluaziun externa ch'è vegnida fatga da la scola auta da tecnica ed economia (SATE) sin incumbensa dal departament d'educaziun arriva a la conclusiun ch'igl èn vegnidas absolvidas per part furmaziuns supplementaras d'auters purschiders e ch'ina repartiziun dals custs da curs, che n'è betg stada sclerida dapertut en moda netta, tranter il patrun (purtader da scola) ed il lavurant (persuna d'instrucziun) ha gì per consequenza che l'utilisaziun da la purschida da furmaziuns supplementaras voluntaras è sa reducida sin plaun local.

3. Considerond las decisiuns prendidas l'onn 2003 sto il chantun restrenscher sia influenza surtut sin la purschida da furmaziun supplementara obligatoria. Almain sa participescha il chantun tar la finanziaziun d'occurrenzas da furmaziun supplementara per collegis da persunas d'instrucziun, da las qualas profita ina scola entira al lieu ("furmaziun supplementara entaifer la chasa da scola") cun pajar er vinavant la mesadad dals custs da curs.

4. Areguard la situaziun finanziala vegn la regenza a s'engaschar en emprima lingia per metter a disposiziun meds dal preventiv per il sectur da la furmaziun supplementara obligatoria.

Datum: 2 da settember 2005