Dumonda Gartmann concernent la nudada e la registraziun da giats
Sessiun: 17.06.2005
A partir dal 1. da fanadur 2005 ston ils chagniels vegnir nudads e registrads entaifer 3 mais suenter la naschientscha. Ils chauns ch'èn naschids avant il 1. da fanadur 2005 e che n'èn anc betg nudads, ston vegnir nudads e registrads en ina banca da datas fin il pli tard ils 31 da december 2006. Il cussegl federal regla la nudada da chauns ed ils chantuns procuran per la registraziun (art. 30 LFE, CS 916.40). La nudada e la registraziun gidan a far scleriments en cas d'epidemias e suenter accidents tras morsas sco er tar chauns sparids, negligids u bandunads. Perquai ch'il chantun Grischun na posseda nagina atgna banca da datas e perquai ch'el n'è uschia er betg collià cun autras bancas da datas en Svizra, ha el incumbensà la ANIS sco banca da datas uffiziala da registrar ils chauns en il chantun.
En bleras chasadas da noss chantun viva in giat. La relaziun da las possessuras e dals possessurs cun lur giat po vegnir cumparegliada fitg bain cun quella cun chauns. Tar quests animals na datti nagina obligaziun d'als nudar u d'als registrar, schebain ch'i vegnan chattads oravant tut en las aglomeraziuns pli grondas adina dapli giats sparids e/u vagabundants. Per facilitar a las possessuras ed als possessurs da chattar lur animals sco er per prevegnir ad eventualas epidemias pari d'esser raschunaivel d'extender l'obligaziun da nudada er sin giats.
Jau supplitgesch la regenza da respunder las suandantas dumondas:
1. Co giuditgescha la regenza la nudada e la registraziun da giats?
2. È la regenza er da l'avis ch'i fiss raschunaivel da laschar nudar e registrar er giats?
3. È la regenza pronta d'examinar ina cunvegna cun la ANIS concernent la registraziun centrala da giats?
Cuira, ils 17 da zercladur 2005
Name: Gartmann, Frigg, Jäger, Peyer, Pfenninger
Session: 17.06.2005
Vorstoss: rg Anfrage
Resposta da la regenza
Sin fundament da la discussiun publica davart chauns privlus l'onn 2001 è vegnida introducida sin plaun federal la basa legala per ina nudada e registraziun unitara e durabla adequata dals chauns. Chagniels ston vegnir provedids gia a partir dal cumenzament 2006 cun in chip (transponder) tras ina veterinaria u in veterinari e vegnir registrads en ina banca da datas. Possessuras e possessurs da chauns pli vegls han anc in onn peda da far quai, fin la fin da l'onn 2006. La registraziun permetta da sclerir cas d'epidemias suenter accidents da morsas sco er tar chauns sparids, negligids u bandunads.
En il chantun Grischun èn las vischnancas obligadas da registrar ils chauns. Il possess da chauns è suttamess a lur controlla (art.17 lescha davart ils fatgs veterinars, DG 914.000).
Dumonda 1
La nudada e la registraziun da chauns è reglada en la lescha davart epidemias d'animals (art. 30 LFE) ed en l'ordinaziun davart epidemias d'animals (art. 16 OFE). Tenor questas novas prescripziuns dal dretg federal ha la possessura resp. il possessur la responsabladad per la nudada e per la registraziun dals chauns. Per la registraziun e per la nudada da giats na datti betg reglementaziuns legalas correspundentas. La possessura ed il possessur da giats na po pia betg vegnir obligada u obligà da nudar e registrar ses giat.
Dumonda 2
Giats n'èn cumpareglià cun chauns betg privlus per la publicitad e n'èn er betg ina ristga areguard epidemias. Uschia n'exista betg in interess public vi da l'obligaziun da nudar e da registrar giats. Mintga possessura u mintga possessur da giats po dentant laschar nudar e registrar ses animals facultativamain.
Dumonda 3
Las datas eruidas en connex cun la nudada e cun la registraziun dals chauns ston vegnir annunziadas da las veterinarias u dals veterinaris al post inditgà dal chantun da domicil da la possessura u dal possessur da l'animal, e quai entaifer diesch dis. Ils chantuns pon u registrar sezs questas datas en ina banca da datas u ch'els pon incumbensar ina instituziun da far quai (art. 16 OFE). Sin fundament da questa obligaziun legala ha la regenza fatg ina cunvegna cun la ANIS per la registraziun centrala dals chauns. Per giats na datti betg questa obligaziun da registrar en ina banca da datas centrala. Sin fundament da la mancanza d'interess da la publicitad ad ina tala registraziun na vegn la regenza betg a far ina cunvegna da registrar giats cun l'ANIS. I stat liber a mintga possessura u a mintga possessur da giats da laschar registrar ses animal facultativamain.
Datum: 22 d'avust 2005