Navigaziun principala

Cuntegn da la pagina

Dumonda Wettstein concernent la surveglianza dals custs da las dretgiras districtualas

sessiun: 17.06.2005
Tenor l'ordinaziun davart l'organisaziun, la salarisaziun e la gestiun da las dretgiras districtualas dals 5 d'october 1999 vegnan ils custs da gestiun da las dretgiras districtualas purtads mintgamai mez a mez dal chantun e da las vischnancas dal district. Ils preventivs da las dretgiras respectivas ston vegnir approvads da la dretgira chantunala ed èn liants per la dretgira pertutgada. Il rendaquint sto vegnir controllà da la controlla chantunala da finanzas ed è liant per ils uffizis finanziants, uschespert che la dretgira chantunala l'ha approvà sin basa da quest rapport.

Questa regulaziun chaschuna che las vischnancas ed er il chantun, che portan communablamain ils custs, n'han nagina influenza sin la cumposiziun e sin l'autezza da quests custs. I constat segir e franc che la dretgira chantunala po sin basa da sias enconuschientschas professiunalas giuditgar bain, tge basegns persunals ed infrastructurals ch'ina dretgira districtuala ha; i constat dentant er ch'igl exista qua ina libertad considerabla da decider. Il chantun e las vischnancas duessan perquai avair in interess eminent da pudair cooperar almain tar l'approvaziun dal preventiv.

Dal rest n'han las vischnancas fin uss gnanc ina giada survegnì invista dals rapports da la controlla chantunala da finanzas, uschia ch'ellas n'han gnanc ina giada gì la pussaivladad da far questa controlla minimala. Tras quai n'èn ellas betg orientadas davart il svilup dals custs sco er davart ils motivs da l'augment dals custs; en in cas concret n'èn ellas cuntrari a las cleras obligaziuns da la controlla da finanzas er betg vegnidas infurmadas durant onns davart pretensiuns finanzialas envers "lur" dretgira districtuala pretensiuns finanzialas, da las qualas las vischnancas han il dretg.

En quest connex sa tschentan las suandantas dumondas:

È er la regenza da l'avis da las sutsegnadras e dals sutsegnaders, che las vischnancas duajan medemamain survegnir il rapport da la controlla chantunala da finanzas?

Tge mesiras supplementaras vesa la regenza per garantir che la controlla dals custs tar las dretgiras districtualas saja suffizienta?

È er la regenza da l'avis che la cumissiun dal cussegl grond per giustia e segirezza, ch'è cumpetenta per ils fatgs giudizials, duai survegnir ils rapports da gestiun da tut las dretgiras districtualas e duai avair la pussaivladad da s'exprimer en l'avegnir davart las propostas, avant che la dretgira chantunala approvescha ils preventivs ed ils quints.

È er la regenza da l'avis ch'i stoppia vegnir examinà en il rom d'in proxim detretschament cumplessiv da las incumbensas e da las grevezzas, sche la finanziaziun e la cumpetenza areguard las dretgiras districtualas duessan vegnir attribuidas exclusivamain a las vischnancas u al chantun?

Cuira, ils 17 da zercladur 2005

Name: Wettstein, Demarmels, Feltscher, Augustin, Bachmann, Barandun, Baselgia-Brunner, Berther (Sedrun), Bundi, Casty, Caviezel (Pitasch), Conrad, Crapp, Dermont, Dudli, Fasani, Federspiel, Giacometti, Hanimann, Hardegger, Hess, Jenny, Joos-Buchli, Keller, Kessler, Kleis-Kümin, Koch, Krättli-Lori, Lemm, Loepfe, Marti, Mengotti, Michel, Parolini, Portner, Ratti, Rizzi, Stiffler, Telli, Tomaschett, Tramèr, Tremp, Tuor, Wettstein, Zarn, Hartmann, Janett, Jecklin-Jegen, Kunz, Mainetti, Nay, Waidacher

Session: 17.06.2005
Vorstoss: rg Anfrage


Resposta da la regenza

Fin l'onn 2000 èn las dretgiras districtualas vegnidas finanziadas en emprima lingia da las vischnancas; il chantun sa participava cun ina contribuziun annuala da 400'000 francs vi da lur custs. Areguard la controlla dals quints era la pratica quella che las vischnancas survegnivan dals districts mintgamai il quint annual cun la summa da deficit che tutgava ad ellas (calculada tenor il dumber d'abitantas e d'abitants). La revisiun dals quints annuals vegniva organisada da las dretgiras districtualas sezzas. In preventiv en il vair senn dal pled n'aveva la gronda part da las dretgiras districtualas betg.

Dapi la refurma da las dretgiras I surpiglian il chantun e las vischnancas mintgamai la mesadad dal deficit da las dretgiras districtualas. En vista ad ina controlla dals custs efficazia èsi vegnì previs en la lescha che la dretgira chantunala stoppia controllar ed approvar il preventiv ed il quint annual da mintga dretgira districtuala en collavuraziun cun la controlla chantunala da finanzas. La dretgira chantunala fixescha la basa da salarisaziun ed ha da permetter pertschients da plazzas supplementars. Surpassaments dal preventiv la ston vegnir annunziads ordavant ed ella sto approvar quels. La dretgira chantunala e la controlla da finanzas han concretisà las prescripziuns legalas cun directivas per far il preventiv e per proceder en cas da surpassaments da credits e d'extensiuns da plazzas. Plinavant è vegnì stabilì in sistem d'indicaturs simpel, cun il qual las dretgiras districtualas han pudì vegnir cumparegliadas betg mo ina cun l'autra, mabain er areguard lur svilup dapi l'onn 2002.

1. Tenor l'avis da la regenza na datti nagins motivs da betg trametter sin dumonda da las vischnancas a quellas il rapport da la controlla da finanzas (senza detagls e cun resguardar il secret d'uffizi). Per chaschunar a l'administraziun uschè pauca lavur sco pussaivel duai la spediziun vegnir fatga da las dretgiras districtualas. Quai correspunda gia oz a la pratica da singulas dretgiras districtualas.

2. En cumparegliaziun cun la contribuziun che vegn pajada dal chantun è la regenza da l'avis che la controlla dals custs che vegn fatga oz saja suffizienta. Uschia è la contribuziun chantunala da deficit a las dretgiras districtualas sa reducida cuntinuadamain dapi l'onn 2002 (da 2.3 milliuns francs l'onn 2002 ad 1.8 milliuns francs l'onn 2005). En la cumparegliaziun interchantunala èn ils custs plitost bass. Plinavant dastgass l'effect dal nov sistem d'indicaturs esser quel ch'ils custs sa reduceschan. Ulteriuras reducziuns dals custs tar las dretgiras districtualas sa laschassan cuntanscher mo cun centralisar pli fitg e cun refurmar las structuras.

3. Ina cooperaziun da la cumissiun per giustia e segirezza dal cussegl grond en connex cun l'approvaziun dal preventiv e dal quint da las singulas dretgiras districtualas considerescha la regenza sco pauc adattada per impedir ch'ils custs tar las singulas dretgiras districtualas s'augmentian en l'avegnir. La dretgira chantunala e la controlla da finanzas pon cun lur enconuschientschas spezialas sin il champ da la giustia e da la controlla da quints garantir ch'ils custs vegnan survegliads en moda pli effizienta. A medem temp resti dentant resalvà a la cumissiun en il rom da la surveglianza suprema da prender invista dals rapports da gestiun da las singulas dretgiras districtualas En connex cun la cussegliaziun e cun l'approvaziun dal preventiv dal chantun ha ella plinavant la pussaivladad da s'exprimer davart las contribuziuns che duain vegnir pajadas a las dretgiras districtualas. Dal rest ha la cumissiun da gestiun en il rom da la surveglianza da finanzas er il dretg da prender invista da tut ils documents relevants per las finanzas.

4. En il rom dal detretschament cumplessiv da las incumbensas e da las grevezzas ch'è planisà entaifer il chantun ston da princip vegnir examinads tut ils secturs, pia er la giustia. En quest connex sto vegnir prendida en mira ina concordanza tranter l'adempliment da las incumbensas e da las chargias ch'èn cumbinadas cun tal. Areguard il cuntegn na pon vegnir fatgas oz anc naginas indicaziuns e garanzias liantas.

Datum: 14 da settember 2005