Navigaziun principala

Cuntegn da la pagina

Incumbensa Kleis-Kümin concernent l'augmentaziun d'in fond per promover projects innovativs en il sectur da l'utilisaziun da laina d'energia resp. da stgaudaments da laina

sessiun: 17.06.2005
En il rapport annual 2004 da l'uffizi forestal vegn menziunà sut la gruppa da products 2 "mantegniment preventiv dal guaud" tranter auter la finamira da promover il lain sco materia prima natirala, indigena ed ecologica per construir e per fabritgar sco er sco purtadra d'energia.

En connex cun l'examinaziun da las structuras e da las prestaziuns chantunalas concludidas dal cussegl grond, curt mesiras da spargn, èn vegnidas abolidas las contribuziuns a funtaunas d'energia regenerabla. Pertutgads il pli fitg da questa mesira da spargn èn ils stgaudaments da laina.

Dapi in pèr emnas vegn infurmà regularmain davart la domiciliaziun planisada d'ina resgia gronda. Als manaschis forestals avriss questa resgia gronda novas pussaivladads sin il martgà da laina, sch'il martgà funcziunescha, e da quai pon ins dentant partir. I na dastga però betg vegnir emblidà ch'i n'existan praticamain naginas pussaivladads per vender laina d'energia en ils manaschis forestals. E laina d'energia resulta en quantitads considerablas tar la tgira dals guauds da protecziun. La situaziun finanziala precara ed il squitsch dals custs che paisa sin las vischnancas en bain enconuschents a tuts. Ultra da quai èn puspè vegnidas scursanidas las contribuziuns federalas per la tgira dals guauds da protecziun, ed en la pressa han ins pudì leger ch'il cussegl federal vuless renunziar a tut las prestaziuns a favur dal guaud. Il resultat da quai è che projects che servan a la tgira dal guaud vegnan adina pli savens suspendids u insumma betg realisads.

Nus na pudain betg punctuar quai savens avunda: Il chantun Grischun na po simplamain betg sa prestar da negliger la tgira dals guauds da protecziun. Sch'ils manaschis forestals pon duvrar u vender la laina d'energia, curran enavos raps en il guaud che pudessan vegnir duvrads cumplainamain per sia tgira. La promoziun da stgaudaments da laina è raschunaivla tant or dal puntg da vista ecologic sco er economic e la persistenza è cumprovada. Ina materia prima ch'i dat avunda tar nus e che crescha adina suenter vegn duvrada sco purtadra d'energia. L'energia netta vegn promovida. Plazzas da lavur urgentamain necessarias, er en regiuns periferas, vegnan mantegnidas u schizunt stgaffidas da nov. Imports d'ieli mineral chars che engrevgeschan l'ambient pon vegnir reducids ed en tut vegn cuntanschida ina tscherta independenza.

En connex cun ils retgavs da la vendita da l'aur da la banca naziunala sco er cun il rembursament dal chapital da dotaziun da la banca chantunala grischuna vegn la regenza incumbensada d'augmentar in fond. Ils meds da tal duain vegnir duvrads per promover projects innovativs en il sectur da l'utilisaziun da laina d'energia resp. da stgaudaments da laina.

Cuira, ils 17 da zercladur 2005

Name: Kleis-Kümin, Sax, Montalta, Augustin, Bachmann, Berther (Mustér), Berther (Sedrun), Biancotti, Bleiker, Bundi, Büsser, Cahannes, Capaul, Casanova (Vignogn), Casty, Caviezel-Sutter (Tusaun), Cavigelli, Christ, Conrad, Crapp, Dermont, Dudli, Fallet, Farrér, Fasani, Federspiel, Fleischhauer, Gredig-Hug, Hardegger, Jaag, Jenny, Joos-Buchli, Keller, Koch, Mani-Heldstab, Meyer-Grass (Claustra), Mengotti, Noi, Parpan, Peyer, Pfenninger, Pfister, Quinter, Righetti, Schmid, Schütz, Stiffler, Stoffel, Telli, Thomann, Tomaschett, Tremp, Tuor, Zarn, Darms, Janett, Jecklin, Mainetti

Session: 17.06.2005
Vorstoss: rg Auftrag


Resposta da la regenza

Utilisar dapli l'energia che deriva da la laina è per il chantun Grischun giavischabel en differents reguards. Tant ponderaziuns da la politica d'energia e da clima sco er ponderaziuns da la politica forestala recumondan in'utilisaziun pli intensiva da questa energia ch'è suenter la forza idraulica la segund impurtanta, sche tras quai po vegnir reducida a medem temp pass per pass la dependenza da l'ieli mineral. Sco purtader d'energia regenerabel ch'è avant maun en moda decentrala sustegna ina extensiun da l'utilisaziun da la laina per producir energia ina cultivaziun persistenta dal guad. En quest senn na s'oppona nagut a l'intent da l'incumbensa, numnadamain da l'utilisaziun energetica da la laina. Da la producziun e da l'elavuraziun da laina resultan products secundars che han in potenzial d'energia impurtant. L'onn 2003 ha la selva stimà il potenzial utilisabel da laina d'energia sin ca. 50'000 meters cubics per onn e formulà tschintg direcziuns principalas che avevan sco finamira dad avair successivamain en egl l'augment substanzial da l'utilisaziun da laina d'energia.

Sa basond sin la legislaziun chantunala d'energia n'è ina promoziun rinforzada davart dal chantun en il sectur da l'utilisaziun da laina d'energia dentant actualmain betg pussaivla. Uschia prevesa quella exclusivamain la promoziun da stgaudaments da laina en edifizis publics, quai che n'è en il fratemp dentant betg pli vegnì fatg. En connex cun l'incumbensa Montalta ch'è vegnida assegnada dal cussegl grond e che pretenda ina basa legala per contribuziuns a l'utilisaziun da l'energia solara per producir chalur, è la regenza pronta da prender en mira er ina midada da la lescha correspundenta areguard ina promoziun rinforzada da l'utilisaziun da laina d'energia. Quest intent è correspundentamain gia vegnì formulà sco punct da svilup central dal program da la regenza 2006. Cun l'adattaziun correspundenta da la lescha d'energia duai vegnir cuntanschì che la part da la laina sin il martgà da chalur po vegnir augmentada. La creaziun d'in fond per promover projects innovativs en il sectur da l'utilisaziun da laina d'energia che vegn pretendida da l'incumbensa fa actualmain naufragi pervi da la basa legala che manca per promover tals projects. Il pli baud cur ch'ina basa legala correspundenta è avant maun sa tschenta la dumonda da l'autezza dals meds finanzials ch'èn disponibels per quai e da la moda e maniera da la finanziaziun.

Sin basa dals motivs preschentads, spezialmain perquai ch'ina basa legala n'è actualmain betg avant maun per l'intent da promoziun avisà, refusa la regenza per il mument l'incumbensa da crear in fond spezial. Sut questas circumstanzas è er la dumonda davanz, quantenavant ch'ina soluziun da fond per finanziar in program da promoziun possia tegnair quint da las pretensiuns d'ina politica da finanzas persistenta.

Datum: 14 da settember 2005