Navigaziun principala

Cuntegn da la pagina

Dumonda Pfiffner concernent la tgira activa dal guaud / donns da malaura

sessiun: 31.08.2005
La tgira activa dal guaud sco element impurtant per proteger persistentamain l'uman e ses spazis da viver sto vegnir promovida. Strategias cumprovadas dal manaschament da privel per reducir las ristgas da catastrofas da la natira ston vegnir sviluppadas vinavant. Quai stat en il preventiv 2005 dal program annual tar il punct central da svilup 16/15 "protecziun cunter privels da la natira". Cun il pachet da spargn 2003 ha la confederaziun spargnà circa 30% dals meds finanzials ch'eran da princip previs per quest intent. Al chantun Grischun mancan pervi da quai daners federals per proteger la populaziun cunter eventuals donns da malaura. Er mancan per part ils meds finanzials per mesiras preventivas per satisfar ils basegns da las proprietarias e dals proprietaris da guaud per gronda part èn quai vischnancas. Spezialmain en ils secturs da la tgira dal guaud, da l'infrastructura (averturas) e da la reparaziun dals donns da guaud (utilisaziuns sfurzadas) exista in deficit. Suenter las ultimas malauras da l'avust 2005, da las qualas il chantun è vegnì pertutgà fermamain oravant tut a Claustra sco er en l'Engiadina bassa, supplitgain nus la regenza da respunder las suandantas dumondas:

1. Ha il chantun Grischun meds finanzials avunda per finanziar ils donns da malaura 2005 che vegnan a resultar e che pertutgan il guaud e las infrastructuras forestalas?

2. È la regenza pronta da s'engaschar tar la confederaziun per meds finanzials supplementars per la tgira dals guauds da protecziun resp. tar il UFAGC per in augment dals meds finanzials scursanids?

3. Tge conclusiuns tira resp. tge correcturas fa il chantun sin basa da las experientschas actualas concernent la pratica da la tgira da guaud e da la cultivaziun dal guaud?

4. Tge pussaivladads vesa la regenza eventualmain a media vista en il rom da la refurma da la gulivaziun da finanzas e da la repartiziun da las incumbensas tranter la confederaziun ed ils chantuns (RFI) d'augmentar las contribuziuns da meds finanzials dal chantun?

Cuira, ils 31 d'avust 2005
Session: 31.08.2005
Vorstoss: rg
Name: Pfiffner, Pfenninger, Bucher, Arquint, Baselgia-Brunner, Beck, Berther (Mustér), Brüesch, Butzerin, Capaul, Cavigelli, Conrad, Fasani, Frigg, Hardegger, Jaag, Jäger, Joos-Buchli, Keller, Maissen, Meyer-Grass (Claustra), Meyer Persili (Cuira), Mengotti, Michel, Noi, Parolini, Peyer, Robustelli, Schütz, Stoffel, Thomann, Tremp, Trepp, Zindel, Caviezel (Cuira), Mainetti, Mathis


Resposta da la regenza

Cun metter ad ir in sistem d'infurmaziun en cas da privels ha il chantun ina basa impurtanta per garantir ina protecziun cunter privels da la natira uschè cumpletta sco pussaivel. A questa protecziun serva dentant er la tgira activa dal guaud, l'avertura dals guauds e mesiras da dustanza. L'onn 2004 stevan a disposiziun al chantun anc meds finanzials federals da circa 27 milliuns francs per realisar talas mesiras. Pervi da las mesiras da spargn da la confederaziun èn quests meds finanzials vegnids reducids a circa 20 milliuns francs per l'onn 2005 ed a circa 19 milliuns francs per l'onn 2006. En vista a la situaziun finanziala critica da la confederaziun èsi pervi da quai inevitabel da tschentar prioritads er en il sectur da la selvicultura. Partind da questas constataziuns generalas pon las dumondas vegnir respundidas sco suonda:

1. Las malauras da l'avust passà han chaschunà en il guaud donns totals da circa 13 milliuns francs. Per reparar quests donns stuessan contribuir tenor la clav da repartiziun vertenta la confederaziun circa 6,6 milliuns francs ed il chantun resp. las proprietarias u ils proprietaris da guaud mintgamai 3,2 milliuns francs. Per il chantun vul quai dir ch'el dovra pia meds finanzials supplementars dad annualmain 1,6 milliuns francs ils onns 2006 e 2007. Per quai na bastan ils meds finanzials chantunals previs tenor la planisaziun da finanzas betg. Quels èn numnadamain previs per projects che curran gia. En vista a questa situaziun ha il chantun dumandà meds finanzials supplementars tar la confederaziun per reparar ils donns da malaura 2005. Da quai vegn la confederaziun a decider previsiblamain anc quest onn. Correspundentamain a la part dals meds finanzials federals supplementars ston alura ils meds finanzials per las lavurs che ston vegnir fatgas supplementarmain ils onns 2006/2007 e che na pon betg vegnir spustadas vegnir integrads en il preventiv 2006 resp. en la planisaziun da finanzas.

2. La finamira oriunda dal chantun è stada da realisar successivamain las mesiras da tgira necessarias per ils guauds cun ina funcziun da protecziun speziala. Pervi da las mesiras da spargn rigurusas da la confederaziun na po la tgira dals guauds da protecziun actualmain però betg pli vegnir ademplida en la dimensiun giavischada. L'onn 2004 han uschia pudì vegnir realisadas las mesiras correspundentas mo pli per var 1'400 ha guaud. Necessarias fissan dentant mesiras da tgira dal guaud per var 3'000 ha. Pervi da quai ha la regenza protestà pliras giadas tar la confederaziun ed ha punctuà cun l'enclegentaivladad necessaria ch'ils meds finanzials limitads da la confederaziun stoppian vegnir duvrads prioritarmain per la tgira dal guaud da protecziun. L'onn 2005 han pervi da quai pudì vegnir tgiradas en moda persistenta 1'800 ha, q.v.d. 400 ha dapli guaud da protecziun che l'onn precedent. Er en l'avegnir vegn la regenza a s'engaschar tar la confederaziun per che quella mettia a disposiziun ils meds finanzials necessaris per il sectur da la selvicultura.

3. La tgira persistenta dal guaud sco er l'allontanament consequent da las utilisaziuns sfurzadas èn sa cumprovads en la pratica. A chaschun da las malauras da l'onn 2005 è la part da la laina ch'è vegnida laschada enavos en ils guauds stada considerablamain pli pitschna che la part da la laina da grava frestga. La tgira dals guauds da protecziun sto pervi da quai vegnir cuntinuada cun cleras finamiras. Il medem vala per la tgira da las auas currentas. En il futur ston las rivas sche necessari vegnir tegnidas libras da plantas grevas.

4. Tras las regulaziuns dal dretg forestal èn las contribuziuns federalas stadas liadas fin ussa a las contribuziuns chantunalas. Cun la repartiziun da las incumbensas tranter la confederaziun ed ils chantuns ch'è vegnida adattada en il rom da la refurma da la gulivaziun da finanzas vegn la part da la confederaziun per il guaud sbassada da fin ussa 55 % a 40 %. Per il sectur da la selvicultura stattan consequentamain a disposiziun al chantun Grischun circa 7 milliuns francs damain meds finanzials federals. Quai augmenta correspundentamain las expensas nettas dal chantun per il guaud. Co ch'ils meds finanzials chantunals senza intent specific vegnan duvrads en il futur, determineschan d'ina vart la legislaziun chantunala e da l'autra vart il cussegl grond sur il preventiv annual.

Datum: 17 d'october 2005