Navigaziun principala

Cuntegn da la pagina

Dumonda Righetti concernent la coordinaziun da las acziuns en cas d'urgenza en la Mesolcina per lung da la A13 e da la via chantunala

sessiun: 31.08.2005
Durant l'emna passada han las fermas plievgias al nord da las Alps chaschunà ultra da las catastrofas enconuschentas che l'axa dal Gottard è vegnida serrada totalmain (via e viafier). Tras quai è la ruta dal San Bernardin stada la suletta colliaziun charrabla tranter il sid ed il nord da las Alps.

Durant quest stadi excepziunal ston ins ludar la prontezza e l'engaschi da l'uffizi chantunal da construcziun bassa che ha interrut las lavurs als plazzals ed allontanà las amplas da traffic correspundentas en il tunnel dal San Bernardin. Uschia ha il traffic pudì circular en domaduas direcziuns ed ins ha pudì evitar ch'i sa furmian lungas colonnas sco quai ch'igl era stà il cas il cumenzament da quest eveniment tragic ed imprevis.

Ins sto dentant accentuar che la polizia n'ha betg liquidà efficaziamain la circulaziun dal traffic; quai vala spezialmain per il traffic local en la part sura da la val che avess stuì vegnir svià gia en la Mesolcina bassa sin la via chantunala. Bleras persunas che han utilisà localmain la via èn stadas uras a la lunga en colonna sin la A13.

E cur ch'il traffic or da mez l'Europa è charrà sin la suletta axa ch'è stada charrabla en il territori da las Alps (cun excepziun da las axas da colliaziun tranter l'Italia e la Frontscha), n'han ins gì da far nagut auter che tagliar las saivs vivas tranter ils dus vials da la A13 tranter Lostallo e Cama. Pelvaira, tras questa acziun è vegnì serrà ils 24 d'avust il vial da surpassament en direcziun dal nord al sid ed il proxim di en direcziun dal sid al nord.
Senza vulair contestar la necessitad da talas acziuns èn vegnidas impedidas tras quai las pussaivladads da surpassar sin il sulet traject, nua ch'igl è anc pussaivel da far quai, avant ch'il traffic vegn manà ensemen sin mintgamai in vial tranter Lostallo e Soazza.

N'è la regenza sin basa da questas explicaziuns betg da l'avis che tut las acziuns sin la A13 e sin la via chantunala basegnian en cas d'urgenza ina meglra coordinaziun tranter la polizia e l'uffizi da construcziun bassa, per che tals impediments da traffic possian vegnir reducids ad in minimum?

Cuira, ils 31 d'avust 2005

Name: Righetti, Fasani, Pedrini, Augustin, Berther (Mustér), Brüesch, Butzerin, Dermont, Dudli, Fallet, Farrér, Janom Steiner, Jeker, Keller, Kleis-Kümin, Maissen, Mengotti, Pozza, Quinter, Stoffel, Tomaschett, Tuor, Zanetti, Zanolari, Mainetti, Niederer, Thurner

Session: 31.08.2005
Vorstoss: rg Anfrage


Resposta da la regenza

Pervi da la malaura catastrofala dals 22 e 23 d'avust 2005 ha stuì vegnir serrada la via naziunala A2 en il chantun Uri per tut il traffic. Per impedir che la ruta dal San Bernardin A13 vegnia surchargiada tras il traffic pesant, ha la polizia chantunala en enclegientscha cun las autoritads talianas e cun la polizia chantunala dal Tessin ordinà immediatamain ina bloccada da tut il traffic pesant derivant da l'Italia. L'uffizi da construcziun bassa dal Grischun ha procurà immediatamain che las lavurs da construcziun en il tunnel dal San Bernardin vegnian interruttas. Medemamain èn vegnidas sistidas las lavurs da mantegniment sin il traject a dus vials tranter Mesauc ed il tunnel. A partir da la mesemna, ils 24 d'avust 2005, èn pia il tunnel dal San Bernardin e l'entira via naziunala en la Mesolcina stads charrabels tras e tras sin dus vials. Fin alura hai dà colonnas sin la vart dal nord e dal sid che han cuntanschì vers la saira dals 23 d'avust 2005 ina lunghezza da fin 15 km. La "via swiss" ha infurmà regularmain las participantas ed ils participants dal traffic davart la situaziun da traffic actuala al San Bernardin. Sco ulteriura mesira è la signalisaziun sin la A13 vegnida adattada cuntinuadamain a la situaziun da traffic.

Ins ha desistì sapientivamain da sviar il traffic sin la via chantunala. Davent da Soazza en direcziun dal nord è la A13 sulettamain ina via naziunala da dus vials. Perquai na pon ins cuntanscher nagins augments da capacitad supplementars cun in sviament. Per motivs da la segirezza dal traffic e per impedir che las abitantas e ch'ils abitants vegnian engrevgiads vegn perquai sche pussaivel desistì er en la part sut da la Mesolcina da sviar il traffic sin las vias per part stretgas entaifer ils vitgs. Cun situaziuns da traffic uschè difficilas èsi impurtant per ils servetschs d'intervenziun, sch'els pon en cas d'in eventual accident cuntanscher il lieu d'eveniment uschè spert sco pussaivel sur la via parallela. Plinavant ha la populaziun indigena l'avantatg ch'ella enconuscha e nizzegia tenor las experientschas er la pussaivladad da guntgir sur la via cun pauc traffic.

Las mesiras eran vegnidas prendidas en stretg contact tranter l'uffizi da construcziun bassa e la polizia da traffic dal Grischun. Ellas èn stadas proporziunalas ed han resguardà adequatamain la populaziun locala. Quest proceder è sa cumprovà ils ultims onns pliras giadas, cur ch'il tunnel dal Gottard è vegnì serrà.

I constat che l'uffizi da construcziun bassa ha serrà ils 24 e 25 d'avust 2005, da las 5.00 a las 12.00, ils vials da surpassament sin il traject a quatter vials da Grono Lostallo resp. da Lostallo Grono, e quai per lavurs da mantegniment sin mintgamai ina lunghezza da ca. 2 km. En quest connex è la situaziun da traffic vegnida survegliada permanentamain. Sch'igl avess dà impediments supplementars essenzials, fissan las lavurs natiralmain vegnidas sistidas immediatamain.

La regenza è da l'avis che l'uffizi da construcziun bassa sco er la polizia chantunala grischuna hajan reagì svelt e correctamain sin la situaziun extraordinaria e che la coordinaziun tranter las partenarias ed ils partenaris pertutgads na dettia betg motiv per ulteriuras mesiras. Lavurs da mantegniment che n'èn betg absolutamain necessarias per il manaschi duain dentant vegnir tralaschadas en l'avegnir dal tuttafatg en cas da talas situaziuns.

Datum: 4 d'october 2005