Navigation

Inhaltsbereich

Sessiun: 01.09.2005
Dapi ditg surpiglia la crusch cotschna dal chantun Tessin il transport da las persunas malsaunas dal Moesano en ils ospitals, en las clinicas ed en ils ambulatoris dal Tessin, e quai per las tgirar, las visitar u simplamain per las transferir. Quest servetsch che la crusch cotschna tessinaisa porscha natiralmain er al chantun Tessin, vegn finanzià da quest ultim. Las pazientas ed ils pazients dal Moesano ston perencunter finanziar sezs quest servetsch. Per in grond dumber da questas persunas n'èn quests custs betg irrelevants, sch'ins pensa che p.ex. en cas d'ina dialisa la persuna malsauna sto far pliras giadas l'emna diever dal servetsch da transport da la crusch cotschna. Il chantun Grischun è vegnì envidà pliras giadas da satisfar a quest basegn, ha dentant adina refusà cleramain quest giavisch.

Perquai dumond jau la regenza:

1. Sch'ins parta dal fatg che la malsogna n'è betg ina culpa e ch'ella sto vegnir acceptada sco ch'ella è, èsi da far la dumonda, tge argument che la regenza ha per refusar da surpigliar ils custs da quest servetsch?

2. N'è la regenza betg da l'avis che, sch'i na vegn betg satisfatg a quest basegn, resulta en noss chantun ina discriminaziun tranter quels che han access ad instituziuns medicinalas e quels sco en il cas menziunà dal Moesano che n'han betg access?

Cuira, il 1. da settember 2005

Name: Noi

Session: 01.09.2005
Vorstoss: rg Anfrage


Resposta da la regenza

Il servetsch da transport da la crusch cotschna è ina purschida impurtanta per persunas attempadas, impedidas e malsaunas che n'èn betg ablas d'arrivar cun meds da transport publics tar la media u tar il medi, a l'ospital u a la terapia. Cun excepziun dal Mesauc vegn furnì quest servetsch en il chantun Grischun tras la crusch cotschna dal Grischun. En il Mesauc porscha la secziun da Bellinzona da la crusch cotschna dal chantun Tessin il servetsch da transport.

L'onn 2003 han las manischunzas ed ils manischunzs voluntars dal servetsch da transport da la crusch cotschna dal Grischun fatg 50'897 viadis. Las manischunzas ed ils manischunzs voluntars survegnan per lur viadis mo ina indemnisaziun per kilometer. La confederaziun sustegna il servetsch da transport da la crusch cotschna cun 22 francs per 100 km. Las utilisadras ed ils utilisaders ston pajar ils custs da viadi, las spesas, las taxas da parcadi e las taxas da telefon. Custs betg cuvrids resultan, sche las tariffas che vegnan messas a quint a las utilisadras ed als utilisaders na cuvran betg cumplettamain ils custs. La crusch cotschna dal Grischun cuvra il deficit dal servetsch da transport (ca. 20'000 fin 40'000 francs l'onn) tras donaziuns.

Tenor l'art. 26 da l'ordinaziun davart las prestaziuns da l'assicuranza obligatoria per la tgira da malsauns surpiglia l'assicuranza da malsauns tar transports da persunas malsaunas inditgads medicinalmain 50 pertschient dals custs, sch'il stadi da sanadad da la pazienta u dal pazient n'admetta betg da vegnir transportà cun in auter med da transport public u privat. Maximalmain vegn surpiglià per onn chalendar in import da 500 francs. Las retschavidras ed ils retschaviders da prestaziuns supplementaras (PS) pon tenor l'art. 15 da l'ordinaziun davart il rembursament da custs pervi da malsogna e d'invaliditad tar las prestaziuns supplementaras dumandar la cassa da cumpensaziun da restituir ils custs da viadi betg cuvrids. Per las utilisadras e per ils utilisaders stuessi pia esser pussaivel da finanziar tar transports da persunas malsaunas inditgads medicinalmain las tariffas dal servetsch da transport da la crusch cotschna.

Cuntrari al chantun Tessin na paja il chantun Grischun ni a la crusch cotschna dal Grischun ni a las utilisadras ed als utilisaders ina contribuziun per cuvrir ils custs dal servetsch da transport che na vegnan betg surpigliads da terzas persunas.


Respostas a las dumondas concretas:

1. La surpigliada dals custs da transport inditgads medicinalmain tras las assicuranzas da malsauns è reglada en la LAM en ina furma unitara per l'entira Svizra. La regenza n'ha nagina basa giuridica per pudair pajar ulteriuras contribuziuns.

2. Na. Il chantun na paja naginas contribuziuns al servetsch da transport da la crusch cotschna dal Grischun. La populaziun dal Mesauc na vegn pia betg discriminada pervi dal fatg ch'il chantun na subvenziunescha betg ils servetschs da transport prestads da la crusch cotschna dal chantun Tessin en il Mesauc.

Datum: 1. da november 2005