Navigaziun principala

Cuntegn da la pagina

Incumbensa Maissen concernent la prolungaziun da la lescha davart la construcziun d'abitaziuns socialas e la meglieraziun da las relaziuns d'abitar en il territori da muntogna per ils onns 2006 e 2007

sessiun: 18.10.2005
Las chombras federalas han relaschà ils 20 da mars 1970 la lescha federala davart la meglieraziun da las relaziuns d'abitar en territoris da muntogna (LMAM). Cun reveder questa lescha l'onn 2000 è quest agid finanzial vegnì prolungà fin ils 31da december 2005. Chantuns e vischnancas han pajà agids finanzials sin basa da questa lescha. L'agid federal è subsidar e vegn mo concedì, sch'il chantun e sche las vischnancas (u eventualmain terzas persunas) pajan lur contribuziuns.

Questa promoziun da la proprietad d'abitaziuns è ina mesira effectiva a favur da la populaziun muntagnarda. A questa conclusiun è arrivada in'evaluaziun ch'è vegnida terminada gia l'onn 1998. La gruppa en mira vegn cuntanschida. Tar quellas persunas che profiteschan da quest agid finanzial sa tracti da famiglias per gronda part da famiglias giuvnas cun uffants e cun entradas pitschnas.

Perquai che l'aboliziun da la LMAM è liada vi da la refurma da la gulivaziun da finanzas (RFI) e perquai ch'i vegn fatg quint che la RFI entria en vigur il 1. da schaner 2008 ha il parlament federal approvà resp. assegnà la moziun dad Adrian Imfeld per prolungar la LMAM fin ils 31 da december 2007.

Sin basa da questa nova situaziun resguardan las sutsegnadas ed ils sutsegnads ch'i na saja betg stà raschunaivel da stritgar las contribuziuns chantunalas en il senn da la mesira da spargn A 01. Cun questa stritgada per la FIN da l'onn 2005 che sa basa sin la stritgada prevesida da la confederaziun perda nossa populaziun contribuziuns federalas essenzialas.

La nova situaziun sin plaun federal cun prolungar la concessiun da contribuziuns fin a l'entrada en vigur da la RFI, pia per ils onns 2006 e 2007, pretenda er in'adattaziun correspundenta da nossa vart.

Pervi da quai vegn la regenza supplitgada da far las preparaziuns correspundentas, per che las contribuziuns chantunalas possian er vegnir concedidas analogamain a la lescha federala durant ils onns 2006 e 2007.

Cuira, ils 18 d'october 2005

Name: Maissen, Parolini, Caviezel (Pitasch), Arquint, Augustin, Barandun, Baselgia-Brunner, Beck, Berther (Mustér), Berther (Sedrun), Biancotti, Bundi, Büsser, Butzerin, Capaul, Casanova (Vignogn), Casty, Cavigelli, Christ, Christoffel-Casty, Dermont, Fallet, Farrér, Frigg, Giovannini, Hartmann (Champfèr), Jäger, Jeker, Joos-Buchli, Keller, Kleis-Kümin, Koch, Meyer-Grass, Mengotti, Noi, Pedrini, Pfiffner, Plozza, Portner, Quinter, Ratti, Righetti, Rizzi, Robustelli, Sax, Schmid, Stiffler, Tomaschett, Tremp, Trepp, Zarn, Blumenthal-Toschini, Campell, Cortesi, Darms, Florin-Caluori, Godly, Hunger, Janett, Lippuner, Mainetti, Thurner

Session: 18.10.2005
Vorstoss: rg Auftrag


Resposta da la regenza

Sa basond sin la lescha federala davart la meglieraziun da las relaziuns d'abitar en territoris da muntogna (LMAM, CS 844) e sin la lescha chantunala davart la construcziun d'abitaziuns socialas e la meglieraziun da las relaziuns d'abitar en il territori da muntogna (DG 950.250) èn vegnids sustegnids en il chantun Grischun dapi l'onn 1953 circa 3300 projects cun ina summa da construcziun da plirs tschient milliuns francs. En quest connex èn vegnids pajads circa 77.6 milliuns francs da contribuziuns federalas e 46.3 milliuns francs da contribuziuns chantunalas sco er circa 18.7 milliuns francs da contribuziuns da las vischnancas u da terzas persunas. Quest sustegn ch'è limità al territori da muntogna survegnan famiglias che vivan en relaziuns finanzialas modestas, en spezial famiglias cun blers uffants.

Cun l'instrument da la sanaziun da chasas d'abitar vegn fatga dapi passa tschinquanta onns ina prestaziun essenziala per l'urbanisaziun decentrala ed i vegn dà in impuls impurtant per il mastergn regiunal en il territori da muntogna.

L'agid finanzial tenor la LMAM ch'era oriundamain limità per ils 31 da december 2000 è vegnì prolungà pervi da l'iniziativa da cusseglier dals chantuns Theo Maissen l'onn 2000 fin a l'entrada en vigur da la RFI, maximalmain dentant fin ils 31 da december 2005. En connex cun quest svilup sin plaun federal ha il cussegl grond concludì en il rom da l'examinaziun da las structuras e da las prestaziuns per sanar las finanzas dal chantun (ESPSF) l'onn 2003 la mesira A 01 cun il titel curt "Sortida da la construcziun d'abitaziuns socialas a partir da l'onn 2006". Cun realisar questa mesira na pudessan vegnir approvadas en Grischun naginas dumondas pli a partir da la fin da l'onn 2005.

En il fratemp ha il cussegl federal dumandà il parlament da prolungar anc ina giada l'agid finanzial tenor la LMAM (missiva 05.064 dals 17 d'avust 2005, basond sin la moziun N 05.05.04 Imfeld), e quai fin a l'entrada en vigur dal conclus federal dals 3 d'october 2003 davart la refurma da la gulivaziun da finanzas e da la repartiziun da las incumbensas tranter la confederaziun ed ils chantuns. Il cussegl naziunal ha approvà quest sboz il 1. da december 2005 ed il cussegl dals chantuns ils 7 da december 2005. Il conclus federal concernent la RFI vegn probablamain ad entrar en vigur il 1. da schaner 2008. Il cussegl federal fa quint cun credits da garanzia annuals da circa 4 milliuns francs, dals quals il pajament è lià vi d'ina participaziun finanziala dals chantuns. Cumpareglià cun il contingent federal vertent da circa 10 milliuns francs è quai ina reducziun da dapli che la mesadad.

Anc avant che las mesiras sajan vegnidas concludidas dal cussegl grond en il rom da l'examinaziun da las structuras e da las prestaziuns per sanar las finanzas dal chantun è la regenza sa declerada pronta en la resposta a l'interpellaziun Tuor concernent la sanaziun da chasas d'abitar en il territori da muntogna da conceder prestaziuns finanzialas sco cumplettaziun da quellas da la confederaziun.

Sin basa da las explicaziuns fatgas è la regenza pronta da manar vinavant la sanaziun da chasas d'abitar parallelamain a l'agid federal. Però ston questas expensas, pervi da la mesira A 01 tenor ESPSF concludida dal cussegl grond, vegnir cumpensadas cumplainamain en in auter lieu. Pervi da las pussaivladads da cumpensar limitadas po vegnir pajada ina contribuziun chantunala annuala da 250'000. francs. Ils meds finanzials correspundents vegnan mess a disposiziun en il preventiv 2006 fin 2008 cun transferiments dal preventiv correspundents (cifras totalas dal preventiv: 2006: 1'225'000., 2007: 225'000.--, 2008: 50'000.).

En quest senn è la regenza pronta d'acceptar l'incumbensa. L'uffizi d'agricultura, meglieraziun da structura e mesiraziun ha da prestar mesiras da cumpensaziun da mintgamai 250'000. francs ils onns 2006 e 2007, pia en tut 500'000. francs. Sch'igl avessan cunter tuttas aspectativas da daventar disponibels ulteriurs meds finanzials ceh pon vegnir cumpensads, pon ils imports preschentads vegnir augmentads.

Datum: 13 da december 2005