Navigaziun principala

Cuntegn da la pagina

Dumonda Claus concernent il svilup a lunga vista dals areals utilisads dal militar a Cuira e conturn

sessiun: 06.12.2005
Il svilup dals ultims onns da l'armada concernent la plazza da Cuira sto sch'ins guarda realisticamain vegnir giuditgà en moda critica. Mo areguard la citad principala èn idas a perder circa la mesadad da las plazzas da lavur. Parallel cun quest svilup èn las emissiuns s'augmentadas fitg ferm (canera da sajettar al Rossboden). Senza dubi ston ins constatar ch'ils plans dal DDPS per l'avegnir da la plazza da Cuira n'èn betg clers. Las surfatschas en la citad da Cuira che vegnan oz anc utilisadas dal militar èn impurtantas per la citad or da differents reguards. L'areal da la caserna è situà en vischinanza dal center ed è segiramain adattà per vegnir utilisà sco center d'infrastructura. Il Rossboden porscha numerusas pussaivladads che ston vegnir examinadas. En quest connex vala er d'examinar in'utilisaziun industriala e turistica da muntada surregiunala (cuntrada da las auas Cuira).

Igl è dentant da tegnair quint ch'il militar duai esser e restar in partenari impurtant per noss chantun Grischun.
En quest connex sa tschentan differentas dumondas che duain vegnir consideradas e planisadas gia oz, e quai cunzunt guardà a lunga vista:

1. È la regenza pronta da s'engaschar vinavant tar il DDPS per mantegnair plazzas da lavur en nossa regiun perifera u per cas che la sperdita cuntinuescha en questa dimensiun da sa confruntar cun las consequenzas e da sustegnair en l'avegnir correspundentamain autras pussaivladads d'utilisaziun dals areals che vegnan duvrads oz dal militar?

2. È la regenza pronta da promover che las emissiuns dals territoris fitg populads vegnian reducidas e da s'engaschar per ch'ils execercizis da sajettar vegnian spustads en plazzas d'exercizi decentralas da noss chantun.

3. È la regenza pronta da sustegnair il svilup a lunga vista d'ina utilisaziun alternativa pussaivla da l'areal da la caserna e dal Rossboden a Cuira sco er da planisar la regiun da Cuira cun ina collavuraziun activa dals uffizis?

Cuira, ils 6 da december 2005

Name: Claus, Cahannes, Jeker, Augustin, Bachmann, Barandun, Berther (Mustér), Bleiker, Brunold, Casanova (Cuira), Caviezel (Pitasch), Christ, Crapp, Dermont, Frigg-Walt, Giacometti, Hanimann, Jaag, Jäger, Kleis-Kümin, Koch, Krättli-Lori, Luzio, Marti, Meyer-Grass (Claustra), Mengotti, Parpan, Perl, Peyer, Pfenninger, Rizzi, Robustelli, Stiffler, Tomaschett, Tremp, Tscholl, Florin-Caluori, Hartmann (Cuira), Pitsch

Session: 6.12.2005
Vorstoss: rg Anfrage


Resposta da la regenza

Sco consequenza dal grond redimensiunament da l'armada XXI e da las directivas da spargn rigidas dal parlament federal è il departament federal da defensiun, protecziun da la populaziun e sport (DDPS) stà sfurzà da far reducziuns considerablas er tar las plazzas d'armas e da tir e tar l'infrastructura da l'armada. Questas stents da spargn tar l'infrastructura èn sa manifestadas en il concept da staziunament da l'armada. Davart quest concept è la regenza s'exprimida detagliadamain en scrit visavì il DDPS il cumenzament da l'onn 2005 ed ha fatg attent als puncts debels or da la vista dal Grischun. Ultra da quai ha chaschunà il concept tractativas intensivas tranter la regenza ed ils represchentants da l'armada. En il fratemp è il concept da staziunament fixà. La realisaziun ha cumenzà.

Or da la vista dal Grischun na persvada il concept en differents puncts anc adina betg. A quel fatg ha la regenza fatg attent pliras giadas. Ins sto dentant resguardar che per ils proxims onns restan vinavant tuttina anc ca. 100 plazzas da lavur da l'armada (ca. 50 plazzas da lavur a Cuira).

La regenza ha gì l'onn passà pliras giadas occasiun da s'exprimer davart las consequenzas da la refurma da l'armada per il chantun Grischun. L'ultima giada ha ella fatg quai en la sessiun da december 2005 a chaschun da la resposta ad ina dumonda correspundenta. La represchentanta da la regenza è s'exprimida quella giada en connex cun la reducziun da las plazzas da lavur da l'armada en moda fitg critica ed ha accentuà che in'ulteriura reducziun dals posts civils na possia betg pli vegnir acceptada. Tranter auter èsi er vegnì crititgà che l'armada utiliseschia sin la plazza da tir Rossboden chars armads da grenadiers, ma ch'ils lavuratoris nua che tals vehichels vegnan reparads e nua ch'i vegnan occupads 10 fin 15 collavuraturs, veglia ella dischlocar a Hinwil.

Davart las dumondas:
1. La regenza è s'engaschada fin ussa intensivamain per mantegnair uschè bleras plazzas da lavur da l'armada sco pussaivel, surtut per plazzas da lavur civilas da l'armada en Grischun. Cun las oz ca. 100 plazzas da lavur en total (circa 60 plazzas civilas e 40 "verdas") per noss chantun po il resultat cuntanschì tras las tractativas cun il DDPS en cumparegliaziun cun l'entir redimensiunament da l'armada e da l'infrastructura anc vegnir numnà accpeptabel. La realisaziun currenta dal concept da staziunament e spezialmain la reducziun da las plazzas da lavur che stattan en connex cun quella n'èn dentant insumma betg euforicas. Sco quai ch'igl è vegnì explitgà a chaschun da la sessiun da december 2005, examinescha la regnza ensemen cun la citad da Cuira ed en discussiun cun la confederaziun lura er alternativas pussaivlas per utilisar la plazza d'armas e da tir Rossboden a Cuira. La dumonda po pia vegnir respundida cun "gea".

2. Gia il cumenzament dals discurs davart il concept da staziunament ha accentuà la regenza vers il DDPS expressivamain che la grevezza da canera haja cuntanschì e mintgatant er surpassà cleramain il cunfin da toleranza. L'insupportabladad da las immissiuns tras exercizis da tir per las abitantas e per ils abitants da tschertas parts da la citad da Cuira e da las vischnancas situadas sper la plazza da tir è vegnida communitgada al DDPS cler e net a bucca ed en scrit. La dischlocaziun da tscherts exercizis da tir sin autras plazzas da tir decentralas sto esser ina opziun da l'armada e vegn a restar in tema en ulteriurs contacts cun represchentantas e cun represchentants dal DDPS. La resposta è: gea.

Alternativas pussaivlas davart l'utilisaziun actuala da l'areal da la caserna e dal Rossboden a Cuira ston esser en l'interess da la citad da Cuira e ston vegnir ponderadas fitg bain. Questa dumonda concerna perquai fermamain la citad da Cuira. Natiralmain ch'il chantun è pront da collavurar tar l'analisa da las pussaivladads che sa porschan e d'offrir a la citad il sustegn necessari en il contact cun il DDPS. Sco fin ussa vegnan la citad ed il chantun a collavurar stretgamain en connex cun questas dumondas ed a defender ina posiziun communabla.

Datum: 30 da schaner 2006