Navigation

Inhaltsbereich

Dumonda Meyer Persili concernent il pajament anticipà e l'incasso d'aliments

Sessiun: 06.12.2005
Persunas ch'educheschan sulettas sco er lur uffants èn periclitads e pertutgads il pli fitg da la povradad da famiglia. Il studi "Segirar l'existenza en il federalissem da la Svizra" da la conferenza svizra da l'agid social (COSAS) da l'onn 2003 mussa che las entradas disponiblas da las famiglias cun in genitur dependa en emprima lingia da la concepziun dal pajament anticipà d'aliments. Cun ils aliments adempleschan ils geniturs che vivan separadamain lur obligaziun genituriala da mantegniment e pajan ina part dals custs per ils uffants. Ma la morala da pajament dals debiturs per ordinari èn quai ils babs na satisfa betg adina. Blers uffants vegnan uschia en stretgas finanzialas, e quai po tranter auter avair consequenzas per la scolaziun e per il provediment medicinal. Quest studi mussa ultra da quai che la povradad è oz er ina dumonda dal lieu da domicil, perquai che las basas per calcular il pajament anticipà d'aliments èn ordvart differentas en ils chantuns. Sin plaun federal sa stentan ins perquai d'elavurar propostas per armonisar il pajament anticipà e l'incasso d'aliments.

Tenor ils art. 131 (aliments per dunnas) e 290 CCS (aliments per uffants) è cumpetenta l'autoritad tutelara u è cumpetent in auter post designà dal dretg chantunal per exequir il dretg d'aliments. Quella u quel sto "gidar en moda adequata e gratuita". Cunquai che noss dretg chantunal na designescha betg in post correspundent, tutga l'incumbensa a l'autoritad tutelara resp. a las vischnancas che avess resp. che avessan teoreticamain d'exequir l'incasso dals aliments per dunnas e per uffants, e quai independentamain dal fatg sch'igl ha lieu in pajament anticipà u betg. Cun questa incumbensa èn surdumandadas bleras vischnancas, e quai cunzunt perquai ch'ellas n'enconuschan betg la cumplexitad da la materia. La centrala da dunnas dal Grischun ha surpiglià l'onn 2004 da vart privata il post per l'incasso d'aliments per dunnas e per uffants e survegn per quest intent ina contribuziun modesta dal chantun. Las experientschas fatgas mussan dentant che las structuras actualas e che las contribuziuns chantunalas vertentas na bastan betg per pudair exequir en moda professiunala ils servetschs d'in post spezialisà per aliments. In scleriment dal basegn, fatg da la centrala da dunnas, vegn perquai a la conclusiun ch'in post central bain organisà spezialisà per aliments correspunda en il Grischun als basegns tant dals geniturs e dals uffants pertutgads sco er da bleras vischnancas. I na po bain betg esser che persunas pertutgadas vegnan sustegnidas e cussegliadas professiunalmain en ina gronda vischnanca sco Cuira, entant che talas persunas na chattan insumma nagin sustegn u vegnan schizunt tramessas davent en ina vischnanca pitschna. La finala èsi cumprovà ch'i po vegnir gudagnà dapli daners che quai ch'in post spezialisà chaschunass custs, sche l'incasso vegn fatg en moda professiunala.

Perquai supplitgain nus la regenza da respunder las suandantas dumondas:

1. Pertge na datti en il chantun Grischun betg ina basa legala per in post central spezialisà che fa l'incasso dals aliments per uffants e per dunnas sco er la cussegliaziun ed il pajament anticipà en moda unitara? Tut ils chantuns en la proxima vischinanza sco SG, GL, ZH e.u.v. han in post central spezialisà per aliments resp. in post per l'incasso d'aliments che vegn manà en furma professiunala.

2. Pertgè n'è l'art. 131 CCS che regla ils aliments per dunnas e ch'è en vigur dapi il 1. da schaner 2000 betg vegnì transferì en la lescha introductiva tar il cudesch civil svizzer e pertgè n'è betg vegnì designà in post chantunal?

3. N'è la regenza betg er da l'opiniun ch'igl existan oz stadis nunpussaivels tras quai che tschertas vischnancas èn dal tuttafatg inactivas en connex cun il sustegniment concernent il pajament anticipà e l'incasso d'aliments, cumbain ch'il CCS prevesa ina incumbensa legala clera?

4. Tge tenuta ha il chantun envers las stentas d'armonisar il pajament anticipà d'aliments che han lieu sin plaun federal?

Cuira, ils 6 da december 2005

Name: Meyer Persili, Hardegger, Michel, Arquint, Bucher-Brini, Bühler-Flury, Cahannes, Caviezel-Suter (Tusaun), Cavigelli, Christoffel-Casty, Frigg-Walt, Jaag, Jäger, Meyer-Grass (Claustra), Noi-Togni, Perl, Peyer, Pfenninger, Pfiffner, Robustelli, Trepp, Zindel, Blarer, Brasser, Caviezel (Cuira)

Session: 6.12.2005
Vorstoss: rg Anfrage


Resposta da la regenza

Respunder las dumondas

1. La cumpetenza da reglar il pajament anticipà e l'incasso d'aliments per uffants e per dunnas è tenor ils art. 131, 290 e 293 CCS chaussa dals chantuns.
Gia en il rom da la revisiun totala da la lescha introductiva tar il CCS ha il legislatur chantunal refusà da stgaffir in post central per exequir il dretg da mantegniment (cf. M 1992/93 p. 566; PCG 1993/94 p. 286 ss.) Empè da quai ha el reglà en l'art. 39 respectivamain en l'art. 14 al. 4 da la lescha introductiva tar il CCS che la vischnanca da domicil da la persuna cun dretg d'aliments è cumpetenta per gidar ad incassar ils aliments nunpajads per uffants respectivamain per dunnas. Plinavant regla l'art. 40 che la vischnanca da domicil da l'uffant cun dretg da mantegniment fa pajaments anticipads per ses mantegniment a la persuna cun la pussanza dals geniturs, sch'ils geniturs n'adempleschan betg lur obligaziun da mantegniment.
En il rom da la realisaziun dal dretg federal ha il cussegl grond preferì da surdar questa incumbensa a las vischnancas empè da stgaffir in post central spezialisà che fa l'incasso dals aliments per uffants e per dunnas sco er la cussegliaziun ed il pajament anticipà en moda unitara. Sin basa da la repartiziun da las incumbensas tranter il chantun e las vischnancas resguarda la regenza questa decisiun legislativa sco gista. Incumbensas che tutgan tar il champ da l'agid social sco l'incasso dals aliments nunpajads per uffants e per dunnas ston tenor l'urden da cumpetenzas vegnir ademplidas da las vischnancas. Las vischnancas ston prender las mesiras organisatoricas necessarias per quai, e sch'ellas na pon betg ademplir questa incumbensa en moda autonoma pon ellas far quai er ensemen cun autras vischnancas.
La centrala da dunnas dal Grischun è actualmain occupada cun stgaffir in post per l'incasso d'aliments che vegn manà en moda professiunala. Las vischnancas èn libras da liquidar las incumbensas ch'èn lur chaussa numnadamain da gidar ad incassar ils aliments nunpajads per uffants respectvamain per dunnas sur il post per l'incasso d'aliments da la centrala da dunnas dal Grischun.

2. Tenor l'art. 131 al. 1 CCS ha l'autoritad tutelara u in auter post designà dal dretg chantunal da gidar sin dumonda la persuna cun dretg d'aliments ad exequir il dretg da mantegniment en moda adequata e per regla gratuita. Sa basond sin questa disposiziun ha il cussegl grond declerà a chaschun da la revisiun parziala da la lescha introductiva tar il CCS en l'art. 14 al. 4 che la suprastanza communala u che l'uffizi designà d'ella al lieu da domicil da la persuna cun dretg d'aliments saja cumpetenta respectivamain cumpetent. Uschia ha il legislatur chantunal cuntrari a l'opiniun formulada en la dumonda transferì l'art. 131 en la lescha introductiva tar il CCS e designà l'autoritad ch'è cumpetenta en il Grischun per gidar ad incassar ils aliments per dunnas.

3. A la regenza n'èsi betg enconuschent che tschertas vischnancas èn dal tuttafatg inactivas en connex cun il sustegniment concernent il pajament anticipà e l'incasso d'aliments. Correspundentamain na po ella er betg confermar l'opiniun ch'igl existan oz stadis nunpussaivels. Per il cas ch'ina vischnanca n'adempleschia betg sias incumbensas che la vegnan surdadas en la LT tar il CCS sin il champ dal pajament anticipà d'aliments respectivamain da l'incasso dals aliments datti dal rest la pussaivladad d'inoltrar in recurs da surveglianza tar la regenza. Fin ussa n'èn vegnids inoltrads nagins recurs da surveglianza correspundents.

4. La regenza refusa las stentas d'armonisar il pajament anticipà d'aliments e l'incasso dals aliments che han lieu sin plaun federal. Il pajament anticipà d'aliments e l'incasso dals aliments èn incumbensas che tutgan tar il champ da l'agid social ed uschia directamain tar il champ da cumpetenza dals chantuns. La concepziun dal pajament anticipà d'aliments e da l'incasso dals aliments duai pudair vegnir reglada er en l'avegnir autonomamain dals chantuns, e quai resguardond lur relaziuns correspundentas.

Datum: 13 da mars 2006