Navigaziun principala

Cuntegn da la pagina

Dumonda Krättli-Lori concernent las indicaziuns en cifras davart il stgalim superiur da la scola populara e davart la scola media

sessiun: 07.12.2005
Proximamain vegn publitgà il rapport davart il "program central per la scola grischuna 2010". In dals puncts centrals da quest rapport è il rinforzament dal stgalim superiur da la scola populara resp. la nova orientaziun dal gimnasi grischun.

Las variantas proponidas vegnan ad avair consequenzas fitg differentas per nossas scolas e ston perquai vegnir examinadas conscienziusamain. Ina statistica da scola sco quai ch'ella vegn fatga en auters chantuns pudess esser in fitg grond avantatg per l'evaluaziun futura. Tenor las infurmaziuns dal departament cumpetent na vegn ina tala statistica dentant betg manada en il chantun Grischun.

Nus ans drizzain perquai cun las suandantas dumondas a la regenza:

- Pertge na dispona il Grischun betg d'ina statistica da scola? Na fissi betg ura e temp da manar en l'avegnir er en noss chantun ina simpla statistica da scola?

- Co sa repartan las scolaras ed ils scolars suenter la 6. classa primara sin la scola secundara, sin la scola reala e sin il gimnasi inferiur (cifras ca. dals ultims tschintg onns)?

- Quantas repetentas e quants repetents per annada hai dà al gimnasi inferiur ed al gimnasi superiur durant ils ultims tschintg onns?

- Quantas sistidas voluntaras da la scolaziun gimnasiala hai dà (p.ex. per cumenzar in emprendissadi)?

- Tge quota da maturandas e da maturands cumenza in studi ad in'universitad u ad in'autra scola auta?

- Co pon vegnir resguardads en l'avegnir ils differents nivels da furmaziun da la classa pitschna, da la scola reala, da la scola secundara e dal gimnasi inferiur tant en stgalims superiurs pitschens sco er gronds?

Cuira, ils 7 da december 2005

Name: Krättli-Lori, Caviezel-Sutter (Tusaun), Claus, Arquint, Berther (Mustér) Brüesch, Bucher-Brini, Bundi, Butzerin, Cahannes, Capaul, Casty, Cavegn-Kaiser, Christ, Christoffel-Casty, Dermont, Dudli, Farrér, Fasani, Feltscher, Fleischhauer, Gredig, Hanimann, Hardegger, Hartmann (Champfèr), Hess, Hübscher, Jenny, Kessler, Kleis-Kümin, Koch, Luzio, Mani-Heldstab, Märchy, Marti, Meyer-Grass (Claustra), Meyer Persilli (Cuira), Mengotti, Michel, Noi-Togni, Perl, Robustelli, Thomann, Tramèr, Trepp, Vetsch, Zegg, Blarer, Hartmann (Cuira), Pitsch, Toschini

Session: 7.12.2005
Vorstoss: rg Anfrage


Resposta da la regenza

Il program central "scola grischuna 2010" è ina basa da planisaziun e cuntegna ultra d'infurmaziuns davart l'ulteriur svilup da la scola populara previs ils dumbers da naschientschas da las singulas vischnancas grischunas da 1985 - 2004 sco er las quotas da maturitad da las scolas medias grischunas da 1980-2004.

Retschertgas da datas ed evaluaziuns che sa basan sin quai pon visualisar svilups e pon vegnir duvradas sco basa da planisaziun. Registrar ed elavurar las datas è perencunter collià cun custs da temp e da persunal considerabels. Cun resursas che daventan adina pli stgarsas poi resultar generalmain er en il sectur da la statistica che quai ch'ins desiderass ensasez na sa lascha betg realisar. Uschia constatescha l'uffizi federal da statistica (UST) en ina communicaziun a las medias dals 12 da december 2005: "Ils differents programs da spargn chaschunan reducziuns sensiblas en il program da statistica dal UST".

L'onn 2003 ha il cussegl grond tractà la missiva concernent "l'examinaziun da las structuras e da las prestaziuns per sanar las finanzas dal chantun". La regenza ha survegnì l'incarica d'exequir il potenzial da spargn prescrit e da realisar las mesiras deliberadas per sanar las finanzas dal chantun. La realisaziun da las mesiras è vegnida accumpagnada d'ina concentraziun pli intensiva sin l'adempliment d'incumbensas centralas ed uschia er sin ina reducziun da prestaziuns e da plazzas da lavur. Plinavant ha la regenza stuì sin fundament da las intervenziuns Feltscher I e II reducir ulteriuras 70 plazzas entaifer l'administraziun. Er questa decisiun determinanta è stada cumbinada stretgamain cun ina reducziun da prestaziuns da servetsch che vegnivan furnidas fin alura.

Pertutgant l'emprima dumonda stoi perquai vegnir constatà sco suonda: In'extensiun da purschidas per cuvrir il basegn desiderà n'è betg stada cumpatibla ils onns passads cun las prescripziuns strategicas, er betg en il sectur da las retschertgas statisticas, sco per exempel per in'atgna statistica da scola. Plitost hai gì num da sa concentrar sin l'adempliment da las incumbensas centralas. Per il chantun Grischun vala perquai il princip ch'i vegnan retschertgadas mo quellas datas ch'èn stringentamain necessarias per ademplir las incumbensas publicas ubain mo quellas datas che vegnan pretendidas da l'uffizi federal da statistica. Las datas correspundentas sa chattan en l'internet sut (statistica) sco er sut (furmaziun).

Las ulteriuras dumondas pon vegnir respundidas sco suonda, e quai per part sin fundament da retschertgas ad hoc:

- En ils onns da scola passads han ca. 13% da las scolaras e dals scolars da la sisavla classa cumenzà il gimnasi inferiur, ca. 53% la scola secundara e ca. 34% la scola reala u la scola speziala. Questas cifras pon dentant variar levamain dad onn ad onn.

- Da 1999-2005 hai dà las suandantas nunpromoziuns: en l'emprima classa dal gimnasi 2.3%, en la segunda classa 0.9%, en la terza classa 3.7% ed en la quarta fin sisavla classa en media 2.4%.

- Ca. 40% da quellas scolaras e da quels scolars che na vegnan betg promovids, sortan da la scola media. Qua stoi vegnir resguardà che en il decurs da la scolaziun gimnasiala po vegnir repetida mo ina classa. Ina segunda repetiziun n'è betg pussaivla.

- Las quotas da cumenzament da las maturandas e dals maturands grischuns d'in studi ad ina universitad u ad ina SPF sa chattan dapi l'onn 1999 cun stgars 80% levamain sut la media svizra.

- Co ch'ils differents nivels da furmaziun dal stgalim superiur duain vegnir integrads, vegn preschentà en il program central "scola grischuna 2010" cun ils projects prioritars "dapli profunditad che vastadad", "integraziun" e "rinforzament dal stgalim superiur da la scola populara".

Datum: 13 da mars 2006