La famiglia e ses ambient sa midan er en il chantun Grischun. Noss chantun duai esser ina plazza attractiva per la populaziun che lavura. Nus vulessan domiciliar novas interpresas en noss chantun u almain mantegnair las existentas. Er en noss chantun è l'ambient social sa midà. La structura classica da la famiglia, en la quala in genitur sa deditgescha a l'educaziun ed a la tgira dals uffants e l'auter procura per las entradas da la famiglia, è adina main la regla. Adina pli savens vulan u ston lavurar domadus partenaris. Quests novs models da famiglia ch'èn savens er vegnids crititgads cuntegnan ristgas e schanzas per il stadi e per la societad. Il stadi po influenzar mo minimalmain quest svilup. Il stadi sto dentant metter a disposiziun las cundiziuns generalas per in svilup saun, social ed economic.

La responsabladad principala per ils uffants duain surpigliar er vinavant ils geniturs. Noss uffants na duain dentant betg suffrir da l'ambient social ch'è sa midà. Els han il dretg d'ina buna tgira durant l'absenza da lur geniturs. Uffants da la via na pon ins betg responsar ed els chaschunan custs socials exagerads. Per il chantun e per las vischnancas duai esser giavischabel per motivs socials e da l'economia publica da stabilir uras da bloc, maisas da mezdi, agids da far las lezias/ils pensums e canortas. Dal puntg da vista social gidan questas mesiras en ina vasta dimensiun a prevegnir a la negligientscha, a la dependenza ed a difficultads en scola. Uschia spargnan il chantun e las vischnancas blers custs socials. Vischnancas cun structuras dal di han avantatgs per l'arrivada da pèrs cun duas pajas. Pervi da las entradas fiscalas considerablamain pli autas da pèrs cun duas pajas e pervi dals respargns tar ils custs socials dastgassan las vischnancas ed il chantun senz'auter profitar finanzialmain da talas structuras. L'introducziun da structuras dal di sto vegnir adattada als basegns da las singulas valladas.

Structuras dal di en scola rendessan pli attractiv noss chantun sco plazza economica. Il turissem ed il mastergn pudessan profitar ed i pudessan resultar novas plazzas da lavur per indigenas e per indigens. Blers auters chantuns han vis l'avantatg da la concurrenza ed han instradà midadas da structura correspundentas.
Structuras dal di duain vegnir purschidas sin basa voluntara ed en furma orientada a la dumonda. Las utilisadras ed ils utilisaders duessan pajar sumegliantamain sco tar las purschidas da tgira d'uffants cumplementara a la famiglia proporziunalmain a lur capacitad economica e gidar uschia ad obtegnair ina purschida che cuvra ils custs. En noss chantun cumplex dastgassi esser impurtant che las vischnancas hajan ina gronda autonomia per concepir e per finanziar la purschida.

Nus envidain la regenza da far in rapport davart las suandantas dumondas sco er da proponer mesiras ed eventualas midadas da lescha:

- Co pon la scolina e la scola populara vegnir purschidas en noss chantun sco scolas dal di, senza che mintga vischnanca vegnia sfurzada da far quai?

- Co poi tuttina vegnir garantì che mintga uffant possia frequentar ina scola dal di en ina distanza adequata?

- Co pon vegnir realisadas en noss chantun la voluntariadad da l'utilisaziun ed ina realisaziun che cuvra ils custs?

Cuira, ils 7 da december 2005

Name: Feltscher, Robustelli, Cahannes, Berther (Mustér), Casanova (Cuira), Casty, Christ, Claus, Donatsch, Hanimann, Hess, Kessler, Koch, Krättli-Lori, Loepfe, Marti, Meyer-Grass (Claustra), Mengotti, Michel, Noi-Togni, Perl, Pfister, Rizzi, Thomann, Tramèr, Tremp, Zegg, Blarer, Campell, Hartmann (Cuira), Toschini

Session: 7.12.2005
Vorstoss: rg Auftrag