Navigation

Inhaltsbereich

Incumbensa Jäger concernent il model d'impuls en connex cun las taglias da traffic per vehichels a motor che dovran carburants cun substanzas pauc nuschaivlas

Sessiun: 07.12.2005
Tenor il protocol da Kyoto è la Svizra s'obligada da reducir la svapur da CO2. Questa svapur sto vegnir sminuida sin tut il mund. Per l'avegnir da l'entir planet èsi decisiv da cuntanscher las finamiras globalas fixadas. Ils models dal clima renconuschids da la scienza mussan cleramain che gist las regiuns da las Alps èn pertutgadas fermamain da l'augment sfrenà da la temperatura. Il svilup da las temperaturas (medias) dals ultims onns conferma questa tendenza er per noss chantun. Valurs extremas resp. eveniments extrems s'augmentan. En connex cun ils gronds donns da las malauras da l'onn 2005 ha il chantun Grischun puspè sentì quai. En quest process da la midada dal clima è dentant la svapur da CO2 in factur decisiv che nus pudain, gea stuain influenzar.

En quest senn èn ultra da l'agricultura, da las interpresas da servetsch e da las chasadas privatas dumandads tut ils plauns statals e cunzunt noss chantun d'examinar tut las mesiras che pudessan sminuir la svapur da CO2 e la svapur d'autras substanzas nuschaivlas e, sche pussaivel, da realisar effectivamain questas mesiras. En quest connex ha il cusseglier federal Merz supplitgà da curt en ina intervesta ils chantuns da crear impuls correspundents cun la taglia sin ils vehichels a motor („NZZ am Sonntag“ dals 27 da november 2005).

Las taglias da traffic èn regladas en il Grischun en la lescha chantunala davart las vias. Tenor la disposiziun da l'art. 84d al. 2 vegn la taglia da princip calculada tenor la prestaziun fiscala u tenor il pais total dal vehichel, premess ch'i na stoppian betg vegnir applitgadas taxas fixas en cas spezials. Las tariffas da taglia concretas èn lura fixadas sin il stgalim da l'ordinaziun. Per vehichels cun tracziun electrica u ibrida vegn en quest connex applitgà gia oz ina tariffa speziala.

La regenza è dumandada d'integrar en la legislaziun chantunala ultra dals criteris existents er la svapur da CO2 sco element directiv supplementar per fixar las taglias da traffic en noss chantun. Plinavant ston vegnir examinads ulteriurs models d'impuls che promovan pli e pli la midada sin vehichels a motor che dovran carburants cun substanzas pauc nuschaivlas.

Cuira, ils 7 da december 2005

Name: Jäger, Meyer-Grass (Claustra), Tomaschett, Arquint, Bucher-Brini, Christ, Christoffel-Casty, Conrad, Dermont, Frigg-Walt, Jaag, Jenny, Joos, Keller, Kleis-Kümin, Luzio, Meyer Persili (Cuira), Mengotti, Noi-Togni, Parolini, Peyer, Pfenninger, Pfiffner, Pfister, Righetti, Robustelli, Schmid, Tremp, Trepp, Zindel, Brasser, Caviezel (Cuira), Florin-Caluori, Toschini

Session: 7.12.2005
Vorstoss: rg Auftrag

Resposta da la regenza

Sa basond sin la lescha federala davart l'imposiziun dals automobils incassa la confederaziun da l'importader u da l'importadra per automobils da transport da persunas e da rauba ina taglia d'import da 4 pertschinet dal pretsch da cumpra. Ina gruppa da lavur cun represchentantas e cun represchentants dal DATEC e da l'administraziun da duana ha examinà, sch'i duain vegnir stgaffids impuls finanzials per promover vehichels ch'èn effizients cun duvrar energia e che chaschunan paucas substanzas nuschaivlas. Ultra d'ina graduaziun da la tariffa da taglia existenta ha la gruppa examinà er in sistem da bonus-malus. Ils 23 da november 2005 ha decidì il cussegl federal da betg proseguir la concepziun nova da la taglia sin ils vehichels sco taglia d'incitaziun per l'ecologia. Tenor la communicaziun da las medias dal departament federal da finanzas pia gist da quel departament che suttastat a cusseglier federal Merz avessan las variantas examinadas effect d'incitaziun fitg pitschen. La finamira d'incitaziun (augmentar las quotas da participaziun al martgà per vehichels ch'èn effizients en il diever d'energia e che chaschunan paucas substanzas nuschaivlas) vegnia cuntanschida er senza impuls finanzials supplementars en la gronda part da tut las venditas d'autos effizients en il diever d'energia e che chaschunan paucas substanzas nuschaivlas. Ultra da quai na fetschia la finamira da substituziun (cumpra d'in auto ch'è effizient en il diever d'energia e che chaschuna paucas substanzas nuschaivlas) nagin effect tar ina gronda part da las cumpras d'autos.

Conclusiuns sumegliantas possian ins trair or da las experientschas cun sistems d'impuls en la legislaziun chantunala da taglia sin ils vehichels a motor. En ils onns 1985 fin 1987 aveva la garanzia d'ina reducziun da la taglia da traffic da 50 %, en cas da cumpra da vehichels cun catalisatur, motivà mo paucas persunas da cumprar in nov vehichel. En il chantun Lucerna vegniva reducida a partir dal 1. da schaner 1996 tranter auter la taglia da traffic per vehichels a motor fitg spargnus e levs per 50 %. Quest privilegi da taglia è vegnì abolì a partir dal 1. da schaner 2003, perquai che sa basond sin in'examinaziun fatga d'ina gruppa externa da l'administraziun ins n'ha betg pudì constatar "resultats evidents". En il Grischun pudess per in auto da persunas cun 2000 cm² cilindrada vegnir spargnà en in onn 285 francs taglia, e quai gnanc per "l'entira vita" d'in auto. Sch'ins parta dal fatg ch'i po vegnir garantì in privilegi da taglia mo per vehichels che adempleschan valurs da svapur pli severas che quai ch'igl è prescrit en la lescha, durassan ils ciclus da bonus correspundentamain al svilup da fin ussa quatter fin tschintg onns. A partir dal 1. d'october 1996 han stuì ademplir uschia autos da persunas importads en Svizra la prescripziun da svapur Euro 2. A partir da l'onn 2001 èn valaivlas las normas Euro 3 ed a partir dal 1. da schaner 2006 èn obligatoricas las normas Euro 4. En vista al pitschen potenzial da spargn da tals models d'impuls pon ins strusch cuntanscher in effect d'incitaziun, tant pli che tenor il TCS importan las taglias da traffic mo 3.4 pertschient dals custs da gestiun annuals d'in auto da persunas.

Sper la mancanza da l'effect d'incitaziun mainan tals models d'impuls en vista a la finamira er resultats nungiavischads e stgaffeschan perfin ingiustias. Il cuntegn da substanzas nuschaivlas en las svapurs da motors termics vegn eruì resp. inditgà cun grams per kilometer. Da quai resulta che la svapur annuala da substanzas nuschaivlas d'in vehichel a motor s'augmenta correspundentamain a la prestaziun da kilometers. Quest fatg pudess manar a la situaziun ch'in vehichel a motor classifitgà sco "net" vegn privilegià da la taglia e quai per motivs ecologics schebain ch'el producescha sin fundament da sia prestaziun annuala da kilometers superiura tuttina bleras, sche betg pli bleras substanzas nuschaivlas per l'ambient che in vehichel cun valurs da svapur main bunas. Per mancanza da cumpetenzas legislativas èsi scumandà al chantun da prescriver quintaders da prestaziun per autos e perquai na pudess ins betg curreger quest "resultat fallà". A la fin ha er il stil da manischar ina influenza decisiva sin las emissiuns d'in vehichel a motor. En la pratica po effectuar il stil da manischar tar il medem vehichel valurs da svapur enorm divergentas.

Per tut quests motivs propona la regenza da betg acceptar l'incumbensa qua avant maun.

Datum: 13 da mars 2006