Navigation

Inhaltsbereich

Sessiun: 24.04.2006
Tenor las experientschas d'advocatas e d'advocats, d'assistentas e d'assistents sco er d'amias e d'amis da persunas pertutgadas vegnan applitgadas en il Grischun las cundiziuns per l'arriv successiv da la famiglia en moda fitg rigida, e quai tenor ils bustabs e betg tenor il senn. Tar in petent che ha stuì inoltrar durant ils onns trais dumondas per in arriv successiv da la famiglia sa tractavi uschia la finala apparentamain d'ina entrada memia pitschna da 20 francs il mais che ha chaschunà ina nova refusa. Pir suenter ch'ins aveva chattà in'abitaziun pli favuraivla, ha la dumonda alura stuì vegnir approvada in pèr mais pli tard.

Medemamain problematica è tenor l'avis da la fracziun da la PS l'applicaziun da la midada dal stadi d'asil a la permissiun per persunas estras. En in cas da conflict van persunas che pudessan profitar da l'arriv successiv da la famiglia a star tar lur parentella. Quai è p.ex. stà il cas durant las guerras dal Balcan. L'exempel il pli enconuschent en quest connex è la famiglia Kolic da Wiesen.

En tals cas accentuescha la polizia da persunas estras sco ch'i para adina puspè che l'introducziun da la procedura per l'arriv successiv da la famiglia na saja betg pussaivla senza che las persunas pertutgadas partian l'emprim puspè da la Svizra. En cas, nua che l'arriv successiv da la famiglia è atgnamain incontestà, è quai ina direzza nunnecessaria e fa che la procedura vegn bler pli chara per las petentas e per ils petents.
Dumondas avertas datti er en connex cun l'arriv successiv da la famiglia tar persunas minorennas. En quest sectur enconuscha la confederaziun mo ina prescripziun minimala: Mo uffants minorens pon entrar en Svizra sut il titel da l'arriv successiv da la famiglia.

I para dentant ch'il chantun Grischun applitgeschia atgnas reglas. Evidentamain enconuschan ins in cas, nua ch'igl è vegnì explitgà ch'i na possia betg vegnir emessa ina permissiun per uffants sur 14 onns. En il medem cas è la procedura vegnida tratga a la lunga uschè ditg cun impediments giuridics, ch'intgins uffants han surpassà la limita da 18 onns en il fratemp. Quai dat l'impressiun ch'il dretg da l'arriv successiv da la famiglia vegnia impedì cun meds birocratics, cunquai che la data da la decisiun e betg la data da la dumonda è decisiva per la limita da vegliadetgna.

Las commembras sutsegnadras ed ils commembers sutsegnaders da la fracziun da la PS supplitgeschan la regenza da respunder las suandantas dumondas:

1. Co sa preschenta la pratica en cumparegliaziun cun auters chantuns svizzers? Co èsi pussaivel ch'in arriv successiv da la famiglia che vegn approvà insanua auter senza problems vegn refusà en il chantun Grischun?

2. Pudess la situaziun vegnir mitigiada tras ina regulaziun, tar la quala in'entrada cumplementara da la part da la famiglia che arriva successivamain vegniss quintada vitiers?

3. Co pudess tenor l'avis da la regenza ed en il senn d'ina tradiziun umanitara dal chantun Grischun en il cas d'ina famiglia cun blers uffants sco la famiglia Kolic sa preschentar en l'avegnir ina pratica favuraivla a l'uman?

4. Tge è la regenza pronta da far per simplifitgar la procedura e per la meglierar en l'interess da las persunas pertutgadas en cas sco quai ch'els èn vegnids menziunads al cumenzament?

5. È la regenza pronta da drizzar il dretg da l'arriv successiv da la famiglia tenor las pretensiuns minimalas da la confederaziun e da desister dad atgnas reglas pli rigurusas areguard la limita da vegliadetgna?

6. È il chantun pront da renconuscher la data da las dumondas (cun excepziun da dumondas che n'han evidentamain naginas schanzas) sco data decisiva per la limita da vegliadetgna, e quai en il senn d'ina fairness giuridica e per accelerar la procedura?

Cuira, ils 24 d'avrigl 2006

Name: Pfiffner, Peyer, Trepp, Arquint, Baselgia, Bucher-Brini, Frigg, Jaag, Jäger, Meyer Persili (Cuira), Noi, Pfenninger, Schütz, Zindel, Brasser, Caviezel (Cuira)

Session: 24.04.2006
Vorstoss: rg Anfrage


Resposta da la regenza

Las premissas per l'arriv successiv da la famiglia èn fitg differentas tut tenor la lescha che sto vegnir applitgada. Burgaisas e burgais da la UE/AECL basegnan sin basa da la cunvegna davart la libra circulaziun mo in'abitaziun adequata. Tar persunas da terzs stadis han ils chantuns ina tscherta libertad da decider sulettamain en il rom dal dretg da persunas estras. En il sectur dal dretg d'asil na pon ils chantuns permetter nagins arrivs successivs da la famiglia.

1. Sin dumonda da las scheffas e dals schefs da la polizia da persunas estras da la Svizra orientala e dal principadi da Liechtenstein han las directuras ed ils directurs da giustia e da polizia da la Svizra orientala relaschà in'unificaziun da la pratica, e quai per evitar uschenavant sco pussaivel ch'i dettia decisiuns differentas tar l'admissiun da persunas da terzs stadis. Per giuditgar dumondas per in arriv successiv da la famiglia sa tegna il Grischun vi da las directivas sco er vi da las decisiuns da la dretgira administrativa chantunala.

2. Tar la calculaziun da las relaziuns finanzialas ston tenor la giurisdicziun da la dretgira administrativa vegnir resguardadas sut tschertas circumstanzas er las entradas d'ina persuna che po profitar da l'arriv successiv. Questa giurisdicziun vegn applitgada tar l'examinaziun da dumondas per in arriv successiv da la famiglia. L'activitad da gudogn resp. las entradas supplementaras ch'èn cumbinadas cun quai vegnan resguardadas, sch'igl è avant maun ina permissiun concreta e cumprovada e quai betg mo per in curt temp sco er sche quai è permess areguard il martgà da lavur.

3. En il sectur da l'arriv successiv da la famiglia da persunas da terzs stadis èn fixadas premissas en il dretg federal che ston vegnir observadas obligatoricamain per dar ina permissiun. Latiers tutgan er in'abitaziun adequata e meds finanzials suffizients. Il dretg federal na prevesa betg ch'ina tradiziun umanitara, che n'è betg definida pli detagliadamain, e ch'ina pratica futura favuraivla a l'uman vegnian resguardadas; quai chaschunass che la permissiun vegniss concedida illegalmain. La regenza s'engascha per exequir correctamain la legislaziun davart las persunas estras e n'è betg pronta d'introducir ina pratica giuridicamain ineguala u schizunt illegala.

4. Las proceduras per admetter persunas estras èn concisas ed effizientas. Las premissas legalas per dar ina permissiun pretendan inevitablamain intgins scleriments. Quels na chaschunan dentant betg proceduras cumplitgadas. Da las petentas e dals petents dastga vegnir pretendì ch'ellas e ch'els inoltreschian ils documents ch'èn necessaris per giuditgar las permissiuns dumandadas. Ulteriuras simplificaziuns n'èn betg pussaivlas, sche la pratica duai esser confurma a las leschas.

5. Per persunas da terzs stadis cun ina permissiun da dimora per in onn ha l'uffizi da fatgs da polizia e da dretg civil fixà en il rom da la libertad chantunala da decider la vegliadetgna per l'arriv successiv a 14 onns. Suenter è in arriv successiv pussaivel, sche la persuna che po profitar da l'arriv successiv ha ina plazza d'emprendissadi ed enconuschientschas linguisticas suffizientas. La finamira da la politica da migraziun duai esser quella da trair suenter la famiglia a temp, per ch'ils uffants e per ch'ils giuvenils possian vegnir integrads bain. I duai vegnir evità che giuvenils arrivan pir tard en Svizra e vegnan confruntads directamain cun la dischoccupaziun. Las experientschas han mussà ch'i dat dapli problems socials, sche l'arriv successiv da la famiglia ha lieu pir tard. Sin basa da ponderaziuns da la politica d'integraziun è sa cumprovada la limita da vegliadetgna da
14 onns tar l'arriv successiv da la famiglia da persunas da terzs stadis. Per regla pon uffants pli giuvens anc s'integrar bain, perquai ch'els emprendan er relativamain svelt la lingua. Tar giuvenils pli vegls è ina integraziun professiunala e linguistica savens fitg difficila.

6. Per prender sias decisiuns sa basa l'uffizi da fatgs da polizia e da dretg civil sin la data da la dumonda. Tenor la giurisdicziun da la dretgira administrativa e dal tribunal federal ston ins cun excepziun da persunas cun ina permissiun C sa basar en las proceduras da recurs sin ils fatgs ch'èn avant maun il mument da la decisiun.

Datum: 3 fanadur 2006