Navigation

Inhaltsbereich

Dumonda Schütz concernent umans en situaziuns da vita spezialas

Sessiun: 24.04.2006
Quai ch'è vesaivel en tut la Svizra, sa mussa er en il Grischun. Il dumber d'umans che basegnan agid immaterial e material è creschì betg nunspetgadamain en ina tala dimensiun che n'ans permetta betg da passar a l'urden dal di. La lescha davart l'agid social public en il chantun Grischun mussa cleramain la direcziun da l'agid:

L'intent da l'agid social public è l'agid per gidar sasez e la promoziun da l'atgna responsabladad. Cun cussegliaziun, cun assistenza, cun intermediaziun da prestaziuns da servetsch e cun agid material sa stentan ils servetschs socials da prevegnir a difficultads vegnintas sco er da cumbatter u minimar situaziuns d'urgenza e lur motivs. Uschenavant la lescha.

En il center duai star la cussegliaziun sociala, per che las dunnas pertutgadas, per ch'ils umens e per ch'ils giuvenils pertutgads possian vegnir manads puspè sin la via da l'independenza e per ch'in agir en atgna responsabladad possia vegnir pussibilità.

Nus essan da l'opiniun che sin basa dals dumbers da cas la dumonda sto vegnir tschentada, sche la finamira, sche la cussegliaziun e sche l'integraziun en in'activitad da gudogn sajan pussaivlas. I sto vegnir impedì cun tut ils meds pussaivels ch'in uman glischna a l'ur da la societad. Ad umans en situaziuns da vita spezialas sto vegnir purschida ina cussegliaziun adequata. I sa chapescha da sasez ch'in agid material per reducir il privel d'in impovriment po esser necessari en tscherts cas.

Nus vivain en ina societad che pretenda ina buna scolaziun ed ina furmaziun supplementara per entrar en ina professiun u per cumenzar cun in'activitad da gudogn. Nus essan da l'avis che bleras persunas pertutgadas han pervi da lur derivanza famigliara in tschert basegn da scolaziun e da cussegliaziun per bandunar lur dischoccupaziun. Sin basa da questas ponderaziuns è ina buna cussegliaziun en ils posts spezialisads dals servetschs socials regiunals stringentamain necessaria ed ha pervi da quai er in caracter preventiv.

Da l'agricultura savain nus ch'ins sto semnar avant ch'ins po racoglier. Intgins dals sems semnads èn gia setgads vi, auters basegnassan urgentamain aua per ch'els possian purtar fritg. Il squitsch da spargnar ha chaschunà che plazzas da cussegliaziun vacantas èn vegnidas occupadas pir mais pli tard. Las incumbensas creschentas ed il squitsch da lavur adina pli grond restrenschan considerablamain il temp da cussegliaziun che po vegnir impundì per persuna pertutgada. Ils custs per il stadi e per la communitad vegnan a s'augmentar pervi dal temp da cussegliaziun che manca e pervi da l'indebitament da la persuna singula che crescha.

1. Pervi da quai dumandain nus la regenza, co ch'ella vul cumbatter il dumber creschent d'umans en situaziuns da vita spezialas.

2. Tge pensa ella da far per che la lescha davart l'agid social vegnia observada meglier, uschia ch'il princip da l'agid per gidar sasez possia vegnir realisà pli savens?

3. Quants cas avess ina lavurera sociala u in lavurer social da tractar a l'avis da la regenza, sch'ella u sch'el è engaschà per 100%?

Cuira, ils 24 d'avrigl 2006

Name: Schütz, Bucher-Brini, Baselgia, Arquint, Bleiker, Butzerin, Caviezel-Sutter (Tusaun), Christ, Frigg, Hanimann, Hartmann, Hess, Jaag, Jäger, Joos, Koch, Krättli-Lori, Lemm, Mani-Heldstab, Marti, Meyer-Grass (Claustra), Meyer Persili (Cuira), Michel, Noi, Peyer, Pfenninger, Pfiffner, Pfister, Sax, Trepp, Zindel, Brasser, Caviezel (Cuira)

Session: 24.04.2006
Vorstoss: rg Anfrage


Resposta da la regenza

Cuntrari a la gronda part dals chantuns vegn en il chantun Grischun la cussegliaziun da persunas en situaziuns finanzialas d'urgenza u cun problems socials messa a disposiziun e finanziada dal chantun e betg las vischnancas. La purschida da cussegliaziun ha in bun standard e vegn prestada en moda professiunala da collavuraturas e da collavuraturs en ils servetschs socials regiunals. La dumonda da cussegliaziun e la cumplexitad dals cas sco er il dumber da cas per collavuratura respectivamain per collavuratur èn creschids ils ultims onns.

Resposta a las dumondas

1. La regenza ha prendì differentas mesiras l'ultim temp per far frunt a la chargia creschenta dals servetschs socials regiunals:

- Il mars 2004 ha ella distgargià ils servetschs socials regiunals da differentas incumbensas che tutgan tar il champ da cumpetenza da las vischnancas, ch'èn dentant vegnidas ademplidas pli baud per motivs da l'effizienza, dentant senza ina basa legala dals servetschs socials.

- Er il mars 2004 ha ella autorisà l'uffizi dal servetsch social da duvrar las entradas, che vegnan realisadas cun administrar ils mandats tutelars, per finanziar ina plazza supplementara en ils servetschs socials. Cun questa mesira ha puspè pudì vegnir cumpensada la reducziun d'ina ulteriura plazza d'ina lavurera sociala u d'in lavurer social sco ch'ella fiss stada necessaria realisond l'incumbensa Feltscher.

- En il preventiv 2006 ha ella dumandà il cussegl grond da finanziar trais plazzas da lavureras socialas u da lavurers socials a donn e cust dal quint administrativ, plazzas ch'èn vegnidas finanziadas ils onns 2004 e 2005 tras la dieschma d'alcohol. Il cussegl grond ha alura acceptà questa dumonda.

- En il preventiv 2006 ha ella stgaffì ina plazza per ina manadra u per in manader da project per coordinar e per meglierar la collavuraziun instituziunala. Cun intensivar la collavuraziun dals servetschs socials cun ils centers regiunals per intermediaziun da lavur, cun ils uffizis da la AI e cun autras partenarias e cun auters partenaris en il sectur da la collavuraziun interinstituziunala (CII) duai vegnir promovida l'integraziun sociala e professiunala da las retschavidras e dals retschaviders d'agid social.

- Ils posts chantunals da servetsch ch'èn activs en il sectur da la segirezza sociala ha ella concentrà per il 1. da schaner 2007 en il departament d'economia publica e fatgs socials. Da quai sa permetta ella in'optimaziun dals andaments e da las proceduras tar cas respectivamain en quels champs d'incumbensa, tar ils quals èn participads differents posts da servetsch.

2. Il princip da l'agid per gidar sasez vegn intensivà cun integrar las clientas ed ils clients en il process da cussegliaziun. Ina midada dal cumportament persistenta e necessaria po mo vegnir cuntanschida, sche la persuna pertutgada chapescha il senn da la midada e po er vegnir motivada da la far. En il futur sto vegnir lavurà pli ferm en quest senn. En questa direcziun mussan er las novas directivas da la COSAS e las disposiziuns executivas tar la lescha davart il sustegn da persunas basegnusas ch'èn vegnidas relaschadas da la regenza.

3. I n'è betg ina soluziun cunvegnenta, sche la regenza definescha in dumber fix da cas per ina lavurera sociala u per in lavurer social en uffizi cumplain. L'onn 2004 era la media dals cas per collavuratura u per collavuratur dals servetschs socials regiunals cun in engaschament da 100% tar 99, l'onn 2005 tar 98 dossiers. Quest dumber da cas è pli aut ch'ils onns precedents.
La dotaziun persunala dals servetschs socials regiunals ed uschia il dumber da cas per collavuratura u per collavuratur en ils servetschs socials regiunals dependan da l'intensitad da cussegliaziun, che la singula clienta u ch'il singul client duai survegnir, da las cundiziuns da basa finanzialas dal chantun e da la repartiziun dals meds finanzials sin il plaun politic. En quest champ da tensiun sa stenta la regenza da metter a disposiziun avunda resursas persunalas als servetschs socials regiunals per in'activitad da cussegliaziun adequata. Sche l'integraziun da retschavidras e da reschaviders d'agid social gartegia na dependa dal rest betg mo da l'engaschament dals servetschs socials, mabain er da las schanzas e da las pussaivladads che quests umans en situaziuns da vita spezialas survegnan sin il martgà da lavur.

Datum: 11 da zercladur 2006