Navigation

Inhaltsbereich

Dumonda Bucher-Brini concernent las directivas da la conferenza svizra da l'agid social (COSAS)

Sessiun: 25.04.2006
Suenter la revisiun da las directivas da la conferenza svizra da l'agid social COSAS èn entradas en vigur en il chantun Grischun las disposiziuns executivas tar la lescha davart il sustegn da persunas basegnusas DEtLS per il 1-1-2006. En l'agid social duain las novas directivas da la COSAS dar impuls per la reintegraziun, promover mesiras d'integraziun, cumbatter l'abus ed unifitgar la pratica da l'agid social en Svizra.Emprimas experientschas ch'ils servetschs socials regiunals e ch'ils posts spezialisads han fatg mussan che las DEtLS han procurà en emprima lingia ch'il nivel da las prestaziuns è vegnì sbassà, e quai betg dapertut en la medema dimensiun. Tenor la federaziun professiunala da lavur sociala, AvenirSocial Grischun, èn pertutgadas da quai en spezial persunas che educheschan sulettas e famiglias. Sco ch'i para ha la pratica er violà il tractament egual d'umans malsauns e d'umans impedids. En tscherts cas è vegnì dà in impuls negativ che ha per consequenza che umans vegnan en l'agid social u restan en tal.In'evaluaziun da tut ils 55 dossiers da persunas che retiran agid social da la pro infirmis dal Grischun ha mussà che las perditas tar ils pajaments da l'agid social da lur clientella pertutgada da malsogna u d'impediment èn fitg differentas, e quai tut tenor la gruppa da clientella:
dumber dals dossiers evaluads 55 media da las midadas da la summa dal pajament mensil:

gruppa da clientella (cun il dumber da dossiers) en pertschients en francs
pèrs senza uffants (14) 0 - 8.25
persunas che vivan sulettas (22) - 2 - 26.65
persunas giuvnas creschidas da 18 fin 25 onns (3) - 6 - 99.55
famiglias cun uffants en scola/scolaziun (11) -9 - 301.15
persunas che educheschan sulettas cun uffants en scola/scolaziun (5) - 29 - 323.70


En quest connex tschentain nus las suandantas dumondas a la regenza:
1. Ina da las quatter finamiras da l'ultima revisiun da las directivas da la COSAS è stada d'unifitgar las directivas en tut la Svizra.Co motivescha la regenza la divergenza cun surpigliar cumplainamain las directivas? È ella pronta da prender mesiras per cuntanscher las finamiras d'ina unificaziun da l'agid social en l'entira Svizra (resguardond las particularitads regiunalas sco p.ex. las regulaziuns dal tschains da locaziun)?

2. Enconuscha la regenza las cifras da la pro infirmis che cumprovan che famiglias survegnan 9% e persunas che educheschan sulettas schizunt 29% main agid social dapi la revisiun da las directivas da la COSAS, entant che la situaziun è cleramain meglra per pèrs senza uffants cun 0% e per persunas che vivan sulettas cun -2%?Co èn las cifras da la clientella che vegn assistida dals servetschs socials regiunals e che concernan las midadas dal preventiv areguard il basegn brut da sustegn (senza la deducziun da las entradas) en cifras e pertschients?

3. Las directivas da la COSAS en il chantun Grischun vegnan - sco ch'i para - interpretadas actualmain uschia ch'ils imports d'entrada libers da taglia, ch'ils supplements d'integraziun e ch'il supplement minimal d'integraziun na vegnan betg resguardads cun fixar il basegn da sustegn. Il resultat da quai è che umans che vivan mo pauc sur il minimum d'existenza èn cleramain dischavantagiads envers umans che profiteschan da l'agid social.
Sa la regenza che l'interpretaziun actuala chaschuna che persunas, che vegnan sustegnidas parzialmain, pon vegnir exclusas da l'agid social, sch'ellas augmentan lur grad d'occupaziun, e che quai signifitgass grondas perditas finanzialas? D'ina vart vegnan uschia a crudar davent las prestaziuns ch'èn determinadas da la situaziun (p.ex. midada en in'abitaziun pli bunmartgada, custs supplementars che vegnan chaschunads da l'impediment e.u.v.) sco er la surpigliada d'ina retscha d'expensas supplementaras (franschisa da la cassas da malsauns e resalva persunala, assicuranza da mobigliar ed assicuranza da responsabladad, dentista resp dentist). Da l'autra vart na po betg vegnir profità da prestaziuns che correspundan als basegns sco il pajament da la reducziun cumplaina da las premias u sco la liberaziun da taglia.Vesa la regenza er in basegn d'agir en questa chaussa?

4. Sa la regenza che persunas che educheschan sulettas cun uffants sut 3 onns na survegnan betg ils supplements correspundents da 200 francs ch'èn previs da las directivas da la COSAS ed ha la regenza planisà mesiras correspundentas che vegnan da mitigiar las consequenzas da quest fatg per ils uffants dals umans ils pli povers?

5. Las novas directivas da la COSAS prevesan in uschenumnà supplement minimal d'integraziun da 100 francs che duai procurar che umans, ch'èn impedids pervi d'ina malsogna u pervi d'in impediment da furnir ina prestaziun d'integraziun, survegnan ina pitschna cumpensaziun materiala, perquai ch'els na pon betg s'acquistar auters supplements. Vegn quest supplement pajà en il futur e sche na, è la regenza conscienta che quai cuntrafaschess al dretg federal ed al dretg chantunal vertent (en spezial a l'art. 8 al. 2 CF ed a l'art. 2 al. 4 LImp en cumbinaziun cun art. 3 lit. e)?

6. Umans che retiran agid social na survegnan nagins supplements d'integraziun, sch'els retiran in'entrada parziala da l'indemnisaziun da dischoccupaziun e sch'els fan part il medem mument d'in program dal center regiunal per intermediaziun da lavur. En il medem program survegnan ils medems umans - suenter ch'els èn vegnids privads dal dretg da schurnada da l'assicuranza cunter la dischoccupaziun - tut tenor en ina giada in supplement d'integraziun da 300 francs.Sa la regenza che betg tut ils umans che lavuran na vegnan remunerads da l'agid social per questa prestaziun d'integraziun, e tge mesiras fa ella quint da prender per betg dar in impuls negativ che avess per consequenza che tals umans vegnissan en l'agid social, perquai ch'els pudessan cuntanscher ina meglieraziun da lur situaziun finanziala tras quai?

7. Pervi da las novas directivas da la COSAS èn las vischnancas obligadas da metter a disposiziun programs d'integraziun ad umans che retiran agid social.Tge mesiras planisescha la regenza per sustegnair d'ina vart las vischnancas en connex cun las plazzas d'integraziun e / u per metter sezza a disposiziun da l'autra vart tals programs per umans che retiran agid social?

Cuira, ils 25 d'avrigl 2006



Name: Bucher-Brini, Michel, Christoffel-Casty, Arquint, Baselgia, Butzerin, Casanova (Cuira), Cavigelli, Christ, Frigg-Walt, Jaag, Jäger, Jenny, Koch, Luzio, Meyer-Grass (Claustra), Meyer Persili (Cuira), Mengotti, Noi, Peyer, Pfenninger, Pfiffner, Portner, Robustelli, Schütz, Trepp, Zanolari, Zindel, Brasser, Caviezel (Cuira), Mainetti
Session: 25.04.2006
Vorstoss: rg Anfrage

Resposta da la regenza

Las disposiziuns executivas tar la lescha davart il sustegn da persunas basegnusas (DEtLS) entradas en vigur il 1. da schaner 2006 garanteschan ina pratica unitara da las vischnancas per fixar l'agid social material. Ellas sa basan sin las directivas da la COSAS ch'èn vegnidas revedidas l'onn 2005.

1. Las disposiziuns executivas tar la lescha davart il sustegn da persunas basegnusas realiseschan tut las finamiras che la COSAS ha persequità cun la revisiun da sias directivas per concepir e per fixar l'agid social, numnadamain rinforzar ils impuls materials, da promover l'integraziun e d'unifitgar la pratica da l'agid social. Cun concepir las disposiziuns executivas tar la lescha davart il sustegn da persunas basegnusas è la regenza s'orientada en tut ils secturs essenzials a las directivas da la COSAS. En quest connex ston ins far attent al fatg che la COSAS ha - cun introducir adina pli savens marschas tar las recumandaziuns - concedì conscientamain la pussaivladad als posts ch'èn cumpetents per il sustegn d'adattar las tariffas a las cundiziuns chantunalas e localas respectivas. Correspundentamain è la regenza da l'avis ch'i na saja betg necessari da prender mesiras per unifitgar anc pli fitg l'agid social.

2. En connex cun las cifras da la pro infirmis menziunadas en la dumonda na po la regenza betg prender posiziun, perquai ch'ella na las enconuscha betg. Decleraziuns liantas davart las consequenzas da las directivas novas da la COSAS e da las DetLS n'èn betg pussaivlas avant la mesadad da l'onn 2007. Ina evaluaziun provisorica dals pajaments totals da la citad da Cuira - fatga da l'uffizi dal servetsch social - mussa per ils mais da favrer e da mars 2006 il suandant resultat graduà tenor la grondezza da la famiglia:

Zur Detailansicht klicken

Clientella, tar la quala l'agid social è sa sminuì, han - cumpareglià cun la contribuziun da sustegn pajada fin qua - en media ina reducziun da l'agid social pli pitschna che quai ch'i resultass atgamain cun applitgar las recumandaziuns da la COSAS davart il basegn fundamental material. Unicamain tar duas categorias da la chasada (persunas che vivan sulettas e pèrs cun tschintg uffants) è succedida ina reducziun pli gronda da l'agid social material.

3. Areguard las directivas per eruir il basegn da sustegn na vesa la regenza nagina necessitad d'agir. Cun ils custs per fixar ils bains necessaris per viver numnads en l'art. 2 da las disposiziuns executivas è vegnida surpigliada la limita da las directivas da la COSAS. Ins po metter ils bains necessaris per viver ch'èn relevants per il sustegn nua ch'ins vul, i dat adina persunas che vivan stgarsamain sur quella limita e ch'èn dischavantagiadas, cumpareglià cun las persunas cun dretg da sustegn. Dauzar l'import da bains necessaris per viver ch'èn relevants per il sustegn avess dal rest consequenzas directas per las vischnancas.

4. La regenza ha - en cunvegnientscha cun las regenzas chantunalas da la Svizra orientala - fixà ch'i na tanschia betg mo da surpigliar las obligaziuns da l'educaziun dals uffants per survegnir il dretg d'in supplement d'integraziun. Uschenavant che persunas che educheschan sulettas demussan ultra da l'adempliment da las incumbensas famigliaras anc activitads per s'integrar socialmain, pon er ellas giudair ils supplements d'integraziun.

5. Ils supplements d'integraziun da 100.- francs al mais ston vegnir pajads a tut las persunas ch'èn prontas da surpigliar in'occupaziun, pia er a persunas, a las qualas la vischnanca na po betg porscher in'occupaziun che correspunda a lur abilitads individalas. Correspundentamain n'esi betg chapibel quant enavant che l'art. 6 al. 1 da las disposiziuns executivas tar la lescha da sustegn duess cuntrafar al dretg vertent federal e chantunal.

6. Mo cun ademplir las pretensiuns dals posts externs cun ina incumbensa d'integraziun e cun in'obligaziun da collavurar correspundenta, sco p. ex. il CIL, na resulta tenor las directivas da la COSAS betg in dretg sin in supplement d'integraziun. Per persunas che retiran prestaziuns da l'assicuranza cunter la dischoccupaziun èsi ina cundiziun fundamentala da sa participar als programs d'occupaziun per survegnir prestaziuns da l'assicuranza. I n'è betg chapaivel pertge che la participaziun duess vegnir remunerada supplementarmain da l'agid social. La regenza è perquai da l'avis ch'ins na stoppia betg prender mesiras en il senn previs.

7. L'uffizi dal servetsch social ha infurmà e scolà las vischnancas durant il mais da december 2005 davart las purschidas pussaivlas per la lavur d'utilitad publica. La fin d'avrigl 2006 ha l'uffizi dal servetsch social fatg attent anc ina giada las vischnancas davart lur obligaziuns. Sin plaun chantunal è ultra da quai vegnida supplitgada la crusch cotschna dal Grischun da stgaffir ulteriuras plazzas en il rom dal project "Werknetz".

Datum: 27 da zercladur 2006