Navigation

Inhaltsbereich

Incumbensa Bundi concernent l'art. 14 da la lescha chantunala da pestga (scumond da guatar en ils flums)

Sessiun: 25.04.2006
L'artitgel 14 da la lescha chantunala da pestga prevesa in scumond da travatgar ils flums per pestgadras e per pestgaders. Tenor quel dastgan ins per exercitar la pestga chaminar mo sin las rivas da la terra ferma sco er d'inslas fin a l'ur da l'aua. Senza pestgar a medem temp dastgan las persunas autorisadas d'ir a pestgar entrar guatond en il lètg dal flum mo per al traversar u per distatgar crutschs restads pendids.
Las disposiziuns da quest artitgel dattan adina puspè discussiuns vehementas tranter las pestgadras e tanter ils pestgaders, spezialmain perquai che questas disposiziuns dischavantageschan fermamain ed unicamain las pestgadras ed ils pestgaders che pestgan cun mustgas. Tar la pestga cun mustga pretenda la tecnica da bittar in pli grond spazi. Quel n'è cun il scumond restrictiv da travatgar en ils flums betg avant maun.
Quest scumond da travatgar en ils flums che vala mo per persunas autorisadas d'ir pestgar para anc pli discutabel, sch'ins considerescha ch'igl èn permessas en il sectur dals flums er autras activitads da temp liber sco lavar aur e far bogn e che las rivas dals flums dastgan vegnir passadas er per far sport da bartgas da gumma e da cajacs.
Enconuschentamain è la pestga cun mustgas insuma la moda da pestgar la pli miaivla. Tenor las infurmaziuns che nus avain survegnì en connex cun questa problematica dal sectur da l'universitad na datti nagins aspects da la pestga biologica che giustifitgassan il scumond da guatar en ils flums unicamain per pestgadras e per pestgaders. Spezialmain er perquai ch'il femp da fregar da las spezias indigenas da peschs - cun in'unida excepziun (litschala) - na succeda betg durant la perioda da la pestga. Er ils aspects da la segirezza en connex cun l'aua che po crescher andetgamain èn irrelevants, perquai che las pestgadras ed ils pestgaders n'èn betg periclitads en quest sectur da l'aua pli fitg che autras persunas.
Per abolir eventualmain quest artitgel dovri enconuschentamain ina revisiun da la lescha e per quella è cumpetent il cussegl grond. Fin alura datti la pussaivladad d'abolir il scumond da travatgar en ils flums cun introducir trajects regiunals da test u d'observaziun. Questa introducziun pudess ins far spert e senza cumplicaziuns cun midar las prescripziuns da pestga, quai ch'è la cumpetenza da la regenza. Las experientschas fatgas cun tals trajects da test u d'observaziun vegnan lura a procurar las infurmaziuns necessarias per abolir totalmain u parzialmain il scumond da travatgar en ils flums.
Las sutsegnadas ed ils sutsegnads supplitgeschan perquai la regenza:
- da midar las prescripziuns da pestga concernent il scumond da travatgar en ils flums en il senn menziunà
- d'introducir ina revisiun correspundenta da la lescha da pestga
- d'introducir en las regiuns mintgamai in traject da test fin che la revisiun da la lescha da pestga è fatga.

Cuira, ils 25 d'avrigl 2006

Name: Bundi, Hanimann, Beck, Augustin, Bachmann, Bär, Biancotti, Bleiker, Brüesch, Büsser, Butzerin, Casanova (Vignogn), Casty, Cavegn, Caviezel-Sutter (Tusaun), Conrad, Crapp, Dermont, Dudli, Fasani, Gredig-Hug, Maissen, Mengotti, Möhr Nigg, Noi, Parolini, Pfister, Portner, Ratti, Righetti, Sax, Tomaschett, Campell, Nay

Session: 25.04.2006
Vorstoss: rg Anfrage




Resposta da la regenza

En il chantun Grischun vala sin fundament da l'artitgel 14 da la lescha da pestga dal chantun Grischun in scumond general da guatar en ils flums. Tenor quel dastgan ins per exercitar la pestga chaminar mo sin las rivas da la terra ferma sco er d'inslas fin a l'ur da l'aua. Persunas autorisadas d'ir a pestgar dastgan mo traversar il letg dal flum u ir en l'aua per distatgar crutschs restads pendids. La lescha da pestga dal chantun Grischun è surordinada giuridicamain a las prescripziuns da pestga da la regenza. Perquai na po - en il rom da las prescripziuns da pestga - il scumond da guatar en ils flums betg vegnir abolì ni totalmain ni parzialmain. Sin fundament da las ponderaziuns numnadas na dastga la regenza er betg designar trajects da test.

A chaschun da la revisiun totala da la lescha chantunala da pestga da l'onn 2000 è la dumonda dal scumond da guatar en ils flums vegnida tractada detagliadamain. En il rom dal sboz da consultaziun era previsa ina regulaziun flexibla. Quella avess dà la pussaivladad a la regenza da prevair soluziuns differenziadas per singulas auas. Questa proposta da soluziun n'ha dentant betg chattà il consentiment necessari. Cunter l'aboliziun dal scumond da guatar en ils flums s'è exprimida spezialmain la cumissiun chantunala per la pestga. Perquai ha la regenza proponì il cussegl grond da mantegnair il scumond da guatar (missivas 1999/2000, p 695 f.) La regulaziun actuala vertenta ha il cussegl grond approvà silsuenter senza discussiun (PCG 1999/2000, p. 842, 982).

Per mantegnair il scumond da guatar en ils flums sa fan valair spezialmain ponderaziuns da la biologia da la pestga. Or da las auas currentas dal Grischun vegn numnadamain pestgà intensivamain. Cun il scumond da guatar vegn il pestgar or da las auas limità ed en singuls secturs da l'aua restan ils peschs nundisturbads. Uschia vegn promovida la frega naturala. Quai vala spezialmain per las spezias da peschs indigenas sco litschallas, rambots, striolas che fregan la primavaira. Pertge gist ils mais da matg e da zercladur exista - sco quai ch'i mussan las statisticas da pestga - ina gronda pressiun d'explotar ils peschs.

A chaschun da la revisiun totala da la lescha chantunala da pestga da l'onn 2000 ha il cussegl grond acceptà il scumond da guatar en ils flums. Cun abolir u cun schluccar quest scumond ston ultra da qua vegnir resguardads connexs da la biologia da pestga e da l'ecologia d'aua. Quai pretenda ina vista cumplessiva da la chaussa. Perquai na po in'adattaziun dal scumond da guatar en ils flums betg succeder independentamain da las ulteriuras disposiziuns da la lescha da pestga dal chantun Grischun. La regenza è ultra da quai pronta d'examinar la dumonda menziunada en il rom d'ina proxima revisiun da la lescha. A curta ed a media vista n'exista dentant betg in basegn d'agir prioritar. Sco resumaziun resulta che la regenza na po betg sustegnair in'adattaziun da la lescha da pestga che concerna mo il scumond da guatar en ils flums e ch'ella s'exprima cunter la surdada da l'incumbensa.

Datum: 20 da zercladur 2006