Navigation

Inhaltsbereich

Incumbensa Krättli-Lori concernent la statistica da furmaziun per ina politica da furmaziun effectiva

Sessiun: 25.04.2006
Cun il "program fundamental scola grischuna 2010" vegnan mess accents impurtants per la politica da furmaziun da noss chantun ils proxims onns. Per far quai basegni ina basa da decisiun correspundenta. Sin fundament da la resposta a la dumonda Krättli essan nus persvadidas e persvadids ch'ina statistica da furmaziun è necessaria per il chantun Grischun. Ina tala po dentant sa restrenscher sin intginas paucas datas expressivas.
Cuntrari a quai ch'è cuntegnì en la resposta a la dumonda menziunada n'èsi betg necessari da crear ulteriuras plazzas per far ina simpla statistica da furmaziun. Nus dastgain partir dal fatg ch'ils singuls purtaders da scola possedian las datas respectivas e ch'els - sco scolas subvenziunadas dal chantun - possian er vegnir obligads da furnir questas datas. Metter a disposiziun ina statistica da furmaziun davart ils fatgs da furmaziun privats e publics è ina incumbensa che resulta er da l'obligaziun da surveglianza dal chantun.
La statistica da furmaziun giavischada duess da princip cumparair annualmain e per l'emprima giada la fin da l'onn 2006 per l'onn da scola 2005/06. Ella stuess esser coordinada cun las statisticas d'auters chantuns per ch'ina cumparegliaziun interchantunala saja pussaivla (uffizi federal da statistica). Interessanta è medemamain la cumparegliaziun naziunala ed internaziunala da las scolaras e dals scolars da 15 onns (PISA). La statistica grischuna da furmaziun stuess cuntegnair almain las suandantas datas e stuess vegnir publitgada annualmain:
1. persunas en scolaziun e diploms sin ils stgalims da furmaziun da la scolina, dal stgalim primar e dal stgalim secundar I e II (scolaras e scolars, statistica d'emprendistas e d'emprendists, diploms)
2. resursas ed inftrastructura (persunas d'instrucziun, finanzas e custs, scolas)
3. studentas e students e diploms (scolaziun a scolas professiunalas superiuras ed a las scolas autas: SAP dal Grischun, scola auta da teologia, SAT)
4. persunal e finanzas (a las scolas professiunalas superiuras ed a las scolas autas dal Grischun)
5. efficacitad dal sistem da furmaziun (registraziun periodica mintga 3 - 5 onns: p.ex. PISA, mesiraziun da las cumpetenzas da scolaras e da scolars da 15 onns; passadi da las scolaras e dals scolars da scola media a las scolas autas e da las studentas e dals students da la scola auta professiunala en l'economia)
6. andaments da la furmaziun (registraziun periodica mintga 3 - 5 onns: p.ex. success en il studi da las studentas grischunas e dals students grischuns a las scolas autas svizras)
Da las datas registradas stuessan ins pudair respunder (er posteriuramain) dumondas specificas actualas da la politica da furmaziun; sco tranter auter las suandantas:
- repartiziun da las scolaras e dals scolars suenter la 6. classa sin la scola secundara, sin la scola reala e sin il gimnasi inferiur
- dumber da las sistidas voluntaras e da las sistidas suenter ina nunpromoziun al gimnasi
- dumber da las repetentas e dals repetents al gimnasi inferiur e superiur
- cumparegliaziun da las singulas scolas medias
- quotas dals diploms da las scolas medias e da la scola auta
- quota da las maturandas professiunalas e dals maturands professiunals
- part da maturandas gimnasialas e da maturands gimnasials che cumenzan:
a. in studi ad in'universitad/a la SPF
b. in studi ad ina scola auta professiunala
c. in'autra scolaziun (quota da passadi) e quantas e quants che termineschan lur scolaziun cun success (quota da diploms).

Ina resumaziun da la statistica duai vegnir publitgada en il rapport dal chantun.
Las sutsegnadras ed ils sutsegnaders envidan la regenza da far a partir da l'onn 2006 ina simpla statistica da furmaziun cun las resursas existentas.

Cuira, ils 25 d'avrigl 2006

Name: Krättli-Lori, Berther (Mustér), Augustin, Barandun, Beck, Bischoff, Brüesch, Bühler-Flury, Butzerin, Casanova (Cuira), Casty, Caviezel-Sutter (Tusaun), Christ, Christoffel-Casty, Claus, Dermont, Donatsch, Dudli, Feltscher, Hanimann, Hardegger, Hartmann, Hess, Hübscher, Jeker, Jenny, Kessler, Mani-Heldstab, Meyer-Grass (Claustra), Michel, Perl, Pfister, Ratti, Rizzi, Robustelli, Tramèr, Wettstein, Zanolari, Zegg, Bezzola, Cattaneo, Darms, Mainetti, Nay

Session: 25.04.2006
Vorstoss: rg Anfrage





Resposta da la regenza

La regenza ed il departament ch'è cumpetent per la furmaziun attribueschan ina gronda impurtanza a las retschertgas statisticas. Perquai han els realisà talas en
il rom da las pussaivladads er independentamain da las prescripziuns dal dretg federal. Uschia ha il Grischun visualisà sco emprim chantun il svilup dals dumbers
da naschientschas, l'ha communitgà activamain e l'ha integrà en la planisaziun da furmaziun. Da nov palaisa il Grischun er ils resultats concernent la quota da midada e la quota da success dal studi dad absolventas e dad absolvents dals gimnasis grischuns e cumpareglia quests resultats cun la media svizra. Documents voluminus èn vegnids elavurads areguard il gimnasi inferiur. L'elavuraziun da quests documents è stada cumbinada cun in bun pau lavur ed ins sto plitost - sin basa da las experientschas fatgas fin qua - partir dal fatg che la creaziun e che l'amplificaziun da la statistica da furmaziun vegn ad esser colliada cun custs.

La statistica da furmaziun è plitost vegnida negligida en ils chantuns e sin plaun federal - primarmain per motivs finanzials - e dispona d'in grond potenzial da svilup. La regenza beneventa ch'il cussegl grond vul observar pli fetg la statistica da furma-ziun ed è pronta da prender encunter l'incumbensa. Però propona ella al cussegl grond - per ils motivs ch'èn skizzads qua sutvart - in plan da realisaziun che diver-gescha da l'incumbensa.

- La confederaziun è ultimamain vegnida activa sur l'uffizi federal da statistica e vul accelerar en collavuraziun cun ils chantuns la creaziun d'ina statistica da furma-ziun. Per il Grischun vegni a dar novas sfidas en connex cun la retschertga da datas.
- Ils chantuns ch'èn unids en la conferenza svizra da las directuras e dals directurs chantunals da l'educaziun publica (CDEP) creeschan communablamain in moni-toring da la furmaziun. En connex cun la realisaziun dal program da la CDEP HarmoS - quest program prescriva tranter auter lieus da scuntrada che ston vegnir cuntanschids ad in tschert mument - vegnan er fatgas mesiraziuns da cumpetenza u da prestaziun. Las datas che ston vegnir eruidas vegnan a furnir resultats ch'ins po cumparegliar en l'entira Svizra e mussar, sch'ils lieus da scuntrada fixads vegnan cuntanschids.
- En il sectur da las mesiraziuns da las cumpetenzas vul la regenza examinar e tenor pussaivladad realisar sco ulteriur accent il diever d'in sistem da test adattà che sa basa sin l'internet, numnadamain "Stellwerk".
"Stellwerk" (cf. www.stellwerk-check.ch) è en la fasa da test. Las datas che ston vegnir eruidas intermedieschan er als singuls giuvenils ina determinaziun da la posiziun.

En vista a las sfidas skizzadas en il sectur da la statistica da furmaziun pretenda la regenza da coordinar - areguard il cuntegn ed areguard ils termins - las activitads chantunalas cun las lavurs che spetgan en l'entira Svizra. Plinavant ston las acti-vitads chantunalas er vegnir orientadas a quellas lavurs.En questa moda sa laschan evitar duplicitads e realisar eventualas cooperaziuns cun in diever da resursas optimà. Plinavant segirescha l'andament skizzà che las datas grischunas ch'èn vegnidas registradas pon vegnir cumparegliadas cun quellas d'auters chantuns.

Questa proposta da realisaziun permetta in andament ch'è orientà al process. Sch'ins dovra per exempel documents statistics per proximas decisiuns en il sectur da las scolas medias, vegnan quests elavurads ordavant considerond las persunas pertutgadas, e publitgads en moda adattada, q.v.d. betg exnum en il rapport annual.

La regenza propona al cussegl grond d'acceptar la dumonda en il senn da las expli-caziuns concernent il plan da realisaziun.

Datum: 27 da zercladur 2006