Navigation

Inhaltsbereich

Dumonda Loepfe concernent las consequenzas finanzialas per il chantun Grischun en cas d'ina eventuala acceptaziun da l'iniziativa COSA

Sessiun: 25.04.2006
Oz va in terz dals gudogns da la banca naziunala a la confederaziun e dus terzs van als chantuns. Quests daners vegnan duvrads per ademplir incumbensas centralas dal stadi en ils chantuns, p. ex. per la segirezza, per la furmaziun u per fatgs da la sanadad. Sche l'iniziativa COSA vegniss acceptada, perdessan ils chantuns quests meds e stuessan cumpensar la perdita da questas entradas cun reducir las expensas resp. las prestaziuns tar incumbensas centralas dal stadi u cun augmentar la taglia. Quai avess consequenzas considerablas per las burgaisas e per ils burgais sco er per l'economia. Er la perdita da las entradas tar la confederaziun avess consequenzas finanzialas per ils chantuns.
Ils chantuns disponan da gremis politics e d'instruments (dretgs dal pievel, parlament chantunal e regenza) per laschar decider en moda democratica e manaivla a las burgaisas ed als burgais davart l'utilisaziun dals daners da la banca naziunala. Perquai ch'ils chantuns èn manaivels a las burgaisas ed als burgais e grazia a las enconuschientschas ch'els han areguard ils differents problems e basegns regiunals, dattan ils chantuns la garanzia ch'els dovrian ils meds da la banca naziunala en moda spargnusa ed adattada a las cundiziuns chantunalas. Sche l'iniziativa COSA vegniss acceptada na fiss quai betg pli il cas.
En il Grischun ha la regenza exprimì pliras giadas sia intenziun da trair a niz ils gudogns da la banca naziunala per sminuir ils debits dal stadi e per finanziar il pachet da la revisiun da la lescha da taglia. Questa intenziun vegn sustegnida da la cumissiun per economia, taxas e politica da stadi (CETPS) e da la cumissiun da gestiun (CdG) ed ella è vegnida acceptada fin ussa dal cussegl grond cun bainvulientscha. Tenor l'opiniun da las deputadas e dals deputads che fan questa dumonda na fiss questa moda da proceder betg pli pussaivla en cas che l'iniziativa COSA vegniss acceptada.
La regenza vegn perquai supplitgada da respunder, tge consequenzas finanzialas ch'ella vesa per il Grischun en cas che l'iniziativa COSA vegniss eventualmain acceptada. Concretamain ston vegnir respundidas las suandantas dumondas:
1) Quant grondas fissan las perditas da las entradas en cas che l'iniziativa KOSA vegniss acceptada (partind da la clav da repartiziun vertenta)?
2) Co vegnissan cumpensadas questas perditas da las entradas? Tge consequenzas avessan questas perditas da las entradas sin il pachet da la revisiun da la lescha da taglia?
3) Sche l'iniziativa vegniss acceptada, gessan a perder a la confederaziun - fin che la cunvegna davart la distribuziun dal gudogn scada resp. fin l'onn 2012 - mintg'onn bundant 833 milliuns francs. Ston ins temair che per consequenza vegnian reducidas las subvenziuns per il Grischun?

Cuira, ils 24 d'avrigl 2006

Name: Loepfe, Feltscher, Cavigelli, Augustin, Bachmann, Bär, Barandun, Berther (Mustér), Berther (Sedrun), Biancotti, Bundi, Büsser, Cahannes, Capaul, Casanova (Vignogn), Casanova (Cuira), Caviezel (Pitasch), Christ, Crapp, Demarmels, Dermont, Donatsch, Fallet, Farrér, Fasani, Hanimann, Hartmann, Hess, Jenny, Kessler, Kleis-Kümin, Luzio, Maissen, Marti, Meyer-Grass (Claustra), Perl, Plozza, Portner, Quinter, Rizzi, Robustelli, Sax, Schmid, Thomann, Tomaschett, Tremp, Tuor, Zanetti, Zanolari, Zegg, Bezzola, Darms, Nay

Session: 25.04.2006
Vorstoss: rg Anfrage





Resposta da la regenza

Sa basond sin la cunvegna davart la distribuziun dal gudogn tranter la confederaziun e la banca naziunala svizra (BNS) dals 5 d'avrigl 2002 paja la BNS per 2003 - 2012 (cun il pajament en ils onns 2004 -2013) a la confederaziun ed als chantuns in gudogn annual da 2,5 milliardas francs. Da quels van tenor la clav da repartiziun constituziunala in terz a la confederaziun e dus terzs als chantuns. La part dals chantuns - che importa totalmain 1,67 milliardas francs - vegn repartida per 5/8 tenor la populaziun e per 3/8 tenor la forza finanziala. Il chantun Grischun survegn pia actualmain 57,8 milliuns francs.

L'iniziativa dal pievel "Ils gudogns da la banca naziunala per la AVS" (iniziativa COSA), inoltrada ils 9 d'october 2002 dal "comité per in'assicuranza per vegls e survivents segira", vegn suttamessa al pievel ed als chantuns per la votaziun ils 24 da settember 2006. Sche l'iniziativa vegniss acceptada stuessan ils gudogns da la banca naziunala vegnir pajads al fond da la AVS. Ils chantuns survegnissan ordavant in import fix da totalmain 1,0 milliardas francs per onn. La confederaziun na survegniss nagut. Ils chantuns perdessan ensemen 666 milliuns francs per onn resp. 40 % e la confederaziun 833 milliuns francs resp. 100 % da l'import da fin ussa. La nova regulaziun vegniss applitgada previsiblamain a partir da l'onn da gestiun 2008. La situaziun giuridica areguard il pajament da las reservas da la BNS ch'èn sa furmadas fin ussa per la distribuziun vegn giuditgada en moda controversa. A la fin dals quints vegn - en cas che l'iniziativa vegn acceptada - il parlament federal a reglar la repartiziun da las reservas ch'èn sa furmadas durant il dretg vegl en il rom d'ina revisiun da la C.

Tar las dumondas:
1) Cun la clav da repartiziun valaivla per ils gudogns da la banca naziunala a basa da la calculaziun actuala (populaziun e forza finanziala) importan las entradas pli pitschnas per il chantun Grischun annualmain 23,1 milliuns francs. Suenter l'introducziun da la refurma da la gulivaziun da finanzas e da la repartiziun da las incumbensas tranter la confederaziun ed ils chantuns (NGF) - che vegn realisada probablamain l'onn 2008 - vegn la part dals chantuns vi dal gudogn da la BNS repartì senza resguardar la forza finanziala. La cumponenta da la gulivaziun da finanzas tar la repartiziun dal gudogn da la BNS duai dentant vegnir transferida en il sistem da la NGF cun novs instruments (gulivaziun da las

resursas e cumpensaziun da l'inegualitad) en la dimensiun ch'ins po spetgar a lunga vista. L'acceptaziun da l'iniziativa COSA restrenschess en uschia il volumen futur da la gulivaziun da finanzas. Il chantun Grischun avess en quest cas, er cun resguardar la NGF, da quintar cun sperditas dal retgav en la dimensiun da 20 milliuns francs per onn. Per quest motiv refusa la regenza l'iniziativa COSA.

2) La sperdita dal retgav en il cas che l'iniziativa COSA vegniss acceptada stuess vegnir cumpensada tras mesiras supplementaras da la vart da las entradas e/u da las expensas. Per il mument n'èsi anc betg cler tgeninas mesiras concretas che duessan vegnir prendidas. Sper las mesiras da spargn ch'èn gia vegnidas realisadas na fissi bain er betg pli pussaivel d'evitar ina reducziun da las prestaziuns en las incumbensas centralas dal stadi sco en ils fatgs da sanadad, da furmaziun u da traffic.

Las revisiuns planisadas da la lescha da taglia che cumpiglian sperditas dal retgav da totalmain ca. 75 milliuns francs l'onn 2009 e da bundant 90 milliuns francs a partir da l'onn 2010 èn supportablas mo, sch'i vegn stabilì suffizientamain agen chapital avunda e sche la gronda part da las sperditas pon vegnir cumpensadas cun las finanzas generalas. Questa finamira po vegnir cuntanschida mo, sche differentas premissas èn ademplidas. Las premissas èn spezialmain ch'i existan cundiziuns da basa favuraivlas, che las mesiras da structura e da sanaziun cuntinueschan, ch'i vegna renunzià a projects spezials che na vegnan betg finanziads separadamain, che la politica d'expensas vegna retegnida e ch'il chantun na vegna betg engrevgià supplementarmain da la confederaziun. La libertad d'agir da la politica da finanzas dal chantun vegn absorbada tras las revisiuns planisadas da la lescha da taglia. I na duain vegnir fatgas naginas restricziuns vi da las finamiras da questas revisiuns ch'èn fitg impurtantas per il chantun.

3) La situaziun finanziala dal chantun Grischun dependa enconuschentamain fitg dependenta da la situaziun finanziala da la confederaziun. Uschia derivan per il mument bunamain 50 % da las entradas dal chantun da funtaunas federalas (inclusiv contribuziuns federalas transitoras a l'agricultura ed al traffic public regiunal). La confederaziun stuess medemamain cumpensar sias sperditas da retgav dad 833 milliuns francs per onn tenor ses concept per frenar ils daivets, quai ch'i influenzass spezialmain la vart da las expensas, resp. che avess per consequenza in ulteriur program da distgargia. Ils chantuns na vegnissan strusch schanegiads, perquai che ca. 30 % da las expensas da la confederaziun van a favur dals chantuns. La tema ch'il chantun vegniss pertutgà en moda negativa er uschia , sche l'iniziativa COSA vegniss acceptada, è pli che giustifitgada.

Datum: 6 da zercladur 2006