Navigation

Inhaltsbereich

Sessiun: 25.04.2006
Ils 18 d'avrigl 2006 ha la regenza concludì d'abolir cun vigur immediata la mesira da spargn 332 ch'è vegnida introducida l'onn 2004 (conclus dal cussegl grond dals 25 d'avust 2003). Quai pervi d'ina sentenzia dal tribunal federal dals 14 da mars 2006 che ha dà raschun ad ina scolara recurrenta dal chantun Glaruna che n'era betg vegnida admessa al gimnasi causa l'introducziun dal numerus clausus.
En il chantun Grischun ha la regenza concludì d'abolir las consequenzas da la mesira da spargn 332 per las candidatas e per ils candidats che han absolvì l'examen d'admissiun il mars 2006. En quest connex n'èsi dentant betg cler, tge che capita cun las candidatas e cun ils candidats che han absolvì ils examens d'admissiun ils onns 2004 e 2005.
Considerond l'art. 8 da la constituziun federala (egualitad giuridica) e l'art. 89 (furmaziun) al. 3 da nossa constituziun chantunala, supplitgain nus la regenza da procurar che tut ils giuvenils ch'èn vegnids dischavantagiads da la mesira da spargn 332 vegnian reintegrads.

Cuira, ils 25 d'avrigl 2006

Name: Noi, Kleis-Kümin, Trepp, Arquint, Augustin, Biancotti, Bucher-Brini, Jaag, Joos, Koch, Luzio, Mengotti, Peyer, Portner, Schütz, Tomaschett, Birrer, Brasser, Caviezel (Cuira), Mainetti

Session: 25.04.2006
Vorstoss: rg Anfrage




Resposta da la regenza

En la missiva davart l'examinaziun da las structuras e da las prestaziuns per sanar las finanzas dal chantun da l'onn 2003 èn vegnidas proponidas al cussegl grond duas mesiras en ils secturs da las scolas medias privatas e da la scola chantunala grischuna (cf. missiva da la regenza al cussegl grond, carnet nr. 2/2003-2004, p. 44 e 45): Tant a las scolas medias privatas sco er a la scola chantunala grischuna vegn manà il gimnasi inferiur en moda fitg restrictiva en il senn d'ina partiziun da prestaziun.
A chaschun da la sesida da la cumissiun predeliberanta dal cussegl grond dals 8 d'avust 2003 han la cumissiun ed il represchentant da la regenza decidì da renunziar a questa mesira e da suttametter al cussegl grond empè da quai la proposta d'intro-ducir ina reducziun limitada e moderada per l'admissiun da scolaras e da scolars (numerus clausus) al gimnasi inferiur, al gimnasi ed a la SMD/SMC (cun 10 cunter 1 vusch). Silsuenter ha il cussegl grond approvà questa proposta da la maioritad da la cumissiun e da la regenza ils 25 d'avust 2003 cun 108 cunter 9 vuschs.

A chaschun da sia sesida dals 18 d'avrigl 2006 ha la regenza dentant prendì la deci-siun d'abolir il numerus clausus (mesira da spargn 332) pervi da la sentenzia dal tri-bunal federal dals 14 da mars 2006 (2P. 304/2005) concernent la restricziun d'admis-siun en il chantun Glaruna. Ils 27 d'avrigl 2006 ha il servetsch giuridic dal departa-ment d'educaziun, cultura e protecziun da l'ambient (DECA) communitgà quai en ina brev als geniturs da las candidatas e dals candidats per l'examen d'admissiun da quest onn en la 3. classa d'ina scola media dal Grischun. A medem temp han ins empermess als geniturs da midar en notas la valitaziun ch'era vegnida fatga en puncts, e quai per quellas candidatas e per quels candidats che n'èn betg rangads sin ina plazza che permetta da frequentar ina scola media grischuna, e da trametter a las persunas pertutgadas sin basa da questa valitaziun nova ina decisiun d'admis-siun corrrespundenta. Questas decisiuns novas èn alura vegnidas tramessas ils 9 da matg 2006.

Entant aveva la regenza concludì ils 2 da matg 2006 ina revisiun parziala da l'ordina-ziun davart ils examens d'admissiun a las scolas medias grischunas ed abolì ils artit-gels 11a, 13a, 14a e 18 da l'ordinaziun davart ils examens d'admissiun che concer-nan il numerus clausus. Igl è er vegnì concludì da metter en vigur questa revisiun parziala retroactivamain per il 1. da mars 2006. Cun fixar quest termin da l'entrada en vigur è vegnì tegnì quint dal fatg che la regulaziun dal numerus clausus na vegn da princip betg pli applitgada er per ils examens d'admissiun en la 3. classa gimnasiala resp. en la 1. classa da la SMD/SMC ch'èn vegnids fatgs ils 20 ed ils 21 da mars da quest onn. Dar a la revisiun parziala numnada qua survart ina retroactivitad che va pli lunsch na vegn betg en dumonda tenor l'avis da la regenza. Areguard il curs da temp ed en spezial pervi da difficultads praticas na pari betg d'esser raschunaivel da suttametter ils examens d'admissiun ch'èn vegnids absolvids ils ultims dus onns ad ina nova valitaziun che sa drizza tenor l'art. 14 en cumbinaziun cun l'art. 13 da l'ordinaziun davart ils examens d'admissiun. Per ils examens d'admissiun ch'èn vegnids fatgs ils onns da scola 2004/05 e 2005/06 èn gia avant maun decisiuns d'admissiun che han vigur legala . Ultra da quai fiss ina retroactivitad da la revisiun parziala per ils ultims dus onns er betg pussaivla per motivs pratics, perquai ch'ella na fiss simplamain betg realisabla.

Il renviament a l'art. 8 da la constituziun federala ed a l'art. 89 da la constituziun chantunala na gida en il cas qua avant maun nagut, perquai ch'ins na po - tant da
l'ina disposiziun sco er da l'autra - betg deducir in dretg che correspunda a l'incumbensa.

Sin fundament da questas ponderaziuns propona la regenza al cussegl grond da refusar l'incumbensa qua avant maun.

Datum: 27 da zercladur 2006