Navigation

Inhaltsbereich

Dumonda Kleis-Kümin concernent ils custs da tgira betg cuvrids che ston vegnir surpigliads da las vischnancas

Sessiun: 25.04.2006
Sin basa d'ina incumbensa da la cumissiun per sanadad e fatgs socials è la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas / finanziaziun da las chasas da tgira) vegnida suttamessa l'october 2005 ad ina revisiun parziala. Ins ha adattà l'art. 21c al. 3 e 4. L'al. 3 prevesa che las vischnancas, en las qualas la retschavidra u il retschavider da prestaziuns supplementaras maximalas era domicilià ils ultims diesch onns avant l'entrada en la chasa da tgira, surpiglian proporziunalmain la summa da differenza tranter la taxa e sias entradas imputablas. Plinavant è tenor l'al. 4 quella vischnanca, en la quala la retschavidra u il retschavider da prestaziuns supplementaras maximalas era domicilià gist avant l'entrada en la chasa da tgira, obligada da pajar a l'anteriura vischnanca da domicil.

Da questas adattaziuns èn singulas vischnancas pertutgadas ordvart fitg en l'avegnir. D'ina vart ston ellas surpigliar ils deficits da las chasas da tgira e da l'autra vart ston ellas er anc surpigliar a partir da l'onn 2006 ils custs da tgira betg cuvrids. La surpigliada da quests custs supplementars engrevgescha las vischnancas, cunquai che la situaziun finanziala è gia oz precara tar la gronda part da las vischnancas. La repartiziun dals custs sin las vischnancas da domicil durant 10 onns resp. la restituziun da contribuziuns preliminaras dastgass esser fitg chara e cumplitgada. I na dastga er betg vegnir sutvalità che la basa legala manca per incassar custs betg cuvrids da vischnancas da domicil extrachantunalas. I n'è er betg reglà, tgi che sto surpigliar ils custs da la chasa da tgira betg cuvrids, sch'ina pazienta u sch'in pazient aveva ses domicil a l'exteriur durant ils ultims 10 onns avant ch'entrar en la chasa da tgira.

Sco ch'ins po concluder dal protocol dal cussegl grond da l'october 2005, è vegnida tschentada lezza giada la dumonda, sche quests custs da tgira betg cuvrids pudessan er vegnir cumpigliads, en cas che la lescha davart la gulivaziun da las grevezzas vegniss revedida. La regenza ha affirmà questa dumonda, dentant senza inditgar, cur che la lescha davart la gulivaziun da las grevezzas duai vegnir suttamessa ad ina revisiun.

Nus dumandain la regenza il suandant:

1. È la regenza pronta da suttametter la lescha davart la gulivaziun da las grevezzas ad ina revisiun?

2. Vesa la regenza ina pussaivladad da surpigliar en cas da pazientas e da pazients or da vischnancas da domicil extrachantunalas resp. en cas da pazientas e da pazients che avevan lur domicil a l'exteriur ils custs da tgira betg cuvrids gia avant la revisiun da la lescha sur la gulivaziun da las grevezzas?

Cuira, ils 25 d'avrigl 2006

Name: Kleis-Kümin, Pfenninger, Caviezel (Pitasch), Augustin, Berther (Mustér), Berther (Sedrun), Biancotti, Bucher-Brini, Bundi, Capaul, Casanova (Vignogn), Castelberg-Fleischhauer, Cavegn, Caviezel-Sutter (Tusaun), Christ, Dermont, Fallet, Farrér, Fasani, Hess, Jäger, Joos, Koch, Loepfe, Luzio, Meyer-Grass (Claustra), Mengotti, Noi, Peyer, Plozza, Portner, Quinter, Righetti, Rizzi, Sax, Schmid, Schütz, Stiffler, Tomaschett, Tremp, Trepp, Tuor, Zanetti, Zanolari, Zegg, Birrer, Campell, Darms

Session: 25.04.2006
Vorstoss: rg Anfrage


Resposta da la regenza

Remartgas generalas
L'art. 2 da la lescha davart la gulivaziun da grevezzas per prestaziuns socialas determinadas (DG 546.300) enumerescha en moda definitiva las prestaziuns socialas che vegnan confinanziadas dal chantun. Betg cuntegnidas là n'èn prestaziuns da las vischnancas a chasas da tgira per finanziar ils custs betg cuvrids da persunas che retschaivan prestaziuns supplementaras maximalas.

Tenor l'art. 4 da la lescha federala davart la gulivaziun da las grevezzas sto mintga vischnanca surpigliar ina resalva persunala da 33 ? pertschient da lur expensas nettas. Il chantun paja ina contribuziun da 40 pertschient a las expensas restantas da tut las vischnancas. Suenter vegnan ils custs restants repartids sin las vischnancas, e quai en proporziun cun lur dumber d'abitantas e d'abitants. Ultra da sia contribu-ziun da 40 pertschient surpiglia il chantun sco contribuziun che surpassa la limita fixada da mintga vischnanca quel import che surpassa 5 pertschient da lur entra-das da taglia ch'èn decisivas per eruir la classificaziun da la forza finanziala.
L'onn 1995, pia l'emprim onn suenter che la lescha era entrada en vigur, ha il chan-tun pajà sut il titel "contribuziuns che surpassan la limita fixada " a 35 vischnancas contribuziuns da totalmain 271'176 francs. Perquai che las expensas per il sectur social èn s'augmentadas dapi lura, han adina dapli vischnancas survegnì contribu-ziuns che surpassan la limita fixada. L'onn 2005 ha il chantun pajà totalmain 2'555'298 francs a 95 vischnancas.

Resposta a las dumondas

1. La regulaziun vertenta da la gulivaziun da las grevezzas tranter il chantun e las vischnancas ha chaschunà ils ultims onns ina grevezza supplementara marcanta per il chantun. L'emprim onn che la lescha davart la gulivaziun da las grevezzas è vegnida applitgada ha il chantun surpiglià ca. 28.8 pertschient da las prestaziuns socialas ch'èn suttamessas a la gulivaziun da las grevezzas. L'onn 2005 è questa procentuala s'augmentada a 35.5 pertschient. Ins po partir dal fatg che questa procentuala vegnia a s'augmentar er vinavant ils proxims onns.
En vista a quest svilup è la regenza da l'avis ch'i saja necessari da reveder la lescha davart la gulivaziun da las grevezzas cun la finamira da distgargiar il chantun, e quai cun concepir da nov il mecanissem da las contribuziuns che surpassan la limita fixada sco er cun midar la gulivaziun da las grevezzas. Correspundentamain è la re-genza pronta da suttametter la lescha davart la gulivaziun da las grevezzas ad ina revisiun. En connex cun ina revisiun cumplessiva duai er vegnir examinà, sche ulte-riuras prestaziuns socialas da las vischnancas duain vegnir subordinadas a la guli-vaziun da las grevezzas, uschia p.ex. la surpigliada dals custs da la giurisdicziun gratuita e dals custs betg cuvrids da persunas che retschaivan prestaziuns supple-mentaras maximalas en chasas da tgira.

2. Na. La lescha davart la gulivaziun da las grevezzas ha l'intent da reparter las grevezzas per prestaziuns socialas determinadas tranter il chantun e las vischnan-cas sco er tranter las vischnancas sezzas. A la gulivaziun da las grevezzas èn pia suttamessas mo expensas da las vischnancas. Tenor la lescha per promover la tgira da persunas malsaunas n'èn las vischnancas betg obligadas da surpigliar ils custs betg cuvrids d'abitantas e d'abitants che avevan lur domicil ordaifer il chantun avant che entrar en la chasa da tgira. Quests custs betg cuvrids d'abitantas e d'abitants che avevan lur domicil ordaifer il chantun avant che entrar en la chasa da tgira na pon consequentamain betg vegnir subordinads a la gulivaziun da las grevezzas.

Datum: 11 da fanadur 2006