L'utilisaziun da chalur persa represchenta senza dubi ina pussaivladad raschunaivla per realisar las finamiras da la politica d'energia da la confederaziun e dals chantuns. Cun la chalur persa che resulta pudess vegnir utilisà in considerabel potenzial d'energia "indigen", plinavant pudess la dependenza da l'exteriur en cas da purtaders d'energia betg regenerabla vegnir reducida e l'aria pudess vegnir liberada da substanzas nuschaivlas, spezialmain da l'impestaziun cun CO2. La concentraziun dal potenzial d'energia tar la producziun a Trimmis e tar la repartiziun ad immobiglias pli grondas a Cuira stgaffiss da princip premissas idealas per ina tala utilisaziun. Ultra da quai stess la chalur persa a disposiziun l'entir onn, quai che stuess vegnir giuditgà positivamain dal puntg da vista da la segirezza dal provediment.

Tenor l'incumbensa vegn la regenza supplitgada da pajar ina contribuziun da construcziun als custs supplementars per la lingia da chalur a distanza CVARG Trimmis Cuira nord, e quai en in'autezza che na vegn betg definida pli precis. Ils custs supplementars duain sa basar tenor l'incumbensa sin calculaziuns da cumparaziun cun auters purtaders d'energia. Basas correspundentas na stattan dentant betg a disposiziun per il giudicament. Dal puntg da vista actual n'èsi uschia betg pussaivel da far ina valitaziun dal project. Dal rest ston ins sa dumandar cun tge basa legala ch'ins pudess motivar ina contribuziun dal chantun.

Gia la mesadad dals onns 90 è vegnì discutà en connex cun la construcziun nova dal bloc d'ospitalisaziun D da l'ospital chantunal e regiunal retic (oz ospitals da Cuira SA) d'ina lingia da chalur a distanza da la CVARG a l'ospital chantunal. Las ponderaziuns ed ils interess da la politica d'energia da la citad da Cuira han dentant laschà far il project in naufragi anticipà. Oz na sa preschenta la situaziun betg auter, cunquai che la citad da Cuira ha per motivs evidents oravant tut l'interess da commerzialisar l'agen gas (EBRAG).
En ils conturns da l'ospital chantunal che vegn stgaudà sulettamain cun ieli sa chattan singuls edifizis dal chantun e subvenziunads da quel che pudessan da princip vegnir colliads cun ina lingia da chalur a distanza (clinica psichiatrica Waldhaus, scola auta da pedagogia, abitadi evangelic per persunas attempadas Masans, chasa da burgaisas e da burgais, abitadi per vegls Kantengut).

Ils implants per la producziun da chalur da quests edifizis èn generalmain en in bun stadi, per part èn els novs. I n'exista pia betg in basegn d'agir, ni tar ils edifizis dal chantun ni tar ils edifizis subvenziunads. Plinavant ston ins partir dal fatg che las proprietarias resp. ils proprietaris da bains immobigliars na purschessan betg senza impuls finanzials il maun per ina colliaziun.

Per render economic in provediment cun chalur a distanza èsi impurtant che uschè bleras consumentas ed uschè blers consuments sco pussaivel fissan colliads resp. ch'i vegniss retratga ina gronda prestaziun. Davart la rentabilitad, en cas ch'ins colliass sulettamain l'ospital chantunal, na datti dentant naginas expertisas.

La vaira dumonda da l'incumbensa pertutga la subvenziun da la lingia da chalur a distanza per l'ospital chantunal. En il rom da la legislaziun per promover la tgira da persunas malsaunas e l'assistenza da persunas attempadas e da persunas che basegnan tgira (LTM; DG 506.600) n'è ina contribuziun directa per la construcziun d'ina tala lingia betg pussaivla. Dapi la legislaziun revedida na succeda la subvenziun dals custs da construcziun e da mantegniment betg pli s'orientond a l'object, mabain en il rom d'ina pauschala annuala tenor ina clav fixada (art. 11 al. 3 LTM). Las contribuziuns ad in stgaudament convenziunal èn uschia cumpensadas. Custs supplementars na pon betg vegnir subvenziunads.

Per ils motivs menziunads refusa la regenza l'incumbensa.

Datum: 11 da fanadur 2006