Navigation

Inhaltsbereich

Dumonda urgenta Righetti concernent mesiras per lung da la A13 per garantir la segirezza e l'economia grischuna sco er per minimar las consequenzas negativas per la populaziun locala

Sessiun: 12.06.2006
Dapi ils 31 da matg passads, q.v.d. dapi quel di che l'autostrada dal Gottard ha stuì vegnir serrada en il chantun Uri en consequenza da crudada da crappa e dal grev accident chaschunà qua tras, resta la situaziun sin la A13 uschè seriusa che la segirezza n'è mintgatant betg pli garantida.

Effectivamain è la A13 oz la suletta axa da transit dal sid-nord e dal nord-sid tras la Svizra che vegn frequentada spezialmain la stad da numerusas turistas e da numerus turists. Ils blers camiuns ed ils plazzals sin l'autostrada che na pon betg vegnir serrads agraveschan plinavant la situaziun uschia che las colonnas tar il portal dal sid e dal nord dal tunnel dal San Bernardin han surpassà las davosas emnas pliras giadas la limita da 10 kilometers. Sonda ils 10 da zercladur ha la colonna perfin cuntanschì ina lunghezza da 20 kilometers, perquai che la A13 ha stuì vegnir serrada temporarmain pervia d'in incendi da vehichel tar Soazza.

Las abitantas ed ils abitants dals vitgs per lung da l'axa da traffic vegnan savens impedids en lur viadis cun auto ed ils manaschis che lavuran per lung da la A13 na pon mintgatant betg arrivar a lur plazzals. Er al turissem smanatschan gronds donns perquai ch'il traffic vegn svià tras ils vitgs.
Plinavant resta la ristga principalmain en connex cun ils camiuns ch'ils vitgs ed ils territoris da turissem na possian betg pli vegnir cuntanschids perquai che la via n'è betg charrabla.

La populaziun per lung da la A13 è fermamain pertutgada da l'impestaziun da l'aria e da la grevezza da canera. Spezialmain en vischnancas sco Roveredo, Mesauc e Valragn è la vita daventada insupportabla per las persunas che vivan sper u en la vischinanza da la A13.
L'economia ha pretendì l'aboliziun dal scumond per camiuns da charrar la notg senza resguardar las ulteriuras malempernaivladads ed ils ulteriurs distubis che la populaziun locala stuess subir.

En vista da questas circumstanzas vulan las sutsegnadras ed ils sutsegnaders da questa dumonda savair:

1. Tge posiziun ha la regenza areguard la dumonda per l'aboliziun dal scumond per camiuns da charrar la notg?

2. N'è la regenza betg da l'avis che la fasa cotschna (cun il scumond per camiuns da traversar ils cunfins) stuess vegnir applitgada pli severamain?

3. Sin tge termin è la reavertura da l'axa dal Gotthard respectivamain da l'autostrada A2 previsa? N'è la regenza betg da l'avis ch'ins stuess insister sin ina reavertura?

4. Tge mesiras ha la regenza concludì e vul ella relaschar per facilitar il traffic local e per proteger l'economia locala ed il turissem local en ils territoris pertutgads?

Cuira, ils 12 da zercladur 2006

Name: Righetti, Keller, Pedrini, Arquint, Augustin, Bachmann, Bär, Barandun, Beck, Berther (Mustér), Berther (Sedrun), Bleiker, Bundi, Butzerin, Cahannes, Capaul, Casanova (Vignogn), Castelberg-Fleischhauer, Casty, Cavegn-Kaiser, Caviezel-Sutter (Tusaun), Cavigelli, Christ, Claus, Conrad, Demarmels, Dermont, Dudli, Fallet, Farrér, Federspiel, Feltscher, Giacometti, Giovannini, Gredig-Hug, Hanimann, Hartmann (Champfér), Heinz, Hess, Jaag, Jäger, Janom Steiner, Jeker, Jenny, Kessler, Kleis-Kümin, Koch, Lemm, Luzio, Mani-Heldstab, Märchy, Meyer-Grass (Claustra), Meyer Persili (Cuira), Mengotti, Michel, Möhr, Montalta, Nigg, Noi-Togni, Parolini, Parpan, Peyer, Pfenninger, Plozza, Portner, Quinter, Ratti, Rizzi, Sax, Schmid, Schütz, Stiffler, Stoffel, Thomann, Tomaschett, Tremp, Trepp, Tuor, Wettstein, Zanetti, Zarn, Zegg, Campell, Hartmann (Cuira), Hauser, Mainetti

Session: 12.06.2006
Vorstoss: rg Anfrage


Resposta da la regenza

Gia la fin d'october 2001 è il chantun Grischun vegnì confruntà d'ina ura a l'autra en consequenza d'in grev incendi en il tunnel dal Gottard cun il fatg ch'ina gronda part dal traffic da transit da la A2 ha tschernì l'axa dal San Bernardin sco ruta da sviament ed ha chaschunà problems gravants e rigurus, spezialmain en las valladas dal Mesauc e dal Valrain per lung da la A13. Pervia da la crudada da crappa dals 31 da matg 2006 sin l'autostrada dal Gottard èn confruntads il chantun Grischun e las valladas numnadas qua survart danovamain ed entaifer pauc temp cun ina situaziun fitg problematica.

La regenza è conscienta da la situaziun tant concernent la segirezza, la grevezza per l'ambient, la restricziun da l'economia publica ed il dischavantatg dal traffic intern en consequenza da la mobilitad limitada sco er concernent l'incarica da provediment entaifer il Grischun. Ma ella prenda er serius la situaziun ed ha chapientscha per ils quitads da las persunas pertutgadas. Sa basond sin las experientschas tar l'incendi dal tunnel dal Gottard l'onn 2001 han ils uffizis chantunals involvids prendì las mesiras urgentas e pussaivlas sco er fatg las cunvegnas necessarias.

Tar las singulas dumondas:

1. Il scumond da charrar la notg è reglà tras la lescha sin plaun federal. Envers la confederaziun è la regenza s'engaschada cleramain per mantegnair quest scumond. L'aboliziun avess consequenzas pregiudizialas, perquai che l'axa dal San Bernardin vegniss qua tras pli attractiva per il traffic da transit, entant che sviadas sur ils pajais vischins pudessan vegnir evitadas. Cun l'aboliziun dal scumond da charrar la notg fissan las vischinas ed ils vischins per lung da la A13 exponids durant la notg ad ina ulteriura grevezza da canera,quai che sto vegnir evità en mintga cas. Ultra da quai è il traject dal San Bernardin pervia da sias stortas e da sias pendenzas betg adattà per in traffic da camiuns intensiv, ed il privel d'accidents vegniss augmentà cun dapli traffic pesant.

2. Tar eveniments extraordinaris po la polizia chantunala dumandar la fasa "cotschna" tar la confederaziun. Quai n'è dentant betg stà necessari fin ussa. La finamira da la regenza è da dumagnar il traffic pesant sin la ruta dal San Bernardin uschè bain sco pussaivel e surtut er da pudair reglar speditivamain il traffic intern. Fin ussa han las frequenzas permess ina realisaziun anc acceptabla.

3. Il chantun Uri è conscient da l'impurtanza da l'axa da transit e sa stenta uschia da puspè dar liber svelt la A2 per il traffic. La pressiun da circuls da turissem e da circuls economics, dentant er da la confereraziun è fitg gronda visavi il chantun Uri. Tenor diversas infurmaziuns da las medias èn iniziadas las lavurs per las siglientadas necessarias per restabilir la segirezza e vegnan quellas exequidas en duas squadras. Pir suenter la siglientada da la grippa pon ins dar in termin fidà concernent la reavertura da l'axa. Las cundiziuns generalas indicheschan dentant ch'ins possia quintar cun ina reavertura il cumenzament da fanadur.

4. La polizia chantunala sa stenta da tegnair avert la via chantunala per il traffic local e regiunal. Per quest motiv vegnan las sortidas da la A 13 serradas per il traffic da transit tar stagnaziuns. Il traffic S vegn servì cun preferenza tant en la zona da dosar da Soazza sco er a Nufenen, uschia che quel po mintgamai passar il tunnel dal San Bernardin avant il traffic da transit. Cun l'urden actual dal traffic pesant cumporta il temp da spetga per il traffic S davant il tunnel per regla betg dapli che 60 minutas. En cas da "traffic normal" vegn er il traffic S mo laschà mintga duas uras tras il tunnel. Da princip dastgan ins constatar en consideraziun da las circumstanzas marginalas ch'il traffic circulescha surprendentamain bain, malgrà il traffic supplementar. Mo tar eveniments spezials (accidents, pannas) datti svelt ina stagnaziun pli gronda.

Datum: 14 da zercladur 2006