Dumonda Ratti concernent la reclassificaziun da la via dal Güglia
Sessiun: 13.06.2006
Ultimamain ha il cussegl federal approvà il nov plan secturial "vias e binaris". En quel vegn augmentada la valur da duas vias grischunas:
la via dal Güglia da Tusaun fin Silvaplauna, d'ina via principala ad ina via naziunala (da nov rait fundamentala), e la via da Cuira fin Arosa ad ina via principala (da nov rait cumplementara).
Il termin da l'entrada en vigur n'è anc betg enconuschent. En il rom da la nova gulivaziun da finanzas (NGF) surpiglia la confederaziun bain cumplainamain ils custs da mantegniment e da manaschi da las vias naziunalas. Da l'autra vart na po il chantun Grischun prender nagina influenza pli, co e cura che questas vias vegnan amplifitgadas, sco per exempel il sviament da Silvaplauna. Ils chantuns survegnan cun la NGF contribuziuns globalas che stattan en proporziun cun la lunghezza da lur rait da vias principalas, e quai cuntrari a la pratica actuala, nua ch'i vegnan pajadas contribuziuns federalas per projects da construcziun chantunals. Tenor las calculaziuns da l'uffizi da construcziun bassa perda il quint da las vias senza resguardar las duas reclassificaziuns menziunadas qua survart annualmain 36 milliuns francs meds federals.
Sch'i vegn dà liber pli e pli vias per camiuns da 40 tonnas en il chantun Grischun, ha er quai in effect negativ sin ils daners da la LSVA, perquai che la confederaziun considerescha las limitas da paisa sin las vias sco in dischavantatg che vegn resguardà en la clav da repartiziun e che vegn correspundentamain indemnisà meglier.
Jau supplitgesch la regenza da respunder las suandantas dumondas:
1. Po il sviament da Silvaplauna vegnir realisà sco previs en ils plans?
2. Pon ins partir dal fatg che, sche la confederaziun surpiglia ils custs per il sviament da Silvaplauna, il chantun cumpenseschia questa investiziun cun l'amplificaziun segira l'enviern dal traject Segl Malögia?
3. Co pensa la regenza da cumpensar las perditas menziunadas qua survart (NGF e LSVA) en vista als custs da mantegniment da nossa rait da vias che s'augmentan pli e pli?
Cuira, ils 13 da zercladur 2006
Name: Ratti
Session: 13.06.2006
Vorstoss: rg Anfrage
Resposta da la regenza
La nova concepziun da la gulivaziun da finanzas e da las incumbensas tranter la confederaziun ed ils chantuns (NGF) chaschuna midadas essenzialas concernent la finanziaziun e las cumpetenzas tar las vias naziunalas e tar las vias principalas che vegnan subvenziunadas da la confederaziun. En spezial daventan las vias naziunalas proprietad da la confederaziun ed èn pia suttamessas sulettamain a sia cumpetenza. Questa midada entra en vigur probablamain il 1. da schaner 2008.
Independentamain da la NGF ha il cussegl federal relaschà la primavaira passada in nov plan secturial "traffic", en il qual la rait da vias naziunalas (rait fundamentala) sco er la rait da vias principalas cun dretg da subvenziuns (rait cumplementara) vegnan definidas da nov. Per che questas raits survegnian vigur legala, ston las chombras federalas sa basond sin la lescha federala davart las vias naziunalas concluder questa nova rait. Il termin per tractar ina missiva correspundenta ed uschia er il termin d'ina eventuala entrada en vigur n'èn actualmain anc betg enconuschents.
Per tut ils trajects da via ch'èn pertutgads da questa nova fixaziun valan pia las cumpetenzas tenor NGF. Sche la via dal Güglia sco via d'avertura d'ina regiun da turissem impurtanta daventass ina via naziunala quai che n'è actualmain anc betg fixà , giessan la cumpetenza e la finanziaziun cumplettamain a la confederaziun. En quest connex restass averta la dumonda, tge regulaziun che vegn prendida areguard ils projects d'engrondiment ch'ins è londervi da realisar.
Las singulas dumondas sa laschan respunder sco suonda:
1. Igl è anc adina l'intenziun da la regenza da realisar il sviament da Silvaplauna, e quai sco proxim project pli grond en il rom da la cumplettaziun da las vias principalas. Las lavurs da projectaziun per l'object da detagl vegnan prendidas immediatamain per mauns, uschespert che l'approvaziun dal project d'exposiziun che vegn spetgada anc il decurs da quest onn vegn dada. Da l'autra vart sto la regenza resguardar las novas cundiziuns da basa (NGF e plan secturial) e tschertgar la soluziun ch'è la pli optimala per il chantun per finanziar quest project.
2. Sche la confederaziun surpiglia ils custs per il sviament da Silvaplauna, vegnan er scursanids ils meds finanzials per las vias principalas. En la rait da vias principalas datti actualmain in grond dumber da projects ch'ins stuess prender per mauns. Vitiers vegn il basegn da meds finanzials che crescha svelt per mantegnair nossa gronda rait da vias. Per il traject da Segl a Malögia èn dentant previs l'onn che vegn tenor il program da construcziun da vias novs studis e novas lavurs da projectaziun, e quai independentamain da las decisiuns pendentas.
3. En connex cun las proximas midadas (NGF, fond d'infrastructura, decisiun concernent la rait da vias) perda il Grischun meds finanzials federals considerabels che vegnivan pajads directamain a ses quint da vias. Per gronda part duain questas perditas vegnir gulivadas en il rom da la NGF tras la gulivaziun da las resursas resp. tras la gulivaziun da las grevezzas geograficas e topograficas. Ils meds finanzials che stattan a disposiziun en il futur ston però vegnir impundids en emprima lingia er per cuvrir ils custs per mantegnair la rait da vias che creschan ad in crescher.
Datum: 11 da settembre 2006