Suenter ch'ins ha fatg trais onns experientschas cun cumissiuns permanentas èn necessarias ulteriuras adattaziuns da l'urden da gestiun dal cussegl grond, per ch'il parlament possia sa professiunalisar vinavant.
In punct problematic è che las cumissiuns permanentas èn dependentas da la conferenza da las presidentas e dals presidents. Quest problem pudess vegnir accentuà anc supplementarmain tras il fatg che la cumissiun da gestiun è vegnida messa sin il medem stgalim sco las ulteriuras cumissiuns.

Tut tenor la chargia da lavur e la cumplexitad d'in project na pon ins tar tschertas dumondas betg renunziar da consultar expertas ed experts d'ordaifer u da procurar per expertisas. En il chantun Turitg per exempel exista in reglament da cumissiun spezial e mintga cumissiun dispona d'in pitschen preventiv d'intgins paucs milli francs.

Mo cun questas pussaivladads po il parlament spetgar da las cumissiuns permanentas propostas adequatas ch'èn er independentas da l'administraziun , e quai cun enumerar ils avantatgs ed ils dischavantatgs.

Las cumissiuns permanentas cun lur presidentas e cun lur presidents ston pudair disponer en quest connex d'in tschert preventiv, e quai en atgna cumpetenza, en independenza ed en atgna responsabladad. Ina proposta pussaivla per las cumissiuns fiss per exempel 8000 francs per onn, per las presidentas e per ils presidents 1500 francs per onn, er differenzià tenor las incumbensas che pon vegnir spetgadas.

Il fatg ch'ins sto dumandar ina permissiun tar la conferenza da las presidentas e dals presidents che na po betg esser en cas da chapir e da percepir dumondas detagliadas impurtantas è ina chaussa stentusa, estra areguard la materia, che cuntegna il privel ch'i vegnan prendidas decisiuns politicas empè da decisiuns objectivas.

Il cussegl vegn supplitgà da midar l'urden da gestiun en il senn explitgà qua survart; a medem temp sto vegnir considerà d'elavurar in reglament da cumissiun. Sco model pudess servir il reglament dal cussegl grond dal chantun Turitg.

Cuira, ils 13 da zercladur 2006

Name: Trepp

Session: 13.06.2006
Vorstoss: rg Antrag auf Direktbeschluss