Dumonda da fracziun da la PS Bucher concernent la taxaziun tenor las expensas
Sessiun: 14.06.2006
Tenor l'art. 14 al. 1 da la lescha da taglia per il chantun Grischun han persunas natiralas che prendan domicil fiscal u dimora fiscala en Svizra per l'emprima giada u suenter in'absenza d'almain diesch onns e che n'exequeschan qua nagina activitad da gudogn, il dretg da pajar fin la fin da la perioda fiscala currenta, empè da la taglia sin las entradas e sin la facultad, ina taglia tenor las expensas.
Ultra da quai dat l'art. 14 al. 2 da la lescha da taglia per il chantun Grischun a persunas che n'èn betg burgaisas svizras er vinavant il dretg da pajar la taglia tenor las expensas.
Perquai supplitgain nus la regenza da respunder las suandantas dumondas:
1. Quantas persunas en il chantun Grischun pajan lur taglias tenor las expensas?
2. Da tge pajais derivan questas persunas?
3. Quant grond è sta l'import da taglia che quest circul da persunas ha pajà ils ultims tschintg onns?
4. Quant gronda è la perdita da taglia resp. quant grond è il privilegi da taglia che resulta da la taxaziun tenor las expensas cumpareglià cun ina taxaziun ordinaria?
5. Tge criteris vegnan resguardads en la pratica per calcular ils custs da vita (tschains da locaziun, vehichels, immobiglias e.u.v.)?
Cuira, ils 14 da zercladur 2006
Name: Bucher, Arquint, Baselgia, Frigg, Jaag, Jäger, Meyer Persili (Cuira), Noi-Togni, Peyer, Pfenninger, Pfiffner, Schütz, Trepp, Zindel, Caviezel (Cuira)
Session: 14.06.2006
Vorstoss: rg Anfrage
Resposta da la regenza
Davart las differentas dumondas po la regenza prender posiziun sco suonda:
1. Il dumber da las persunas natiralas ch'èn suttamessas a la taglia tenor ils art. 14/15 LT è suttamess a fluctuaziuns minimalas. Actualmain èn quai 227 persunas.
2. Las pajataglias ed ils pajataglias cun pauschalas derivan per gronda part da la Germania e da l'Italia. Las naziunalitads na vegnan betg registradas separadamain.
3. Las entradas da la taglia chantunala vegnan cumprovadas en la posiziun 5131.4006 dal quint dal chantun. A quai po vegnir renvià. En quest connex stoi vegnir agiuntà ch'i vegnan cumprovadas en il quint dal chantun mo las entradas da la taglia chantunala. Entradas d'ina autezza sumeglianta vegnan er realisadas da las vischnancas e da las baselgias sco er da la confederaziun.
4. La dumonda na po betg vegnir respundida, perquai che las relaziuns d'entrada e da facultad da las pajataglias e dals pajataglias cun pauschalas n'èn betg enconuschentas. Ultra da quai parta la dumonda da la supposiziun faussa che las persunas natiralas ch'èn suttamessas a la taglia tenor ils custs avessan prendì qua lur domicil er, sch'ellas fissan vegnidas suttamessas en moda ordinaria a la taglia tenor las entradas e tenor la facultad.
La regenza fa dentant quint cun il privel che las pajataglias fitg ritgas e ch'ils pajataglias fitg ritgs cun pauschalas transferissan lur domicil a l'exteriur, sche la pussaivladad da la taxaziun pauschala n'existiss betg pli. Questas pajataglias e quests pajataglias sa trategnessan sco giasts mo marginalmain main savens en il Grischun, ellas ed els pajassan dentant mo pli las taglias che pertutgan l'immobiglia da vacanzas.
5. En la pratica vegnan eruids partind da las relaziuns approximativas d'entrada e da facultad ils custs da vita. En quest connex èn las relaziuns d'abitar e la valur da l'atgna locaziun in criteri da giudicament impurtant. Er per exempel jachts, aviuns, immobiglias en auters pajais sco er emploiadas ed emploiads vegnan resguardads per quest giudicament.
Datum: 11 da settember 2006