Il dretg da survegnir la medema paja per la medema prestaziun è francà en la constituziun federala dapi l'onn 1981 e la lescha d'egualitad da l'onn 1996 scumonda mintga discriminaziun pervi da la schlattaina.
Ma er tar ils servetschs chantunals publics datti tenor l'uffizi federal da statistica differenzas tranter ils salaris dals umens ed ils salaris da las dunnas a dischfavur da las dunnas. Tenor l'enquista pertutgant la structura dals salaris 2004 han las dunnas gudagnà en il sectur chantunal public en media 19 % damain ch'ils umens. Tenor las enconuschientschas d'enfin uss sa lascha declerar mo ina part da questa differenza dals salaris cun las premissas differentas d'umens e da dunnas sin il martgà da lavur. La part pli gronda è discriminaziun. Tar ils motivs enconuschents da l'inegualitad permanenta dals salaris er tar il servetsch public tutgan tenor las enconuschientschas denfin uss tranter auter: professiuns da dunnas èn sutvalitadas, dunnas pon frequentar damain curs da perfecziunament, occupan damain posiziuns da cader e lavuran pli savens en relaziuns da lavur malsegiras, ellas vegnan promovidas pli darar e survegnan damain premias. Pervia da quai ans interessa co ch'i stat cun l'egualitad dals salaris tar l'administraziun da noss chantun.
Nus supplitgain la regenza da respunder las suandantas dumondas:
- Co sa preschenta la statistica d'occupaziun concernent las classas da salari e concernent la schlattaina? Quantas dunnas e quants umans lavuran en posiziuns da cader e co statti cun quai en ils singuls departaments?
- Datti ina statistica davart ils dis da perfecziunament frequentads tenor schlattaina?
- Quantas persunas èn vegnidas promovidas ils ultims trais onns? Quantas da quellas promoziuns pertutgan dunnas en % da las dunnas occupadas e quantas umens en % dals umens occupads?
- Tge resultat han gì las valitaziuns en il rom dals discurs cun las collavuraturas e cun ils collavuraturs, e quai tenor la classa da salari e tenor la schlattaina?
- Tge mesiras prenda la regenza per garantir l'egualitad dals salaris tar las collavuraturas e tar ils collavuraturs dal chantun sco er per reducir la discriminaziun zuppada da las dunnas? Co vegn controllà il princip da l'egualitad dals salaris?
Cuira, ils 14 da zercladur 2006
Name: Meyer Persili (Cuira), Bucher-Brini, Meyer-Grass (Claustra), Arquint, Baselgia, Cahannes, Cavegn, Caviezel-Sutter (Tusaun), Christoffel-Casty, Frigg, Jaag, Jäger, Joos, Kessler, Kleis-Kümin, Koch, Krättli-Lori, Mani-Heldstab, Noi-Togni, Perl, Peyer, Pfenninger, Pfiffner, Robustelli, Schütz, Trepp, Zarn, Zindel, Caviezel (Cuira)
Session: 14.06.2006
Vorstoss: rg Anfrage