Navigation

Inhaltsbereich

Sessiun: 15.06.2006
En il rapport dal chantun 2005 pon ins leger ch'il dumber da las societads da chapital e da las associaziuns cun sedia en il chantun Grischun saja sa midà l'onn 2005 per 124.
I na resorta betg, co che questa midada è resultada (repartiziun da l'augment e da la reducziun).

Perquai supplitgain nus la regenza da respunder las suandantas dumondas:

1. Quantas societads da chapital (SA, ScRL ed associaziuns cun sedia en il Grischun, sco er SA, ScRL ed associaziuns sin plaun interchantunal) èn sa tratgas da nov en il Grischun respectivamain èn vegnidas fundadas da nov?

2. Quantas da las societads ch'èn sa tratgas da nov en il Grischun respectivamain ch'èn vegnidas fundadas da nov e ch'èn menziunadas sut il punct 1 han pajà l'onn 2005 taglia per in gudogn net da passa 250'000. francs?

3. Quantas societads da chapital (SA, ScRL ed associaziuns cun sedia en il Grischun, sco er SA, ScRL ed associaziuns sin plaun interchantunal) cun in gudogn suttamess a la taglia da passa 250'000. francs han midà durant ils ultims tschintg onns lur sedia en in auter chantun?

Cuira, ils 15 da zercladur 2006

Name: Bucher, Arquint, Baselgia, Frigg, Jaag, Jäger, Meyer Persili (Cuira), Noi-Togni, Peyer, Pfenninger, Pfiffner, Schütz, Trepp, Zindel, Caviezel (Cuira)

Session: 15.06.2006
Vorstoss: rg Anfrage


Resposta da la regenza

La dumonda tracta l'augment respectivamain la reducziun dal dumber da societads da chapital e d'associaziuns l'onn 2005. En la dumonda 1 duai vegnir eruì quantas persunas giuridicas ch'èn vegnidas suttamessas da nov a l'obligaziun da pajar taglia; en la dumonda 2 duai alura vegnir preschentà lur gudogn net. Quai n'è dentant betg pussaivel, perquai che las decleraziuns da taglia per l'onn fiscal 2005 vegnan ad entrar sco per regla pir l'ultim quartal da l'onn 2006. Per quest motiv vegn la dumonda extendida sin l'onn fiscal 2004.

Las singulas dumondas pon vegnir respundidas sco suonda:

1. L'onn chalendar 2004 èn sa tratgas natiers 31 societads da chapital ed associaziuns; 395 interpresas èn vegnidas fundadas da nov. L'onn 2005 eran quai 31 respectivamain 378. Per regla sa tracti da societads cun sedia u cun ina filiala en il Grischun. Ina interpresa extrachantunala che fundescha ina filiala en il Grischun vegn registrada sco interpresa che sa tratga natiers.

2. Quatter societads ch'èn sa tratgas natiers l'onn 2004 han pajà taglia per in gudogn da passa 250'000. francs. Questas societads han dentant intginas particularitads:
cunter ina societad è vegnì declerà il concurs en il fratemp;
ina societad sa chatta en liquidaziun;
per il quint provisoric da l'onn fiscal 2005 (pajabel l'onn 2006) ha ina societad annunzià ch'il gudogn suttamess a la taglia sa reduceschia sin main che 20'000. francs;
tar ina societad sa tracti d'ina interpresa cun entradas passivas entaifer il concern; pervia dal dretg fiscal ester sto questa societad vegnir suttamessa ad ina gronda grevezza fiscala.

3. Durant ils onns 2001 2005 han duas societads cun in gudogn da passa 250'000 francs bandunà il Grischun.
Da las bancas da datas da l'administraziun da taglia na po betg vegnir concludì, quantas interpresas che han fundà ina filiala en in auter chantun e che han fatg investiziuns en quest lieu. I na po er betg vegnir eruì, sche ed en tge dimensiun che interpresas grischunas han fatg investiziuns en filialas extrachantunalas u estras.

Datum: 11 da settember 2006