Navigation

Inhaltsbereich

Dumonda Cavigelli concernent la participaziun a la "cunvegna interchantunala davart instituziuns socialas (CIIS)"

Sessiun: 17.10.2006
I dat ina "cunvegna interchantunala davart instituziuns socialas (CIIS)". Quest contract internaziunal ha sco finamira

- che las instituziuns socialas ch'i dat en noss chantun duajan star libras ad uffants u a giuvenils ed a persunas creschidas cun impediments ch'èn domiciliads en in auter chantun e viceversa;

- che l'avertura da questas purschidas premetta ch'il chantun da domicil da l'uffant u dal giuvenil respectivamain da la persuna creschida impedida surpiglia ils custs; e

- che la collavuraziun interchantunala vegnia intensivada sin il champ da las instituziuns socialas.
Sin plaun interchantunal gida la CIIS considerablamain a promover la segirezza giuridica da tut las persunas pertutgadas e da lur confamigliars sco er quella da las instituziuns. Ella è in instrument effizient, tant areguard la furniziun da la prestaziun tras las instituziuns (standard da qualitad) sco er areguard la rentabilitad da quellas (calculaziun dals custs; sistem cun pauschala da prestaziun) per promover e per realisar criteris renconuschids sin plaun interchantunal.

La pli gronda part dals chantuns svizzers è sa participada a la CIIS, e quai per la gronda part dals secturs cumpigliads en il contract internaziunal, il chantun Grischun n'è dentant betg sa participà. La federaziun grischuna "chasas ed ospitals" ha encuraschà la participaziun a la CIIS (l'ultima giada tar la consultaziun davart la lescha d'impedids e davart il sistem da finanziaziun e tar la consultaziun davart la realisaziun da la NGF e davart la scola speziala). Ella ha fatg quai tant ord vista da las instituziuns che lavuran per uffants e per giuvenils en la funcziun da chasas d'uffants e/u da scolas spezialas, sco er ord vista da quellas instituziuns che lavuran per persunas creschidas impedidas en la funcziun da chasas da dimora e/u da lieus da lavur e d'occupaziun.

En quest senn supplitgain nus la regenza da respunder las suandantas dumondas:

1. Tge tenuta ha il chantun Grischun visavi la CIIS resp. visavi ils secturs che vegnan reglads en quella cunvegna?

2. Ha il chantun Grischun l'intenziun da sa participar cumplettamain u almain parzialmain a la CIIS? Sche la participaziun duai succeder mo parzialmain, alura en tge parts?

3. Co garantescha il chantun Grischun cun valitar la situaziun da partenza che la vista da las persunas e da las instituziuns pertutgadas da la CIIS vegnia resguardada?

4. Tut tenor la resposta a las dumondas precedentas: Cura vegn il chantun Grischun a sa participar cumplettamain u almain parzialmain a la CIIS? Co vesa or la planisaziun strategica en chaussa?

5. Tut tenor la resposta a las dumondas precedentas: Tge alternativas tar ina participaziun a la CIIS cumpletta u parziala datti? Co vesa or l'eventuala planisaziun strategica da la regenza en chaussa?

Cuira, ils 17 d'october 2006

Name: Cavigelli, Nick, Hardegger, Barandun, Baselgia-Brunner, Berni, Bleiker, Bondolfi, Bucher-Brini, Bundi, Caduff, Campell, Casty, Caviezel-Sutter, Christoffel-Casty, Claus, Darms-Landolt, Dermont, Donatsch, Fallet, Farrér, Fasani, Florin-Caluori, Frigg-Walt, Gartmann-Albin, Geisseler, Giovanoli, Hanimann, Hartmann (Champfèr), Keller, Kleis-Kümin, Krättli-Lori, Loepfe, Menge, Meyer-Grass (Clsaustra), Montalta, Niederer, Parolini, Peyer, Pfiffner-Bearth, Portner, Rathgeb, Sax, Tenchio, Thomann, Thöny, Thurner-Steier, Vetsch (Claustra), Zanetti, Capeder, Locher Benguerel

Session: 17.10.2006
Vorstoss: rg Anfrage


Resposta da la regenza

La CIIS ha l'intenziun da pussibilitar la recepziun senza difficultads da persunas cun basegns spezials da tgira e da promoziun en instituziuns adattadas ordaifer lur chantun da domicil. Ella regla la relaziun da pajament tranter il chantun da staziunament da l'instituziun ed il chantun da domicil da la persuna che fa diever da l'instituziun extrachantunala. Tras la participaziun a la CIIS segirescha il chantun da domicil da l'instituziun dal chantun purtader cun ina garanzia da surpigliar ils custs che l'indemnisaziun da las prestaziuns (limitada sin la part da las subvenziuns als custs nets imputabels) giaja en favur da la persuna assistida.

La CIIS sto vegnir adattada a la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) ch'è vegnida concludida da las chombras federalas ils 6 d'october 2006. Da resguardar èn en spezial la retratga da la AI ord la finanziaziun da la scola speziala ed ord l'agid a las persunas impedidas (contribuziuns d'investiziun e contribuziuns da gestiun), il relasch d'ina nova lescha federala davart instituziuns per promover l'integraziun da persunas invalidas (LIPI) e la revisiun da la lescha federala davart las prestaziuns supplementaras tar l'assicuranza da vegls, survivents ed invaliditad (LPS). Questa adattaziun sto da princip succeder fin a l'entrada en vigur da la legislaziun davart la NGF.

Resposta a las dumondas

1. Ils avantatgs ed ils dischavantatgs d'ina participaziun dal chantun a la CIIS vegnan actualmain examinads.

2. Questa dumonda è in element da l'examinaziun actuala. Predominanta è ina participaziun a las parts A (agid per uffants e per la giuventetgna), B (instituziuns per persunas impedidas) e D (scolas spezialas).

3. Avant che la participaziun a la CIIS vegnia suttamessa al cussegl grond per prender la decisiun, vegnan las instituziuns pertutgadas da la CIIS envidadas a la consultaziun.

4. Ina participaziun dal chantun a la CIIS succeda per motivs pratics pir suenter che la revisiun da la CIIS è succedida. Autramain stuess il cussegl grond s'occupar duas giadas da la CIIS.

5. Sco alternativa respectivamain sco cumplettaziun per il cas che tut ils chantuns na sa participeschan betg a tut las parts da la CIIS, vegn la regenza a proponer al cussegl grond en il rom dal relasch chantunal general per realisar la NGF da crear ina basa legala en la lescha d'impedids, tenor la quala il chantun po concluder directamain cunvegnas davart l'indemnisaziun vicendaivla dals custs cun auters chantuns respectivamain cun instituziuns en auters chantuns.

Datum: 15 da december 2006