Navigation

Inhaltsbereich

Dumonda Loepfe concernent l'elavuraziun d'in concept davart la scola speziala e davart l'integraziun sco er da lur cundiziuns generalas

Sessiun: 17.10.2006
La regenza ha prendì posiziun davart in concept davart la scola speziala en las intervenziuns Loepfe concernent il svilup en il sectur da la scola speziala dals 29 da schaner 2002 e concernent la finanziaziun da la scolaziun speziala suenter l'introducziun da la NGF dals 19 d'october 2004. En il program central da la scola populara dal Grischun 2010 departament d'educaziun, cultura e protecziun da l'ambient (DECA) è ultra da quai vegnì skizzà in concept davart l'integraziun (concept general per ina integraziun cumplessiva d'uffants e da giuvenils cun basegns spezials en il chantun Grischun). En quest connex datti en il fratemp ina resumaziun da las reacziuns ch'èn entradas. En quellas vegn beneventada la direcziun dal sboz dal concept davart l'integraziun en quella , ma a medem temp vegn fatg attent ch'i saja impurtant da proceder en ina moda ponderada ed adattada al mument tranter las instituziuns ch'èn responsablas per la scola, las vischnancas e las instituziuns per la scola speziala. Spezialmain èsi vegnì fatg attent a las difficultads che las scolas han da realisar il concept davart l'integraziun sper tut ils auters projects da midada en il program central.

Tenor ils documents da la consultaziun davart la legislaziun executiva per realisar la NGF en il chantun Grischun, pagina 25 da las explicaziuns, sto vegnir fatg quint cun in project correspundent che vegn suttamessal cussegl grond per il temp transitoric 2009 bin 2010. Las lavurs per il concept general d'integraziun sez duain esser finidas fin la mesadad da l'onn 2007. Parallelamain cun quellas prepara la conferenza svizra da las directuras e dals directurs chantunals da l'educaziun publica (CDEP) ina cunvegna da basa interchantunala che fixescha ils standards ed ils princips da finanziaziun e che regla la collavuraziun interchantunala en il sectur da la scola speziala.c En connex cun il sboz dal concordat vegn per il mument fatga ina consultaziun.

Las sutsegnadras ed ils sutsegnaders constateschan ussa che tut las lavurs numnadas qua survart èn vegnidas fatgas dal departament praticamain senza consultar ils circuls interessads e senza persunas ch'en participadas a la scolaziun speziala. Per pudair dar scleriment al parlament sco er als circuls interessads ed a la publicitad supplitgeschan las sutsegnadras ed ils sutsegnaders la regenza da respunder las suandantas dumondas.

1. Co è il stadi actual da l'elavuraziun dal concept davart la scola speziala ch'è vegnì empermess gia pliras giadas?

2. Pertge èn las persunas pertutgadas directamain e ch'èn participadas a la scolaziun speziala vegnidas infurmadas fin ussa uschè stgarsamain empè da vegnir envidadas da collavurar e da reflectar.

3. Pertge n'èn ils circuls interessads e las persunas pertutgadas directamain e participadas a la scolaziun speziala betg vegnidas envidadas da far part a la consultaziun en connex cun la cunvegna da basa interchantunala davart la collavuraziun en il sectur da la pedagogia speziala?

4. Quant enavant datti per il parlament chantunal insumma anc la pussaivladad d'intervegnir eventualmain anc cun correcturas, sch'il concept da basa vegn finì la mesadad da l'onn 2007, sche la cunvegna da basa interchantunala areguard la scolaziun speziala è lura gia elavurada e sch'il project vegn preschentà al cussegl grond pir vers la fin da l'onn 2009?

5. Tge impurtanza ha tenor l'avis da la regenza l'atgna organisaziun da l'administraziun en il sectur da la scolaziun speziala propi, sch'ina integraziun cumplessiva dals uffants e dals giuvenils cun basegns spezials vegn bain aspirada en l'entira scola populara, ma sch'igl exista medem temp mo in unic post spezialisà per la scolaziun speziala, e quai senza ch'ella saja inditgada en l'organigram dal DECA?

Cuira, ils 17 d'october 2006

Name: Loepfe, Cavigelli, Feltscher, Arquint, Baselgia-Brunner, Berni, Berther (Mustér), Bucher-Brini, Bundi, Caduff, Cahannes Renggli, Casutt, Dermont, Farrér, Florin-Caluori, Geisseler, Hardegger, Kleis-Kümin, Koch, Kollegger, Menge, Meyer-Grass (Claustra), Nick, Niederer, Noi-Togni, Parpan, Rathgeb, Sax, Thurner-Steier, Trepp, Troncana-Sauer, Locher Benguerel, Märchy-Caduff (Domat)

Session: 17.10.2006
Vorstoss: rg Anfrage


Resposta da la regenza

Cun la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) surpiglian probablamain a partir dal 1. da schaner 2008 cumplainamain ils chantuns la responsabladad per il sectur da la scola speziala. Quels èn dumandads da sviluppar concepts per la scola speziala, dals quals i resorta en tge furma ch'ils chantuns prevesan da surpigliar questa responsabladad.

Tenor la lescha federala davart l'egualitad dals impedids promovan ils chantuns tant sco pussaivel ed uschenavant che quai serva al bainstar da l'uffant u dal giuvenil l'integraziun d'uffants e da giuvenils cun impediments en la scola regulara, e quai cun refurmas da scolaziun correspundentas. Er tenor il sboz d'ina cunvegna interchantunala davart la collavuraziun en il sectur da la pedagogia speziala (numnà en quai che suonda concordat da la scolaziun speziala) da la conferenza svizra da las directuras e dals directurs chantunals da l'educaziun publica (CEDP) ston analogamain vegnir preferidas soluziuns integrativas a soluziuns separadas. Sa basond sin il sboz d'in concordat da la scolaziun speziala è il sectur da la pedagogia speziala ina "part da l'incumbensa publicada furmaziun".

En il rapport davart il program da la regenza e davart il plan da finanzas per ils onns 2005 2008 ha la regenza renconuschì l'integraziun sco prioritad da svilup. En connex cun questa decisiun ha il DECA collavurà cun la scola auta interchanatunala da pedagogia curativa a Turitg ed ha sviluppà cun quella il concept general per ina integraziun cumplessiva d'uffants e da giuvenils cun basegns spezials en il chantun Grischun. Il concept general è vegnì publitgà e mess en discussiun cun il program central "scola grischuna 2010".

Davart las dumondas concretas prenda la regenza posiziun sco suonda:

Davart la dumonda 1:
Fin il december 2006 dura la consultaziun davart il concordad da la scolaziun speziala. Il concordat vegn a vegnir deliberà la segunda mesadad da l'onn 2007 da la CDEP. Ils concepts chantunals ston correspunder al concordat definitiv. Correspundentamain è avant maun dapi il cumenzament d'october 2006 en il DECA er in rapport intermediar intern davart in concept da la pedagogia speziala. Quel vegn sviluppà vinavant fin la fin da l'onn 2006. Igl è planisà da metter en discussiun quest sboz a las persunas pertutgadas. Che l'elavuraziun la concepziun ha retard stat pia en connex cun il svilup sin stgalim federal.

Tar la dumonda 2:
Il rapport intermediar davart il concept da la scola speziala s'orientescha en ses cuntegn a basa da las prescripziuns sin plaun federal fermamain al concept general d'integraziun. En quest connex ha il DECA infurmà detagliadamain ils gremis spezialisads (instituziuns da scola speziala, servetsch psicologic da scola) ed ultra da quai la publicitad a chaschun da 15 occurrenzas en tut las regiuns dal chantun. Dapi il december 2005 po il concept ultra da quai vegnir chargià da la pagina d'internet dal DECA sin l'agen computer. Dapi la stad 2006 han plinavant gì lieu scuntradas d'infurmaziun e da barat tranter il team da concept dal DECA e las represchentantas ed ils represchentants da las instituziuns da las scolas spezialas. Talas scuntradas èn previsas er a partir dal schaner 2007.

Tar la dumonda 3:
La consultaziun davart il concordat da la scolaziun speziala è succedida tenor la pratica vertenta en connex cun consultaziuns, per gronda part senza integrar ils posts externs. La cumissiun per furmaziun e cultura è vegnida integrada en il process da la furmaziun d'opiniun.

Tar la dumonda 4:
Per l'approbaziun e per la realisaziun dal concept da la scola speziala vegn ad esser cumpetenta la regenza. Adattaziuns legalas che resultan sin basa dal concept da la scola speziala suttametta la regenza natiralmain al cussegl gronden en furma d'in project.

Tar la dumonda 5:
Tenor il concordat da la scolaziun speziala è il sectur da la pedagogia speziala ina "part da l'incumbensa da furmaziun". Quest fatg è fixà en l'organigram da l'uffizi per la scola populara ed il sport. La regenza è er senza l'organigram conscienta da la gronda impurtanza che la scolaziun speziala ha.

Datum: 21 da december 2006