Navigation

Inhaltsbereich

Sessiun: 05.12.2006
Tenor l'artitgel 3 alinea 3 da la lescha federala davart la dimora ed il domicil dals esters (LDDE) dastga la patruna u il patrun admetter in'estra u in ester che n'è betg domicilià d'entrar en plazza mo, sche l'estra u sche l'ester ha survegnì la permissiun da dimora fin ch'ella u ch'el entra en plazza. Sche la patruna u sch'il patrun n'ademplescha betg questa obligaziun d'avair quità (art. 10 al. 1 OLE), daventa ella u el culpabel d'ina cuntravenziun en il senn dal dretg penal tenor l'artitgel 23 alinea 6 LDDE.

L'uffizi da fatgs da polizia e da dretg civil dal Grischun (polizia da persunas estras) fa ina denunzia penala tar l'uffizi cirquital cumpetent. L'uffizi cirquital envida suenter la patruna u il patrun fallibel da prender posiziun. Questa patruna u quest patrun fallibel dat ina resposta correspundenta. La finala vegn relaschà in mandat penal cunter ella u cunter el. En quest mandat penal vegn pronunziada ina multa e la u al vegnan adossads ils custs da procedura.

Pervia da quai s'imponan las suandantas dumondas:

1. Quantas denunzias penalas en il senn da cuntravenziuns tenor l'artitgel 23 alinea 6 LDDA ha la polizia chantunala da persunas estras fatg ils onns 2004 2006?

2. L'artitgel 23 alinea 6 frasa 2 cuntegna la pussaivladad ch'i possia vegnir desistì d'in chasti en cas spezialmain levs. Co vegn resguardada la libertad da decider da la polizia da persunas estras dal Grischun?

3. Tenor il concept dal matg 2006 vuless la regenza distgargiar administrativamain las IPM. Sin quest champ planisescha la regenza er ina midada da la lescha che sa referescha a las cuntravenziuns cunter l'artitgel 23 alinea 6 LDDE, schebain che questas cuntravenziuns pudessan vegnir liquidadas directamain da la polizia da persunas estras en la procedura da multas disciplinaras, senza chaschunar ulteriura lavur administrativa e custs supplementars.

Cuira, ils 5 da december 2006

Name: Pfäffli, Brantschen, Troncana-Sauer, Bachmann, Barandun, Bezzola (Samedan), Bezzola (Zernez), Brüesch, Buchli, Caduff, Campell, Candinas, Casparis-Nigg, Casutt, Claus, Clavadetscher, Conrad, Dermont, Donatsch, Hartmann (Cuira), Hartmann (Champfèr), Hasler, Jenny, Kessler, Kleis-Kümin, Koch, Krättli-Lori, Kunz, Marti, Meyer-Grass (Claustra), Nick, Parpan, Peer, Perl, Portner, Quinter, Ragettli, Rathgeb, Ratti, Rizzi, Stiffler, Thomann, Thurner-Steier, Toschini, Wettstein, Gunzinger, Largiadèr, Rischatsch

Session: 05.12.2006
Vorstoss: rg Anfrage


Resposta da la regenza

Las persunas estras ston s'annunziar tar la controlla d'abitantas e d'abitants entaifer otg dis suenter ch'ellas han prendì domicil en Svizra. Per entrar en plazza basegnan ellas ina permissiun. Sch'ellas n'observan betg questas disposiziuns, vegnan las persunas estras e lur patrunas u lur patruns suttamess ad in chastì.

Er las burgaisas ed ils burgais da la UE/AECL ston ademplir questas prescripziuns d'annunzia. Sin il champ d'applicaziun da la cunvegna davart la libra circulaziun da persunas vegn ademplida la premissa che pretenda ina permissiun per entrar en plazza gia il mument che l'annunzia tar la vischnanca vegn fatga; i n'è betg necessari da spetgar fin che l'attest correspundent resp. fin che la permissiun correspundenta èn vegnids emess. Questa soluziun che chaschuna ina ferma distgargia administrativa per las petentas e per ils petents è giustifitgada pervia da la pretensiun legala d'ina permissiun da dimora e pervia dal fatg ch'ina dumonda sto vegnir refusada mo en ils pli paucs cas.

Fin ils 31 da fanadur 2003 ha l'uffizi da fatgs da polizia e da dretg civil dal Grischun exequì las proceduras penalas pervia da violaziun da prescripziuns da la polizia da persunas estras en il senn da l'art. 23 al. 6 LDDE en ina procedura penala administrativa. Questa cumpetenza da chastiar ha il cussegl grond surdà a la dretgira penala, e quai en la revisiun da la OECGtLEA (DG 618.100) ch'è en vigur dapi il 1. d'avust 2003 (missiva carnet 4/2002-2003, p. 153 s.; CCG dals 27 da november 2002).

1. Fin il matg 2006 n'è betg vegnida fatga ina statistica da las denunzias penalas ch'èn vegnidas inoltradas. Il favrer 2006 è vegnida adattada la pratica da denunzia a la giurisdicziun, uschia ch'il dumber da denunzias è sa reducì fermamain. La segunda mesadad da l'onn 2006 èn entradas 80 denunzias.

2. Las collavuraturas ed ils collavuraturs da l'uffizi da fatgs da polizia e da dretg civil dal Grischun èn obligads d'inoltrar ina denunzia penala, sch'i vegn constatà causals penals (art. 36 al. 3 OECGtLEA). Ellas ed els ston resguardar en quest connex la pratica ch'è vegnida sviluppada da la giurisdicziun. In princip d'opportunitad cun la renunzia d'ina denunzia n'exista betg. Mo la derschadra penala u il derschader penal po renunziar da chastiar.

3. Sch'i vegn resguardada la finamira d'evitar lavurs administrativas nunnecessarias e custs supplementars, è la regenza pronta d'examinar l'introducziun d'ina procedura da multas disciplinaras tar cuntravenziuns cunter l'art. 23 al. 6 LDDE.

Data: 22 da favrer 2007