Dumonda Pfenninger concernent il svilup dal traffic ed il traffic en general sin ils trajects Cuira Lai, Cuira Arosa
Sessiun: 05.12.2006
Per furmar las destinaziuns en il turissem grischun è previsa tranter auter er la MGO Arosa/Lai. Qua stat puspè sin l'emprima plazza da la glista da tractandas la colliaziun dals territoris da skis Corn cotschen/Lai ed Arosa ch'è gia dapi in temp en discussiun. Ultra da las dumondas generalas davart la necessitad e davart il gener da la colliaziun resp. davart ina colliaziun che schanegia tant sco pussaivel la cuntrada, datti in'ulteriura chaussa da sclerir, numnadamain il svilup dal traffic ed il traffic en general. Las interpellantas ed ils interpellants èn da l'avis ch'i saja necessari da suttametter ils currents da traffic entaifer il triangul Cuira Arosa, Cuira Lai ad ina vista cumplessiva ed er da chattar soluziuns cumplessivas.
Gia oz datti problems considerabels en il traffic en general durant ils temps dal traffic principal la stagiun d'enviern cunzunt sin il traject Lai Cuira. Ultra da quai ha la viafier d'Arosa in avegnir malsegir, sche questa lingia stuess vegnir manada sco previs da nov mo pli en la rait cumplementara da la confederaziun; in fatg che avess consequenzas finanzialas per la gestura da la VR. A lunga vista stuess plinavant vegnir realisada la punt auta per distgargiar la citad da Cuira (traffic en direcziun d'Arosa) e persequitads vinavant vegnan il project "monorail" per avrir Planeiras sco er il project Grischun-transit.
Sin basa da questa situaziun da partenza cumplexa e d'eventualas grondas investiziuns supplitgain nus la regenza da respunder las suandantas dumondas:
1. È er la regenza da l'avis ch'ils moviments da traffic sin ils trajects Cuira Arosa, Cuira Lai stoppian vegnir considerads en ina vista cumplessiva resp. stoppian obtegnair ina soluziun en il senn d'ina concepziun generala dal traffic?
2. Presuma la regenza en cas d'ina fusiun dals territoris da skis ch'i dettia midadas considerablas da las frequenzas dal traffic, e quai sin la ruta d'arrivada tschernida u pertutgant il med da transport tschernì?
3. Tge pussaivladads vesa la regenza per realisar sistems per diriger il traffic u edifizis d'infrastructura correspundentamain a la vista cumplessiva resp. per accordar vicendaivlamain las mesiras previsas?
4. Prevesa la regenza da prender mesiras u da metter a disposiziun in sistem d'impuls per mantegnair u per amplifitgar las frequenzas sin il traject da viafier Cuira Arosa?
5. En cas d'in augment repetì da las frequenzas dal traffic individual motorisà en spezial sin la ruta da ed a Lai sto vegnir fatg quint cun in collaps dal traffic. Poi vegnir dà dapli prioritad al traffic public da bus cun in moviment correspundent dal traffic resp. cun dretgs da precedenza u tge mesiras èn previsas per pudair garantir in urari punctual er durant ils temps da grond traffic?
Cuira, ils 5 da december 2006
Name: Pfenninger, Jaag, Baselgia-Brunner, Bucher-Brini, Frigg-Walt, Gartmann-Albin, Jäger, Menge, Meyer Persili (Cuira), Peyer, Pfiffner-Bearth, Thöny, Trepp, Locher Benguerel
Session: 05.12.2006
Vorstoss: rg Anfrage
Resposta da la regenza
Las dumondas fatgas sa laschan respunder sco suonda:
1. Decisiuns e conclus liants davart ina destinaziun turistica futura Arosa/Lai resp. davart la fusiun dals territoris da skis correspundents mancan anc. Pervia da quai n'èn las cundiziuns generalas per concepir en moda generala il traffic per cuntanscher las destinaziuns turisticas d'Arosa/da Lai betg anc determinadas definitivamain. Supponind che la furmaziun da questa destinaziun haja success è er la regenza da l'avis che decisiuns d'investiziun per novas infrastructuras da traffic possian vegnir prendidas mo sin basa d'ina concepziun generala dal traffic che resguarda tut ils meds da traffic, pia tant la viafier sco er la via.
2. Prognosas da traffic fidadas e supposiziuns davart las pussaivladads per spustar ils currents da traffic en il triangul Cuira Arosa Lai na datti cun excepziun d'ina stimaziun davart il volumen da traffic per il sistem da traffic dal monorail actualmain naginas. Las promoturas ed ils promoturs giuditgeschan il potenzial commerzial da la regiun da vacanzas da Cuira Lai sco grond. En il rom da l'examinaziun da colliaziuns da traffic per il futur duai vegnir analisà detagliadamain il svilup da traffic che po vegnir prevedì.
3. En il rom da l'examinaziun da l'opportunitad da las colliaziuns da traffic en il triangul Cuira Arosa Lai duain vegnir giuditgadas las premissas per decisiuns d'investiziun persistentas en sistems d'infrastructura ed en sistems per diriger il traffic.
4. In augment da las frequenzas tar il traffic public da persunas sco er tar il traffic da rauba sin la lingia d'Arosa stat spezialmain a cor a la regenza. Las investiziuns considerablas ch'èn vegnidas fatgas ils ultims diesch onns per mantegnair questa lingia laschan sa giustifitgar mo, sche er las frequenzas da traffic pon vegnir augmentadas. Quai è ina chaussa che sto senza dubi er esser en l'interess economic da la viafier retica.
5. La regenza è er da l'avis che la colliaziun da via ch'exista cun Lai na vegn betg ad avair la capacitad per pudair dumagnar in augment nunfrenà dal traffic individual. Areguard la privilegisaziun dal traffic da bus public sto vegnir menziunà ch'igl èn gia vegnidas fatgas repetidamain emprovas il passà, en spezial cun svidar en moda coordinada las plazzas da parcar da las telefericas. Mo ultimamain ha la regiun elavurà in nov concept da traffic. I vegn a sa manifestar, quant enavant che questa mesira sa lascha realisar ils proxims onns en collavuraziun cun las differentas partidas participadas.
Datum: 5 da mars 2007