Navigation

Inhaltsbereich

Incumbensa Niederer concernent la creaziun d'ina basa legala per installar classas da time-out

Sessiun: 06.12.2006

Cas da scolaras e da scolars che cuntrafan repetidamain a las reglas fundamentalas da la scola enconuschan ins oz e bleras scolas. Cuntravenziuns sco:
- violaziun da l'integritad da conscolaras e da conscolars u d'ulteriuras persunas dals conturns da la scola
- refusa permanenta d'incumbensas e d'ordinaziuns
- bleras absenzas da l'instrucziun e refusa da la scola
- ferms disturbis da l'instrucziun e da la direcziun da la scola tras la scolara u tras il scolar
impussibiliteschan en blers lieus il manaschi da scola en entiras classas u tissientan il clima en entiras scolas. Bleras scolas na san betg pli co sa gidar, sche insatge da quest gener capita, e quai or da motivs pedagogics, ma er finanzials.
L'installaziun da classas da time-out fiss in med efficazi cunter tals stadis insupportabels. Sche scolaras e scolars cun difficultads considerablas en il sectur da l'autocumpetenza e da la cumpetenza sociala vegnan assegnads a classas da time-out, vegn la situaziun che impedescha l'emprender quietada en la pli gronda part dals cas. Suenter ina tala mesira pedagogica speziala da promoziun gartegia en blers cas er la reintegraziun en la classa regulara. L'installaziun da classas da time-out en blers chantuns e tar bleras instituziuns ch'èn responsablas per la scola (en il Grischun p.ex. a Cuira ed en la fasa da concept en la regiun dals Tschintg Vitgs/dal Signuradi) mussa ultra da quai en moda impressiunanta ch'il basegn d'ina tala purschida è fitg grond.
Er la regenza è dapi in temp pli lung conscienta da l'impurtanza da la problematica. L'october 1999 ha ella publitgà tras l'uffizi per secturs spezials da scola las "propostas areguard il tractament da singularitads dal cumportament en scola ed en scolina".
Bleras vischnancas e blers chantuns han realisà ch'ina tala mesira da promoziun preventiva è ina investiziun impurtanta en il futur da blers umans giuvens. Plinavant vesan ellas ed els che las classas da time-out menziunadas èn in'alternativa favuraivla cumpareglià cun autras instituziuns sumegliantas.
Las realitads skizzadas qua survart sforzan, che bleras instituziuns ch'èn responsablas per la scola ston agir. Nus essan da l'avis che la regenza stoppia sustegnair las instituziuns ch'èn responsablas per la scola en lur agir, per che betg mo vischnancas e regiuns ch'èn activas e che disponan da las finanzas necessarias possian stgaffir questa purschida ch'è urgentamain necessaria.

Perquai envidain nus la regenza:
a. da relaschar directivas per classas da time-out
b. da relaschar la basa legala per installar classas da time-out
c. da mitigiar ils gronds custs supplementars da las instituziuns ch'èn responsablas per la scola, e quai cun in subvenziunament adequat.

Cuira, ils 6 da december 2006

Niederer, Meyer-Grass (Claustra), Mani-Heldstab, Arquint, Augustin, Baselgia-Brunner, Berni, Berther (Mustér), Berther (Sedrun), Blumenthal, Brandenburger, Brüesch, Butzerin, Caduff, Cahannes Renggli, Candinas, Casutt, Cavigelli, Christoffel-Casty, Clavadetscher, Conrad, Dermont, Florin-Caluori, Frigg-Walt, Gartmann-Albin, Geisseler, Hanimann, Hardegger, Jäger, Kleis-Kümin, Koch, Kollegger, Kunz, Loepfe, Märchy-Michel, Menge, Mengotti, Möhr, Parpan, Peer, Peyer, Pfäffli, Pfiffner-Bearth, Pfister, Portner, Sax, Stiffler, Tenchio, Thurner-Steier, Trepp, Troncana-Sauer, Grendelmeier, Gunzinger, Locher Benguerel, Rischatsch

Session: 06.12.2006
Vorstoss: rg Auftrag


Resposta da la regenza

Tenor l'artitgel 26 alinea 2 da la lescha da scola "vegnan prendidas mesiras adattadas en scola primara, reala e secundara" per "promover las scolaras ed ils scolars cun difficultads en scola (...)". Difficultads disciplinaras e crisas da motivaziun tutgan tar la carriera da scola da tscherts giuvenils. Sche questas difficultads areguard la qualitad, areguard la quantitad ed areguard la durada restan en in rom limità, èn ellas part dal mintgadi "normal" da scola e laschan sa dumagnar cun ils agids usitads (direcziun da la scola, cussegl da scola, servetsch psicologic da scola e.u.v.). Sche las singularitads dal cumportament da singulas scolaras e da singuls scolars surpassan dentant ina tscherta mesira, cunquai ch'ellas engrevgeschan permanentamain l'instrucziun u il clima d'instrucziun e disturban fermamain l'emprender en ina classa u fan schizunt che quai n'è betg pli pussaivel, alura daventan ellas ed els sco che quai è vegnì explitgà en l'incumbensa insupportabels per ina classa. En quest cas han las scolas la pussaivladad da tschertgar ina soluziun ordaifer la classa u ordaifer la chasa da scola per questas scolaras e per quests scolars. Ultra da la scolaziun speziala vegn en dumonda er la collocaziun dals giuvenils pertutgads en ina uschenumnada "classa da time-out".

Ina "classa da time-out" (en il senn da la classa da time-out da Cuira che vegn numnada en l'incumbensa) vegn manada sco classa regulara maschadada dal stgalim secundar I. Ad ella pon vegnir assegnads pia scolaras e scolars da la scola reala, da la scola secundara sco er da las classas pitschnas dal stgalim superiur. La premissa ch'ina tala "classa da time-out" vegnia permessa da l'uffizi per la scola populara ed il sport è in concept correspundent da l'instituziun ch'è responsabla per la scola. "Classas da time-out" vegnan subvenziunadas sco classa realas, e quai en il rom da la salarisaziun pauschalisada da las persunas d'instrucziun. I vegn instruì en gruppas pitschnas. Il plan da materias sa basa sin l'urari dal stgalim secundar I e sa drizza en enclegientscha cun la persuna d'instrucziun da la classa da tschep tenor ils basegns individuals da las singulas scolaras e dals singuls scolars.

L'assegnaziun en ina "classa da time-out" è temporara ed unica. Las scolaras ed ils scolars pertutgads mantegnan lur plazza en lur classa da tschep. La finamira è lur reintegraziun en la classa da tschep. En la "classa da time-out" survegnan ils giuvenils pertutgads la pussaivladad da reflectar davart lur cumportament, davart lur tenuta sco er davart lur rolla en la gruppa ed en la societad. Il "time-out da la classa " è er ina schanza per la classa da tschep e per sias persunas d'instrucziun. El porscha la pussaivladad d'elavurar quai ch'è capità e da preparar in nov cumenzament. A scolaras ed a scolars che na profitan betg da la schanza ch'ina "classa da time-out" als porscha smanatscha l'assegnaziun en ina scola speziala ed en il cas extrem ina exclusiun temporara da la scola tenor l'art. 14 da la lescha da scola.

Concernent ils trais giavischs concrets che l'incumbensa cuntegna po dal puntg da vista actual vegnir prendì posiziun sco suonda:
Tar a e b: En il rom da la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) vegn elavurà actualmain in "concept grischun da pedagogia speziala" tar l'uffizi per la scola populara ed il sport. En questa basa che resguarda spezialmain l'integraziun vegnan tractadas tranter auter er las dumondas concernent "classas da time-out" e concernent la "lavur sociala da scola". En connex cun la realisaziun dal punct central da svilup "integraziun" vegnan integradas las ponderaziuns fundamentalas latiers en la revisiun da la legislaziun da scola e probablamain er elavuradas en directivas correspundentas.
Tar c: Per evitar ina stigmatisaziun da scolaras e da scolars difficils sco "purtadras e sco purtaders da subvenziuns spezialas" duai vegnir examinà, sche ed en tge furma ch'ils custs supplementars correspundents da las instituziuns ch'èn responsablas per la scola pon vegnir finanziads vinavant tras la salarisaziun pauschalisada da las persunas d'instrucziun.

La regenza è pronta d'acceptar l'incumbensa en il senn da questas ponderaziuns.

Datum: 9 da favrer 2007