Incumbensa da fracziun da la PS Bucher-Brini concernent la revisiun dal dretg fiscal dal chantun Grischun
Sessiun: 16.04.2007
Sco ch'il relasch da taglia enorm (chantun Grischun e citad da Cuira en total ca. 2 milliuns francs) en favur da la famiglia Mathis e da sias interpresas è vegnì enconuschent, èn vegnidas a la glisch pliras situaziuns insupportablas en connex cun il dretg fiscal dal chantun Grischun. Ultra da quai vegn il "cas Mathis" percepì da la publicitad en moda fitg animada, savens cun gronda indignaziun, ed i vegn pretendì dapli transparenza, dapli giustia fiscala ed in tractament pli egual.
Il relasch da taglia en il senn d'in relasch definitiv dal debit fiscal sto da princip vegnir mess en dumonda (almain a partir d'ina tscherta summa). I n'è betg gist da far pajar enavos a las simplas pajataglias ed als simpels pajataglias baud u tard mintga franc da lur debit fiscal entant che auters survegnan en ina giada in regal da milliuns.
Empè dal relasch da taglia definitiv duess vegnir disponida per tuttas e per tuts ina uschenumnada "prorogaziun illimitada" che dura uschè ditg che la debitura u ch'il debitur na po betg sa prestar da pajar il debit fiscal. Quai vul dir che per il debit fiscal vegniss sche necessari concedì in termin da pajament che durass fin a la fin da lur vita.
Il secret fiscal duai vegnir abolì analogamain a differents auters chantuns sche las actas da taglia ston vegnir fatgas accessiblas er a terzas persunas. I fa surstar che inguistias fiscalas vegnan protegidas dal secret fiscal. Plinavant duai en l'avegnir prender l'entira regenza la decisiun en dumondas d'in relasch da taglia da passa 5000. francs e betg sco fin ussa mo il departament da finanzas.
Perquai envidan las sutsegnadas ed ils sutsegnads la regenza:
1. Da midar l'art. 122 al. 2 da la lescha da taglia per il chantun Grischun en quel senn ch'i sto vegnir dà l'invista da las actas fiscalas er a terzas persunas.
2. Da midar l'art. 156 al. 3 lit. b da la lescha da taglia per il chantun Grischun per che l'entira regenza decidia tar relaschs da taglia da passa 5000. francs.
Cuira, ils 16 d'avrigl 2007
Name: Bucher-Brini, Menge, Baselgia-Brunner, Arquint, Frigg-Walt, Gartmann-Albin, Jaag, Jäger, Peyer, Pfenninger, Pfiffner-Bearth, Thöny, Trepp, Locher, Benguerel
Session: 16.04.2007
Vorstoss: rg Anfrage
Resposta da la regenza
Pervia d'ina decisiun da relaschar taglias ch'è vegnida prendida dal departament da finanzas e ch'è vegnida publitgada da las medias, envida la fracziun da la PS la regenza da midar dus puncts da la lescha chantunala da taglia. D'ina vart duai vegnir abolì il secret fiscal, e terzas persunas duain avair invista da las actas da taglia. Da l'autra vart duai la regenza survegnir la cumpetenza da relaschar debits fiscals da passa 5'000. francs.
Posiziun da la regenza
1. Pertutgant las taglias directas vegn restrenschida l'autonomia legislativa dal chantun tras la lescha federala davart l'armonisaziun da la taglia directa dals chantuns e da las vischnancas dals 14 da december 1990 (lescha d'armonisaziun da taglia; LATD). Las normas da leschas chantunalas ch'èn cuntrarias a las reglas da la lescha d'armonisaziun da taglia vegnan derogadas da questa ultima e n'han pia nagin effect pli.
L'invista da las actas fiscalas che vegn pretendida sa demussa en vista da l'art. 39 LATD sco cuntraria al dretg federal. La lescha d'armonisaziun da taglia cuntegna in'obligaziun cumplessiva da tegnair secret e permetta excepziuns mo per dar infurmaziuns, dentant betg per laschar prender invista persunas privatas da las actas (cf. M. Zweifel en "Kommentar zum Schweiz. Steuerrecht" I/1, 2. ediziun, art. 39 LATD A 1 ss. e 7 ss.).
Er in'avertura main extendida dal register da taglia che fiss pussaivla tenor il dretg d'armonisaziun e tenor la quala vegnissan publitgads mo ils facturs fiscals, sto vegnir refusada, a l'avis da la regenza. La controlla da l'administraziun, che vegn prendida en mira, na po betg vegnir cuntanschida en questa moda perquai che las relaziuns effectivas d'entrada e da facultad sa laschan deducir, sch'ins ha vastas enconuschientschas da las relaziuns concretas. La publicitad dal register da taglia n'è pia betg utila.
La regenza refusescha perquai l'incumbensa da fracziun da la PS da dar invista da las actas fiscalas a terzas persunas.
2. Il relasch da taglia è reglà en l'art. 156 da la lescha da taglia. La persuna ch'è obligada da pajar taglia ha in dretg d'in relasch, sche las cundiziuns respectivas èn ademplidas. Quai mussa cleramain l'art. 139 al. 1 LT, tenor il qual i po vegnir recurrì cunter la decisiun davart in relasch da taglia cun in recurs tar la dretgira administrativa.
La decisiun davart in relasch da taglia è pia ina decisiun giuridica e betg ina decisiun politica. Quai è er il motiv, pertge che la cumpetenza da conceder il relasch da taglia è vegnida transferida en la revisiun parziala da la lescha da taglia dals 13 da zercladur 1999 da la regenza al departament da finanzas. La midada da la lescha è stada incontestada tant en la cumissiun predeliberanta sco er en il cussegl grond.
Cun il project "essenzialisaziun e flexibilisaziun da la legislaziun e da l'applicaziun dal dretg (EFLAD)" vuleva il chantun er distgargiar la regenza. La realisaziun dad EFLAD resta vinavant ina finamira da la legislaziun. La regenza duai prender mo pli decisiuns essenzialas ed impurtantas dal puntg da vista politic. En quest senn na duai la regenza betg obtegnair la cumpetenza da conceder relaschs da taglia per imports da 5'000. francs.
Per il relasch excepziunal da debits fiscals fitg auts po dentant vegnir prendida en consideraziun la cumpetenza da la regenza da conceder relaschs da taglia. La regenza è pronta d'acceptar l'incumbensa en quel senn, ch'ella decida davart il relasch da debits fiscals a partir d'ina summa da 100'000. francs per mintga onn fiscal e ch'ella prepara ina midada da lescha correspundenta.
Datum: 8 da matg 2007