Envers il stgalim da basa resp. envers il stgalim fundamental ha la regenza oz da princip la medema tenuta sco quai ch'ella ha exprimì en sias respostas a las intervenziuns parlamentaras Gartmann (sessiun da schaner 2000), Jäger (sessiun da schaner 2000) e Frigg (sessiun da december 2004). Ella è persvadida che l'atgna soluziun, ch'è coordinada cun la situaziun concreta, è adattada fitg bain per il chantun per optimar la midada tranter la scolina e la scola primara. Quest model cumbinescha l'entrada flexibilisada en scolina resp. en scola cun agid da classas cumbinadas (1. e 2. classa primara). Uschia daventi pussaivel che mintga uffant po absolver il program da l'emprima fasa da scolaziun (4. fin 8. onn da vegliadetgna) en ses tempo da svilup individual, senza ch'i stoppia pervia da quai vegnir renunzià a la scolina sco agen stgalim.

Il stgalim da basa resp. il stgalim fundamental cumpiglia ils dus onns da scolina e l'emprima classa primara resp. las emprimas duas classas primaras. Lur avantatgs e lur dischavantatgs vegnan actualmain examinads en il rom d'in project da pilot da la CDEP-ost. En il chantun Turitg èn vegnidas prolungadas las emprovas cun il stgalim fundamental ed ina decisiun da princip correspundenta è vegnida spustada, cun la consequenza ch'ins na po er betg quintar a Turitg cun in'eventuala introducziun generala avant l'onn 2012.

La regenza è conscienta: Sch'il stgalim da basa resp. sch'il stgalim fundamental vegniss introducì en ils chantuns vischins suenter la finiziun dal project da pilot da la CDEP-ost (2010), stuess er il chantun Grischun examinar sia introducziun. Per quest motiv è il chantun participà al project da pilot da la CDEP-ost gia dapi il cumenzament sco "observatur". Tar las proximas revisiuns da leschas vegn ultra da quai resguardà che tant la scolina sco er a lunga vista in'eventuala introducziun dal stgalim da basa resp. dal stgalim fundamental sa laschian basar sin las disposiziuns giuridicas revedidas.

Sin fundament da questas ponderaziuns po la regenza prender posiziun sco suonda davart las dumondas concretas:

1. Il chantun Grischun è participà al project da pilot da la CDEP-ost concernent il stgalim da basa resp. il stgalim fundamental gia dapi il cumenzament sco "observatur" e persequitescha cun grond interess ses andament e sia evaluaziun.

2. Il departament d'educaziun examinescha actualmain er en connex cun la realisaziun dal rapport da famiglia differentas pussaivladads per optimar il cumenzament dad ir a scola. En quest connex è il stgalim da basa resp. il stgalim fundamental in tema uschenavant, che la basa legala che sto vegnir formulada da nov duai pussibilitar pli tard en cas da basegn d'introducir in stgalim da basa resp. in stgalim fundamental.

3. La scolina duess vegnir mantegnida ad interim sco agen stgalim. Actualmain vegn sviluppà in model che resguarda las differentas situaziuns en il chantun. Quel cuntegna ina gronda part dals avantatgs che vegnan prendids en mira cun il stgalim da basa resp. cun il stgalim fundamental (meglra permeabilitad e.u.v.), senza dentant chaschunar ils custs supplementars ch'ins spetga d'in stgalim da basa resp. d'in stgalim fundamental.

4. Il svilup e l'evaluaziun dal stgalim da basa resp. dal stgalim fundamental en ils chantuns vischins vegnan persequitads en moda intensiva. Sch'il stgalim da basa resp. sch'il stgalim fundamental duess vegnir introducì là a lunga vista, stuess er il chantun Grischun examinar sia introducziun.

5. Sch'il stgalim da basa resp. sch'il stgalim fundamental duess vegnir introducì en auters chantuns, vegniss il champ da lavur da las persunas d'instrucziun da la scolina, che vegnan scoladas a la scola auta da pedagogia dal Grischun (SAPGR), restrenschì a lunga vista sin il chantun. En quest cas fiss la SAPGR buna da cumenzar cun ina scolaziun e cun ina qualificaziun cumplementara per persunas d'instrucziun dal stgalim da basa resp. dal stgalim fundamental, e quai entaifer maximalmain dus onns suenter la decisiun da princip. En quest connex stuessan vegnir discutads tranter auter er ils criteris d'admissiun a la scolaziun da las persunas d'instrucziun dal stgalim da basa resp. dal stgalim fundamental.

Datum: 22 da zercladur 2007