Navigation

Inhaltsbereich

Sessiun: 18.04.2007
implants idraulics pli pitschens

Entant ch'il potenzial da la forza idraulica dals implants gronds en il chantun Grischun è per gronda part gia tratg a niz cumplainamain, dastgassan implants idraulics dal sectur da prestaziun dad 1 fin 10 MW ed implants idraulics pitschens fin 1 MW bain anc avair in tschert potenzial. Tenor l'uffizi federal d'energia duain vegnir construids en Svizra fin l'onn 2020 ulteriurs 70 novs implants idraulics pitschens che han en media ina prestaziun da 5 MW. Sco ch'il project da l'aual da Taschinas en il Partenz che dastga ussa vegnir realisà mussa, daventan tals projects er interessants, perquai che l'energia daventa pli stgarsa. Il problem è ussa però che tals potenzials anc betg utilisads sa chattan oravant tut en vischnancas ch'èn finanzialmain deblas. Quellas n'èn dentant betg en cas da prender per mauns e da realisar ils projects correspundents u n'èn gnanc en cas da sa participar vi da tals.

Ultra dal fatg che implants idraulics pitschens pon senza auter vegnir manads en moda economica grazia a l'indemnisaziun che vegn garantida tras l'electricitad ch'els furneschan, van er las stentas da la politica regiunala futura en quella direcziun da promover projects che chaschunan ina valur agiuntada empè da projects da l'infrastructura. Cun in sustegn adequat da tals projects da vart dal chantun pudessan "vischnancas cun pauc potenzial" survegnir la pussaivladad da s'avrir ina nova funtauna d'entradas cun implants idraulics che produceschan energia en moda ecologica e d'avair uschia in pau dapli libertad finanziala d'agir.

Las sutsegnadras ed ils sutsegnaders supplitgeschan perquai la regenza da respunder las suandantas dumondas:

- È ella da l'avis ch'il potenzial dal Grischun sco chombra d'aua saja degn da vegnir promovì?

- Datti gia oz ina basa legala per sustegnair tals projects?

- È la regenza pronta da prender en egl in sustegn correspundent en il rom dal project "territoris cun pauc potenzial"?

- È il chantun pront da sustegnair activamain las instanzas che mainan implants idraulics pitschens per trair a niz cumplainamain las pussaivladads d'indemnisar la furniziun d'electricitad ch'èn garantidas tras la lescha?

- È il chantun pront da s'engaschar tar la confederaziun per ch'ils chantuns possian decider definitivamain davart la retratga d'aua e davart las planisaziuns da protecziun e d'utilisaziun, cur che la lescha federala davart la protecziun da las auas vegn revedida?

Cuira, ils 18 d'avrigl 2007

Name: Stoffel, Donatsch, Buchli, Augustin, Bachmann, Berther (Mustér), Berther (Sedrun), Bezzola (Zernez), Bleiker, Blumenthal, Bondolfi, Brandenburger, Brantschen, Brüesch, Bucher-Brini, Bundi, Butzerin, Caduff, Cahannes Renggli, Campell, Castelberg-Fleischhauer, Casty, Caviezel-Sutter (Tusaun), Christoffel-Casty, Conrad, Dermont, Farrér, Fasani, Federspiel, Feltscher, Florin-Caluori, Frigg-Walt, Gartmann-Albin, Geisseler, Giovanoli, Hardegger, Hartmann (Cuira), Hartmann (Champfèr), Heinz, Jaag, Janom Steiner, Keller, Kessler, Kleis-Kümin, Koch, Kollegger, Krättli-Lori, Kunz, Loepfe, Mani-Heldstab, Märchy-Michel, Marti, Michel, Möhr, Montalta, Parolini, Parpan, Pedrini, Peer, Perl, Pfister, Portner, Quinter, Ragettli, Ratti, Righetti, Rizzi, Sax, Stiffler, Tenchio, Thomann, Thöny, Tscholl, Vetsch (Claustra), Vetsch (Pragg-Jenaz), Candinas (Mustér), Foffa

Session: 18.04.2007
Vorstoss: rg Anfrage



Resposta da la regenza

Il potenzial teoretic dal chantun Grischun per producir energia cun la forza da l'aua importa circa 12'500 milliuns uras da kilowatt (1 miu. kWh = 1 GWh) per onn. Da quest potenzial vegnan actualmain duvrads circa 2/3 resp. stgars 7'800 GWh per onn. Da quests pertutgan 0.4% implants idraulics fitg pitschens cun ina prestaziun fin 0.3 megawatts (MW), 6.2% implants cun ina prestaziun tranter 0.3 e 10 MW e 93.4% implants idraulics cun ina prestaziun sur 10 MW.

En il senn d'utilisar la forza idraulica en moda raziunala ha la lescha davart il dretg da las auas dal chantun Grischun l'intent da trair a niz ina part uschè gronda sco pussaivel dal potenzial d'in traject d'aua e da transfurmar sia forza en energia electrica. Pervia da quai na vegn il potenzial da la forza idraulica che n'è anc betg vegnì tratg a niz, betg en dumonda per implants idraulics pli pitschens. Or da la vista da l'economia publica vali da generar ina valur agiuntada uschè gronda sco pussaivel or dal potenzial da la forza idraulica, e quai en il rom da las pussaivladads che la lescha permetta.

Respostas a las dumondas:

1. Las finamiras vertentas da la politica d'energia da la regenza dals 10 da schaner 2000 prevesan tranter auter da cumplettar las forzas idraulicas en moda raschunaivla per l'economia ed en moda giustifitgabla per l'ambient. En quest senn vegn il potenzial da la forza idraulica che resta resguardà vinavant sco degn da vegnir promovì.

2. Per producentas e per producents independents che possedevan implants idraulics pitschens fin 1 MW preveseva la lescha federala d'energia (LEn) fin ussa d'indemnisar la furniziun da l'electricitad che vegn producida da memia cun contribuziuns che cuvran ils custs. La lescha federala davart il provediment d'electricitad (LPrEl) ch'è vegnida deliberada da las chombras federalas la primavaira 2007 cuntegna ussa in'extensiun da questa regulaziun. Tenor quella duain ovras idraulicas pitschnas che han en media ina prestaziun mecanica brutta da fin 10 MW e ch'èn vegnidas messas en funcziun suenter il 1. da schaner 2006 u ch'èn vegnidas engrondidas considerablamain resp. renovadas, profitar en il futur d'ina indemnisaziun che cuvra ils custs da la furniziun d'electricitad. Las tariffas da furniziun concretas e las cundiziuns generalas vegnan actualmain elavuradas da la confederaziun.

3. En il rom da la discussiun en connex cun la nova politica regiunala da la confederaziun (NPR) ha il Grischun lantschà ensemen cun il chantun Uri e cun la "rait per il territori rural" in project da pilot cun il num "spazis cun pauc potenzial tractament da potenzials betg utilisads, strategia da svilup dal Grischun/da l'Uri". Tar quest project sa tracti d'elavurar ina basa per la discussiun, da sviluppar ina strategia chantunala per promover ils spazis cun pauc potenzial, e quai resguardond tut las politicas spezialas ch'èn relevantas, sco er d'eruir mesiras per realisar questa strategia. Il rapport final da quest project n'è anc betg avant maun. In sustegn direct d'implants idraulics pli pitschens tras il project "spazis cun pauc potenzial" na vegn dentant betg en dumonda, perquai che quest project elavura mo ina basa da decisiun pussaivla.

4. En il rom da sias pussaivladads vegn il chantun a s'engaschar er vinavant per cussegliar e per sustegnair petentas e petents, per che projects d'implants idraulics da quest gener possian vegnir realisads senza retards nunnecessaris. Uschia duai ina part uschè gronda sco pussaivel dals daners da promoziun vegnir duvrada en il Grischun. I n'è dentant betg l'incumbensa dal chantun d'elavurar sez projects concrets.

5. Il chantun è gia s'engaschà directamain ed en il rom da la conferenza da las regenzas dals chantuns alpins (CRCA) diversas giadas tar la confederaziun, per che la cumpetenza per dar concessiuns per ovras idraulicas vegnia surdada en moda cumplessiva (inclusiv las planisaziuns da protecziun e d'utilisaziun) a l'instanza da permissiun ch'è mintgamai responsabla (auas da cunfin: confederaziun; autras auas: chantuns). Il chantun e la CRCA vegnan a s'engaschar er en il futur per questa fatschenta.

Datum: 4 da fanadur 2007