da consultaziun
La qualitad da consultaziuns chantunalas è sa meglierada fitg ils ultims onns. Qua tras è er creschida l'influenza sin la furmaziun da l'opiniun democratica. En connex cun il svilup da novas leschas ha la regenza realisà ch'igl è raschunaivel d'integrar en in stadi tempriv circuls uschè vasts sco pussaivel en la furmaziun da l'opiniun, e quai per trair a niz il puls politic per midadas cun integrar las vischnancas, las partidas e las associaziuns d'interess, per sviluppar projects che vegnan sustegnids d'ina maioritad e per evitar ch'i dettia pli tard lavinas da midadas.
Las partidas cun lur fracziuns parlamentaras èn las gruppaziuns las pli impurtantas che vegnan pertutgadas da projects da leschas. Perquai ch'ils termins da consultaziun èn savens memia curts, èsi nunpussaivel per ellas da prender part da las consultaziuns. Las fracziuns sa radunan en media mo mintga dus mais. Sch'ellas pudessan vegnir integradas en il process da la furmaziun da l'opiniun gia en il stadi da las consultaziuns, daventass la lavur da las cumissiuns e dal parlament pli tard bler pli effizienta. Tut ils circuls ch'èn stads involvids tar la furmaziun da l'opiniun daventan gruppaziuns pertutgadas che vegnan integradas en la lavur da las cumissiuns e dal parlament. La lavur dal cussegl grond e tras quai er la lavur da las fracziuns èn occupaziuns accessoricas che han lieu mo periodicamain. Dal puntg da vista da las partidas pon actualmain mo las direcziuns da las partidas s'exprimer davart consultaziuns chantunalas. Uschia na resguarda il resultat betg la basa democratica e porta savens posiziuns ch'èn per la regenza e per l'administraziun pauc segiras.
Per che las partidas e per che lur fracziuns survegnian avunda temp per pudair s'exprimer en
moda differenziada davart tut las consultaziuns, supplitgeschan las incumbensadras ed ils incumbensaders la regenza d'observar per regla in termin d'almain trais mais tar tut las consultaziuns.
Cuira, ils 17 d'avrigl 2007
Name: Feltscher, Bucher-Brini, Cavigelli, Arquint, Bachmann, Barandun, Bezzola (Zernez), Bondolfi, Brandenburger, Bundi, Caduff, Casparis-Nigg, Casutt, Caviezel (Pitasch), Claus, Clavadetscher, Farrér, Federspiel, Felix, Florin-Caluori, Frigg-Walt, Gartmann-Albin, Geisseler, Hanimann, Hartmann (Cuira), Hartmann (Champfèr), Jaag, Jäger, Jenny, Kessler, Koch, Kollegger, Krättli-Lori, Kunz, Menge, Mengotti, Meyer-Grass (Claustra), Michel, Montalta, Nick, Niederer, Parpan, Peer, Perl, Peyer, Pfäffli, Pfiffner-Bearth, Portner, Ragettli, Rizzi, Thomann, Thöny, Trepp, Valär, Vetsch (Pragg-Jenaz), Locher Benguerel, Mainetti
Session: 18.04.2007
Vorstoss: rg Auftrag