Navigation

Inhaltsbereich

Sessiun: 11.06.2007
Dapi in pèr onns po il chantun Grischun observar las directivas da la politica da finanzas e schizunt surpassar ellas.
Cun in sguard en il futur po pervia da la situaziun economica actuala, pervia dal svilup da l'economia e pervia da la buna basa d'agen chapital dal chantun vegnir fatg quint cun resultats annuals ch'èn bler megliers che previs en la planisaziun da finanzas.
Il svilup da l'economia vegn numnadamain a chaschunar a curta vista ed a vista mesauna entradas pli grondas tar las taglias. Ultra da quai è la basa actuala d'agen chapital dal chantun uschè solida che pitschnas divergenzas pon vegnir supportadas senza auter en il rom da preventivs equilibrads.

En quai che concerna las expensas pretenda la PLD dapi onns ch'ils meds finanzials che stattan a disposiziun vegnian adina puspè mess en dumonda e priorisads da nov. Pia èsi en il futur bain pussaivel che novas incumbensas pon vegnir finanziadas en moda neutrala or da las finanzas chantunalas existentas, premess che expensas existentas vegnian messas en dumonda, uschia che quellas pon eventualmain vegnir ademplidas en moda pli favuraivla. Forsa n'èn ellas tut tenor il svilup gnanc pli necessarias e pon vegnir annulladas.

Cun la legislaziun vertenta vegnan generadas en il futur dapli entradas fiscalas che quai ch'i fissan necessarias e planisadas. Uschia vegnan stgaffidas avunda reservas d'agen chapital per pudair dumagnar er nauschs onns finanzials.

Gia en l'ultima missiva ha la regenza renvià al fatg ch'i stoppia vegnir reducida massivamain er la taglia sin il chapital per mantegnair la cumpetitivitad interchantunala (missiva, p. 1165). Sco ch'ina cumparegliaziun da las grevezzas fiscalas mussa, è la taglia sin il chapital per societads da chapital e per societads cooperativas incommensuradamain auta en il chantun Grischun. Tenor l'index da la grevezza dal chapital da l'onn 2005 sa chatta il chantun Grischun cun 231.7 puncts lunschor sin l'ultima plazza. Vi da quai na mida er nagut l'aboliziun da la taxa speziala sin il chapital ch'è vegnida realisada dacurt. In resultat correspundent mussa er la cumparegliaziun cun auters chantuns:

chantun Grischun: 2.3‰ sin ils emprims 4 milliuns francs e 2.5‰ sin il rest (societads da holding e.u.v. 0.05‰)

chantun Son Gagl: 0.2‰ (societads da holding: 0.01‰)

Pervia da quai sto la taglia sin il chapital vegnir reducida considerablamain.

Er en connex cun la taglia sin la facultad ha la regenza stuì constatar en sia ultima missiva davart la lescha da taglia ch'il chantun Grischun taxescha las facultads en moda relativamain auta (missiva, p. 1176). En l'index general da la grevezza da la facultad ha il Grischun occupà cun 118 puncts ina plazza en l'ultim terz dals chantuns. La taglia speziala sin la facultad è alura vegnida abolida. Quai na basta dentant betg per posiziunar il Grischun sco chantun da domicil attractiv (en spezial per persunas che retiran ina renta). Er qua ston vegnir fatgas tschertas facilitaziuns essenzialas.

L'ultima revisiun ha chaschunà ina reducziun considerabla tar las taglias sin il gudogn. Auters chantuns s'allontaneschan puspè dal Grischun (AR cun ina reducziun a totalmain 6%) ed en la cumparegliaziun internaziunala tutgan ins pir tar ils megliers lieus da staziunament, sch'ins ha ina grevezza fiscala sin tut ils nivels da totalmain 10 12% (Irlanda, Cipra). Qua vegnan la confederaziun, ma er ils chantuns anc ad esser dumandads fermamain. Cun ina tariffa fiscala marginala da totalmain 14% taxescha il Grischun anc adina considerablamain ils gudogns. Ultra da quai han en spezial las societads pitschnas cun gudogns pli bass tratg la curta tar l'ultima revisiun. Quai stuess vegnir curregì cun success tar in'ulteriura reducziun da la tariffa maximala adattond la tariffa progressiva.

Pervia da quai vegn la regenza incumbensada da proponer al cussegl grond en il rom d'ina revisiun parziala da la legislaziun da taglia las mesiras menziunadas qua survart per reducir la taglia sin il chapital, la taglia sin la facultad e la taglia sin il gudogn.

Cuira, ils 11 da zercladur 2007

Name: Hanimann, Bachmann, Barandun, Bezzola (Zernez), Bischoff, Bühler-Flury, Casparis-Nigg, Caviezel (Pitasch), Claus, Clavadetscher, Feltscher, Hartmann (Cuira), Hartmann (Champfèr), Jenny, Kessler, Kunz (Cuira), Marti, Meyer-Grass (Claustra), Michel, Nick, Perl, Pfäffli, Ragettli, Rathgeb, Rizzi, Thomann, Toschini, Valär, Vetsch (Pragg-Jenaz), Wettstein, Hauser, Just, Kunz (Fläsch)

Session: 11.06.2007
Vorstoss: rg Auftrag



Resposta da la regenza

L'ultima gronda revisiun parziala da la lescha da taglia, cun la quala i pon vegnir cuntanschidas fitg grondas distgargias da las persunas natiralas ed en spezial er da las persunas giuridicas, vegn ad entrar en vigur il 1. da schaner 2008. La situaziun economica fitg buna chaschuna ch'i na vegn strusch a dar ils deficits en il quint current ch'èn anc prognostitgads en la missiva. Ultra da quai po il chantun realisar fin la fin da l'onn che vegn bler dapli agen chapital che previs oriundamain. Uschia exista ina libertad d'agir en dumondas da la politica da finanzas che permetta da prender per mauns ulteriurs puncts da revisiun en la lescha chantunala da taglia che vegnan resguardads sco urgents.

En connex cun l'ultima revisiun parziala da la lescha da taglia ha la regenza percurschì che las taglias sin la substanza q.v.d. la taglia sin la facultad da las persunas natiralas e la taglia sin il chapital da las persunas giuridicas èn memia autas. Dapli che l'aboliziun da la taxa speziala sin il chapital e sin la facultad n'ha da quel temp dentant betg pudì vegnir realisà; la libertad d'agir en dumondas da la politica da finanzas era exaurida e per ulteriuras mesiras n'eran avant maun naginas resursas pli. Cumparegliaziuns interchantunalas ed internaziunalas da las chargias mussan cler e net che las taglias sin la substanza en l'autezza actuala èn in dischavantatg considerabel per il Grischun. Quai è er il motiv per il fatg che la regenza vegn ad introducir la reducziun da la taglia sin la facultad e da la taglia sin il chapital.

Sch'ins resguarda las cumparegliaziuns interchantunalas ed internaziunalas da las chargias, stuess vegnir prendida en mira ina grevezza fiscala che correspunda circa a la media dals chantuns da la Svizra tudestga. La dimensiun d'ina eventuala reducziun da las taglias sin la substanza na dependa betg mo da las cumparegliaziuns da las chargias, mabain fitg ferm er da las pussaivladads finanzialas dal chantun e da las vischnancas. En quest connex sto vegnir resguardà che las entradas da la taglia sin la facultad importavan l'onn 2006 sulettamain per il chantun circa 66 milliuns francs e talas da la taglia sin il chapital circa 17 milliuns francs. Vitiers vegnan entradas da las vischnancas circa da la medema dimensiun sco er las entradas da las baselgias chantunalas e da lur cumins-baselgia. Sche las taglias sin la substanza vegnissan reducidas massivamain, chaschunass quai er entradas bler pli pitschnas per tut las instituziuns che portan la suveranitad. En quest connex sto vegnir chattada ina via tranter la finamira giavischada e las pussaivladads finanzialas che vegn er acceptada da la politica.

Cun l'ultima revisiun parziala da la lescha da taglia è l'autezza da la taglia sin il gudogn vegnida pli che smesada. Uschia na po betg vegnir cuntanschida ina plazza a la testa en la cumpareglià cun ils auters chantuns. Il Grischun han ina grevezza fiscala ch'è circa uschè gronda sco quella da Son Gagl e pli pitschna sco per exempel quella da Turitg. A partir da l'onn che vegn correspunda la grevezza fiscala tar la taglia sin il gudogn a las pussaivladads economicas dal chantun Grischun. Ina concurrenza cun ils chantuns Zug e Sviz u cun ils auters chantuns pitschens Sursilvania ed Appenzell dador na po il chantun Grischun dentant pli probabel mai sa prestar. I na po dentant betg vegnir giuditgà oz en moda definitiva, sch'ina ulteriura reducziun minima da la taglia sin il gudogn vegn pervia da la cumparegliaziun cun ils auters chantuns ad esser necessaria en ina revisiun vegninta.

La regenza è pronta d'acceptar l'incumbensa per reducir la taglia sin la facultad e la taglia sin il chapital e d'examinar il basegn d'agir areguard la taglia sin il gudogn en consequenza da questa revisiun da la lescha. Pervia dal svilup positiv da l'economia po questa revisiun vegnir prendida per mauns pli baud che planisà oriundamain, uschia ch'ins po far quint cun ina procedura da consultaziun gia en la segunda mesadad da l'onn che vegn.

Datum: 14 d'avust 2007