Navigation

Inhaltsbereich

Dumonda Heinz concernent la midada da chasa dal servetsch archeologic dal chastè da Haldenstein, Haldenstein, a la Loestrasse 26, Cuira

Sessiun: 12.06.2007
Tenor la missiva da la regenza al cussegl grond, carnet nr. 7/1983-84, fatschenta nr. 24, è vegnida preschentada al cussegl grond la construcziun d'in stabiliment da protecziun per bains culturals sin l'areal dal chastè da Haldenstein e quel l'ha er concludida. In corridor da colliaziun sutterran al chastè da Haldenstein è er vegnì construì gia quella giada.

Da quel temp è vegnì concludì in contract da locaziun tranter la fundaziun "chastè da Haldenstein" ed il chantun Grischun per ina durada da 25 onns. Il contract cuntegna la pussaivladad d'al prolungar per ulteriurs 25 onns. Perquai ch'il chantun ha midà locatarias e locataris è vegnì adattà il contract da locaziun tenor la missiva, carnet nr. 6/1987-88, fatschenta nr. 24. Il contract è vegnì concludì per ils 30 da november 1987. Il tschains da locaziun annual da quel temp importava ca. 156'000.00 francs; cun adattar l'index correspunda quai ad in tschains da locaziun actual da ca. 180'000.00 francs. En la medema missiva è vegnì sclerì e preschentà detagliadamain il basegn da spazi dal servetsch archeologic sco er la midada da chasa da quella giada da la Loestrasse 14 al chastè da Haldenstein. En spezial ils secturs andament da la lavur, segirezza da la documentaziun, magasins d'iseglia e da material da construcziun, deposit ed objects che vegnan chattads en la terra sco er substanza architectonica istorica dal chastè da Haldenstein èn vegnids valitads e giuditgads en vista a la midada da chasa a Haldenstein. Tut quests motivs han purtà ina decisiun positiva per la midada da chasa dal servetsch archeologic en ils locals dal chastè da Haldenstein, e quai malgrà ils gronds custs. Er il cussegl da la fundaziun "chastè da Haldenstein" è stà da quest avis ed è stà fortunà ch'el ha chattà in locatari per il chastè; in locatari che na va betg mo a prà cun l'intent da la fundaziun, mabain che cuntegna ultra da quai ina prontezza fitg gronda da s'identifitgar cun tala.

En connex cun las reorganisaziuns en il DECA è vegnida transferì questa primavaira il servetsch archeologic a la Loestrasse 26, Cuira, en l'anteriur center transitoric per requirentas e per requirents d'asil.

En quest connex sa tschentan las suandantas dumondas:

1. È il champ d'incumbensas dal servetsch archeologic sa midà talmain ch'igl è stà necessari da midar chasa?

2. Èn vegnidas lantschadas contractivas cun il cussegl da fundaziun dal chastè da Haldenstein per prolungar il contract a partir da l'onn 2012 respectivamain è vegnida fatga in'adattaziun dal tschains da locaziun?

3. Co nizzegia l'administraziun chantunala ils locals ch'ella ha prendì a tschains fin a la scadenza da la durada ordinaria da locaziun (il november 2012)?

4. Quant ha custà la transfurmaziun da l'immobiglia a la Loestrasse 26 en ils biros actuals?

5. Quant auts èn ils custs da locaziun dal servetsch archeologic a la Loestrasse 26?

6. Fan ins quint da duvrar l'immobiglia a la Loestrasse 26 sco soluziun definitiva u mo provisorica per il servetsch archeologic respectivamain per l'uffizi da cultura?

Cuira, ils 12 da zercladur 2007

Name: Heinz, Geisseler, Michel, Bleiker, Brandenburger, Brüesch, Buchli, Bundi, Campell, Castelberg-Fleischhauer, Casty, Casutt, Caviezel-Sutter (Tusaun), Christoffel-Casty, Clavadetscher, Felix, Hasler, Jenny, Kleis-Kümin, Koch, Märchy-Michel, Mengotti, Meyer-Grass (Claustra), Möhr, Montalta, Nick, Nigg, Parolini, Portner, Quinter, Rathgeb, Ratti, Sax, Stiffler, Stoffel, Troncana-Sauer, Vetsch (Pragg-Jenaz), Joos, Pedrini (Soazza)

Session: 12.06.2007
Vorstoss: rg Anfrage



Resposta da la regenza

Las finamiras da la planisaziun da las localitads da biro cuntegnan ina reducziun dals custs per locals applitgond ils standards novs per localitads e profitond da sinergias. Ellas cuntegnan dentant er la pussaivladad faschond tschertas centralisaziuns d'etablir ina nova cultura da lavur en l'administraziun chantunala. Uschia duessan la gronda part dals servetschs vegnir purschids a la burgaisa ed al burgais en moda centrala e favuraivla per la clientella. Posts da servetsch e departaments pon vegnir manads meglier e pli facilmain, sch'els vegnan unids en in lieu.

Ils ultims tschintg onns èn vegnids lantschads e realisads differents projects che han gì ina influenza sin la strategia d'immobiglias dal chantun. En quest connex sa tracti en spezial da l'examinaziun da las structuras e da las prestaziuns, da la reorganisaziun dal departament d'educaziun, cultura e protecziun da l'ambient, da la reorganisaziun dals departaments e sco consequenza da quai da la planisaziun integrala da las localitads da biro per Cuira.

L'uffizi da cultura ch'è reorganisond il departament d'educaziun, cultura e protecziun da l'ambient vegnì stgaffì da nov or dad otg secturs era domicilià en indesch lieus. Ils secturs che n'èn betg liads vi d'in public, vul dir ils secturs da la direcziun da l'uffizi, da la promoziun da la cultura, da l'administraziun dal museum retic, da l'archeologia e da la tgira chantunala da monuments duevan vegnir unids uschè spert sco pussaivel en in lieu per ch'ina meglra collavuraziun e per ch'ina direcziun pli simpla possia vegnir realisada.

L'immobiglia a la Loëstrasse 26 a Cuira che tutga al chantun e che n'era betg occupada era fitg bain adattada per reunir l'uffizi da cultura. Ultra dals avantatgs en quai che concerna las structuras organisatoricas e directivas han er pudì vegnir schliadas relaziuns da locaziun en l'autezza da ca. 50'000. francs e reducidas las surfatschas utilisadas.

Tar las dumondas:

1. Il motiv da la midada da chasa dal servetsch archeologic n'è betg ch'il champ d'incumbensas fiss vegnì midà. La sedia dal servetsch archeologic a Haldenstein n'ha betg mo separà in post da servetsch, mabain er ina partiziun. Ensemen cun la tgira da monuments furma il servetsch archeologic ina partiziun. La separaziun geografica chaschunava adina puspè malcumadaivladads. La reuniun locala da quests dus posts a la Loëstrasse 26 ha chaschunà sinergias che surpassan per bler l'utilisaziun cuminaivla d'archivs sco er da l'atelier da fotografias e da restauraziun (unida dal know-how).

2. Cun il cussegl da fundaziun n'è betg vegnì contractà. Ina prolungaziun da la relaziun da locaziun n'è mai stada en discussiun, perquai che l'immobiglia n'è betg fitg bain adattada per biros e perquai ch'ina centralisaziun da l'administraziun è sin via. En il rom da la planisaziun da las localitads da biro vegn prendida en mira da princip ina reducziun dals numerus objects da locaziun che n'èn betg adattads per biros.

3. Da princip duain las localitads vegnir sutaffittadas a terzas persunas. Pensablas èn dentant er novas utilisaziuns en il sectur da la cultura. L'atelier d'artistas e d'artists sco er il lavuratori da stampa vegnan laschads en il chastè da Haldenstein.

4. Igl èn mo vegnidas fatgas lavurs da mantegniment e da reparatura (310'000. francs) sco er las adattaziuns dals indrizs da communicaziun ch'èn stadas necessarias (250'000. francs) e che han stuì vegnir fatgas, independentamain en tge moda che l'administraziun utilisescha quest edifizi. Ils custs per las pretensiuns specificas dal servetsch archeologic (elavuraziun dals chats) han importà circa 40'000. francs.

5. Perquai che l'edifizi sa chatta en possess dal chantun, crodan ils custs da locaziun. Er las expensas per il mantegniment architectonic na vegnan betg ad esser pli grondas.

6. Ad interim sa tracti d'ina soluziun provisorica. L'utilisaziun definitiva dal bain immobigliar da la Loëstrasse 26 n'è betg anc fixada. En il rom da la realisaziun da la planisaziun da las localitads da biro duai vegnir decidì davart sia utilisaziun definitiva.

Datum: 3 da settember 2007