1. Dapi onns fan ils circuls interessads grondas stentas per pussibilitar a persunas giuvnas talentadas d'absolver ultra d'ina carriera en il sport er ina furmaziun fundamentala professiunala che correspunda a lur preferenzas ed a lur abilitads. La scolaziun da sportista u da sportist d'elita ch'era vegnida creada avant intgins onns e che vegn renconuschida da la confederaziun ina scolaziun ch'è vegnida absolvida er d'intginas persunas giuvnas talentadas dal chantun Grischun n'exista betg pli, perquai che las absolventas ed ils absolvents da questa scola n'han betg chattà in martgà da lavur correspundent.
La cumbinaziun da sport d'elita e da furmaziun professiunala dependa da manaschis d'emprendissadi sco er d'instructuras e d'instructurs che han chapientscha e ch'èn pronts da resguardar en moda flexibla las grondas pretensiuns d'ina carriera da sport. Er las scolas professiunalas spezialisadas ston prender las mesiras necessarias per conceder a las scolaras ed als scolars la dispensaziun ch'ellas e ch'els dovran per far sport. Fin ussa vegnivan ils scleriments necessaris e las cunvegnas necessarias cun ils giuvenils, cun ils manaschis d'emprendissadi e cun las scolas professiunalas spezialisadas fatgs mintgamai individualmain, e quai cun il sustegn da l'uffizi per la furmaziun professiunala. La regenza è pronta da furnir er vinavant quest servetsch en il sectur dal sport da prestaziun ed a favur dals giuvenils.

2. Per pudair promover anc meglier las persunas talentadas en il sport d'elita ha l'associaziun olimpica svizra introducì ensemen cun instituziuns da furmaziun sco er cun partenarias e cun partenaris da sport il label "swiss olympic partner school". Il label stat a disposiziun a scolas ch'èn activas en il sectur da la scolaziun e da la furmaziun supplementara generala u professiunala e che han ina purschida da scola ch'è structurada en moda specifica per sportistas talentadas e per sportists talentads. La scola professiunala da Cuira (SPC) ha l'intenziun da daventar ina "swiss olympic partnerschool" e d'endrizzar per quest intent in post da coordinaziun per fatgs da sport. La regenza beneventa la creaziun d'ina rait tranter manaschis ed organisaziuns dal mund da lavur sco er tranter scolas professiunalas spezialisadas e federaziuns. En quest connex stattan a disposiziun sco posts da cussegliaziun ils uffizis da la scola professiunala ch'èn cumpetents per promover il sport resp. la furmaziun professiunala.

3. La situaziun per las emprendistas e per ils emprendists che vulan far parallelamain a lur furmaziun fundamentala professiunala ina carriera en il sport d'elita, è cumplexa. I sa tracta da coordinar las pretensiuns che vegnan fatgas visavi la scolaziun pratica en il manaschi d'emprendissadi ed en ils curs cumplettants sco er visavi la scolaziun teoretica en la scola professiunala spezialisada cun las pretensiuns che vegnan fatgas visavi las unitads da trenament e visavi las cumpetiziuns. Savens èsi difficil da satisfar als basegns da mintga sportista u da mintga sportist sco er d'accordar quels en las cunvegnas individualas u cun ils plans da scola e d'examen, cun ils curs e cun las vacanzas. La regenza è pronta da gidar tras ils uffizis cumpetents en collavuraziun cun las scolas professiunalas spezialisadas, cun l'associaziun olimpica svizra e cun las federaziuns da sport ils manaschis d'emprendissadi che promovan il sport da prestaziun a prender mesiras supplementaras a favur da la giuventetgna, e quai cun als laschar elavurar cunvegnas individualas tras las resursas persunalas che stattan a disposiziun.

Datum: 7 da settember 2007